PDA

عرض كامل الموضوع : للى بيحب مصر ومعندهوش موقف



issam.obayd
11-03-2012, 01:44 PM
http://c14.zedo.com//OzoDB/0/0/0/blank.gif http://www.youm7.com/images/Editors/442.jpg (http://www.youm7.com/EditorOpinions.asp?EditorID=442)
غادة عبود (http://www.youm7.com/EditorOpinions.asp?EditorID=442)

للى بيحب مصر ومعندهوش موقف



تعرفى يا مصر الفرق بين حد مرتبط بيكى ارتباط رسمى على ورق موثق ومختوم؟ والفرق بين حد اختار يحبك رغم إن ما معهوش ورق رسمى يربطه بيكي؟ إن المرتبط بيكى ارتباط رسمى ليه عندك حقوق لازم توفّيهاله، والتانى مش منتظر منك غير ابتسامة قبول. زى بالظبط الفرق بين الجواز والحب. فى الجواز لازم الواحد يبقى عنده وظيفة، ومدارس، وكسوة صيف وشتا، وسكن مناسب، وعلاج ومستشفيات، ومواصلات، وحسبة كبيرة اللائحة فيها تطول، الجواز مسؤولية وحقوق.

بس فى الحب بيبقى مستنى منك إيه؟ تبتسمى يرقص من الفرح، تزعلى يتخانق معاكى ويقولك "طب والله اسيبك وامشي"، بس إفّيه ترميه فى وسط الخناقة، تخليه يرجع يقولك "لأ طب انا قاعدلك بقى" وأهى أغنية تتقال هنا، ووعد منك ببكرة أحسن هناك، ودعوة من القلب منّك بتخلّى الوقت يهون. فى الحب بيقبلك يا مصر بعيوبك زى ما نتى، آه طبعا نفسه يشوفك أحسن بلد، بس هو أصلا شايفك يا مصر فى عينه أحسن بلد. صحيح قسوتك بتكسره بس عشرته بيكى تخليه يقول من عشمك فيه، أهو بطّلعى فيه همّك والأصول إنه يستحمل.

وقررتى تتغيّري. كل حد حبّك فرحلك ودعالك لمّا غضبتي، واتمردتي، وثورتى وقررتى أخيراً تدّى خيرك لكل أولادك، كلهم أولادك بإسمك على ورق رسمى ممضى موثّق ومختوم. مبروك إنك دلوقتى هتراعيهم وتاخديهم فى حضنك وتمسحى على قلبهم وتعامليهم بالمودة والرحمة والسكن. ده واجبك وده حقهم أخدوه بدراعهم عشان جدعان. ما دول أولادك على ورق رسمى ومختوم.

فى الجواز لمّا بتحصل حاجة أو تظهر أشخاص جديدة فى حياة أحد الطرفين، التانى بيسأل " كنت فين؟ اتأخرت ليه؟ بتكلم مين؟ تعرفه منين؟ أصله وفصله إيه؟ إيه اللى بينك وبينه؟ عايز منك إيه؟ قلته لبعض إيه؟ إنت هتقطع علاقتك بيه ولا تنام ع الكنبة الإسبوع ده؟ّ!" أما فى الحب حتى لما بيبقى فيه النوع ده من الأسئلة ففى الغالب لا يصرح بيها وبتفضل فى حيز الكتمان، تمرجح العقل يمين وشمال ومن حيرة لقلق تحدفه، من خوفه للناس الجداد دول يغيّروه وينسوه الحب اللى كان.

صحيح الأصول إن اللى فى موقفى ما يسألش، بس فيكى غيرى كام مليون ع الورق مش مرتبطين بيكي. ولكن فى الحقيقة هما منك وانتى فيهم. عن استحياء، قلق، حيرة، تخبط، أرجوكى أحب أسألك:

مين كل الناس دول؟ هل وائل غنيم هو المخلّص وبطل خارق للطبيعة؟ ولاّ هو ماسونى وشرير وعادل أدهم العصر الحديث؟ ناس كتير بتقول هو الخيار الأول، وناس كتير برضه بيقولوا التاني. الرأيان صوتهم عالى وانا واحدة من ناس كتير متلخبطة!! ناوية على ايه يا مصر مع الإخوان المسلمين؟ وهما عايزين منك إيه؟ أكيد ناوين على حاجة، اللى يقرأ التاريخ لا يمكن يطّمنلهم. أنا أول ما قريت "حكومة ائتلافية" غصبن عنى افتكرت لبنان واللى حصل فيها- سوليدير، فسياحة جامدة، ثم اغتيال، وانتى عارفة الباقي. أنا مش بفاول عليكي!!!!! أنا بس محتارة وقلقانة!!!!

هو انت يا مصر موافقة على حكومة د. أحمد شفيق ولا لأ؟ المقالات المؤيدة والمعترضة الاتنين فى الأكثر قراءة!!! انتى مقررة ايه بالظبط؟ تكنوقراط؟ هل معناه إن ممكن جراح قلب يكون أدبي؟ مش عارفة!!!

احتجاج هنا وحريقة هناك، وحظر تجول، هو مش انتى قلتى كل حاجة بخير خلاص؟ يكونش عشان بقيت أقرا جرايد كتير؟ وبتفرج على برامج التوك شو؟ أنا طول عمرى بقول إن برامج التوك شو دى تشيّب والمستفيد الأول منها هم دكاترة الأمراض النفسية وقسطرة القلب..

بس تعرفى بينى وبينك كدة، بس ما تقوليش لحد؟ وحشنى قوى إن أكتر حاجة كانت بتفرسنى هما حبيبة الكورنيش لما كنت بسأل نفسى "هما بيجيبوا كلام يقولوه منين؟ طب لو حد من أهلها عدى هتقولوا ده مين؟" ودول ييجو إيه فى كم المتحولين البجحين اللى على التلفزيونات اليومين دول؟ وبصراحة وحشنى لمّا كان الفيسبوك عبارة عن ناس بتتلصّص على أخبار الناس الشخصية، وأغانى الغدر والخيانة والحب. وحشنى لمّا ابقى مضايقة أروح آخد بعضى وأروح كايرو جاز.. وحشتنى الحاجات الفرعية التفصيلية اللى بتوحش أى حد بيحب ما عندهوش أجندة ولا حزب ولا مستنى منك حاجة غير صورة وكلمة حلوة... هتطمنينى يا مصر؟ هتطمنينى بجد؟ ولا أنام ع الكنبة الأسبوع ده كمان؟