PDA

عرض كامل الموضوع : المحـشـي و سـنـيـنـه



بليز وخر شوي
10-10-2003, 07:11 PM
8-)

أمنيتي ، أمل حياتي ، والحب كده ..
أموت وآكل في طاوله عليها نبيل شعيل وزكيه زكريا وجارنا ابوسعد ..
ابي اعرف سر المهنة ..
يبدون بإيش وكيف يمضغون ، ومتى يعرفون انهم شبعوا ، ووش كبر اللقمه ؟

مدحوا لي الطحينية ، وخسرت الفين اصلح سنوني ..
قالوا عسل على الريق جاني امساك ..
نصحوني بالاكل بين الوجبات ، صار اكلي كله شيبس وما عاد آكل وجبات ..
شاروا علي اني اركز في الاكل وما اشغل نفسي بالكلام ولا الجرايد ولا التلفزيون .. صرت آكل وانا مكشر ، واصبت باكتئآب معوي حاد ، وحالة شرود ذهني ، وعمى الوان ، وصقه النعام ..

:cry: :cry:


الين جا الحل .. :)


يسوى وزنه ذهب ..
كنت في رحله للمدينه ، وكنت اسمع انها عاصمة العطارة ، سألت واحد من أهل الديرة عن أشهر عطار ، قال عمك حميدان ..

عمك حميدان في الرمق الأخير من عمره ، دكان عطار تقليدي ، بس مع قش العطارين مثل اللي شفتوها عند ابوحابس ، كان يبيع حبال ..!.. اموت اعرف ليه ؟؟
زباين حريم ، وكلهم يهمسون له همس ، وخويكم عنده حاسة تطفل استمرت منذ الطفولة ، جدعت اذني ابي اسمع وش يقولون له ما قدرت ، جا دوري وخفت من نظراته وتلعثمت ..

- أبي خلطة تسمين ..
- إيش ، إيش قلت ؟
(يابن الذين هلحين يوم جا دوري ما تسمع ، والحريم اللي تو ما تعوق معهم)
- ابي حاجة تسمن ، فاتح شهية (الله يفتح على سمعك يا حميدان)
- الناس تبغي مطفشات وانتا تبغى مشهيات يا ولدي
- جاك العلم عاد ، عندك والا ما عندك خلصنا (شانت الاخلاق)

سكت حميدان لهنيهة ، هنيهتين ، ثلاث هنيهات ، وانا انتظره واعد هنيهاته ، تطلع في الأفق تطلع العارف البصير ، سرحان عبدالبصير ، وأطلق زفرة ، التفت ونادى الصبي محماس ، قاله هات ثن البقر ..
نعم يا حميدان ؟ وش يقول هذا ؟
اكتشفت ان السين راحت مع عوامل التعرية ..

رجع محماس بكيس فيه مسحوق ابيض ، خفت اول ما شفته ، وشكّيت في حميدان ، وقمت اتلفت ، وقلت في نفسي انا في بؤرة ، هذي مؤامرة وشكلي رحت فيها ، والظاهر اني بدون ما ادري عطيته كلمة السر ..
الكوكايين وصل حتى مدينة الرسول يا اولاد المكنسه ..

وانا اتهيأ للانسحاب المتوازن والمدروس ، شفت عمك حميدان يذوق باصبعه من المسحوق ، المعلم بتاع الكار يشيك البضاعة ، صرخ في محماس صرخة انتفاضية ، زيد لنا عشبة الجلهم يا حمار ...؟؟
حسيت ان الوضع بعدها طبيعي ، ارتخت اطرافي ، وتنفست السعداء ، زاد "الحمار" عشبة الجلهم اللي شكلها تبي تلعب بتسبدي ، وتبي تقولن ببنكرياسي ، واثناعشري بعدها يبي يشوطر ..
- معلقة وحدة على الريق قبل تروح المدرسة
- وشي مدرسته .. انا ما ادرس
- شكلك كدا تلميز (ينكت الحبيب الله يلوع تسبده)
-المهم مع كباية حليب وشوية سكر على الريق (يادي الريق اللي يبون يحوسون مريرة ، رحمتك يا ريقي ، كل اللي ما لقى شغل يشتغل بريقي )
- لمدة؟
- كل الكمية اللي بالكيس هادا (ما يخالف يا فؤاد .. أمرك)
- طيب وش يبي يصير لي بعدين ؟ مضمونه الخلطة؟
- اتكل على الله يا ولدي ، ربنا كريم ، تدعي لي انشالله ..
عطيته خمسة واربعين ريال اذكرها الى الحين ، وتوكلت على اللي ما تنام عينه ، وعدت الى الرياض ممسكا بالذهب ، ويدي على قلبي ..

جا رمضان ، وبدا التحدي ، صرت آخذ الحقنة بعد الفطور مباشرة ، اللهم اني لك صمت ، تمره وحقنة ، ومباشرة تبتل العروق بسن البقر ، وبعدها صار اللي صار ..

الخمسة الأيام الأولى كنت معميها وداخل على طمع وهات يا سنبوسه وشوربات ولقيمات ، وانواع مكرونات ، ومعجنات ، وخمسين طبخة تنتهي بكلمة (بالفرن) (كننا يعني بنطبخ على مقرصة) ..

السحوركان تموين عسكري ، مدري ليه كنت اتسحر وانا قلق ، وآكل وانا واقف ، كأني في امتحان وقرب يخلص الوقت ، وقبل الفطور مقدر اقعد او اركز ، امشي من مكان لمكان في البيت وانا حاط يديني في جيوبي وأرد بالإشارة ، وكل مشوار اسوية وانا اتجول .. لازم يمر بالمطبخ ، اشيك على القدور اللي جالسه تنفخ بخار آسر يطيرك معاه مثل اللي في فيلم كرتون ، وصوت القلي تششششش ، كنهم يقلون على صفحة قلبي

العشرة الأيام اللي بعدها حصلت الكارثه ...
رحت وطي مع المحشي .....
لازم على العشاء شي محشي ، بطاطس ، فلفل بارد ، كوسا ، بيدجان ، بصل ، طماط ، بيض ، بطيخ .. المهم محشي ..
ادمنت بالعربي الفصيح وصارت تجيني حالة اذا ما شفت على السفرة محشي ، محشي بإيش ؟ موب مهم ، المهم تتم عملية حشو ، شي وسط شي وكلهم ينوكلون .

سيطرالمحشي على حواسي الى درجة صرت اشوف معها الدنيا محشي في محشي .... طلع حامد الغامدي في برنامج سباق المشاهدين لابس جاكيت بيج على ثوب غامق صار كنه محشي بصل بالمفروم زكيه زكريا.. بيدجان محشي وين ماراحت وين ما جت ، وامشي في الشارع وتهيؤات المحشي تطاردني ، وعيني تطارد السيارات المحشية بالناس ، وكل مشهد يتشقلب في راسي الى صورة محشي ، تعرفون محشي الصامولي باللحمة ؟ :o

الحال اصبحت تصعب على الكافر .. والتغيرات الفسيولوجية من جراء جرعات المسحوق بدت تتمكن مني ...
صرت مهبووووووول ، واطلع لساني ياهووووووة ، محششششششششي يا خلق ابي محشي ، منك لله يا حميدان ، حتى لو اروح اعالج استحي اقول علتي ، وزني زاد ثلاثة محشي بس مع التعب والمجهود والهبال ، نفسيتي تعبت مع الوحم ، واعصابي تلفت لدرجة إني ورغم مقاومتي الشديدة وتمنّع طحت في المعسل ..
بديت وبدون مقدمات ألعب بنت السبيت ، وصرت اشجع الاتفاق ، وبرنامجي المفضل هو"نشرة الاحوال الجوية" بقناة السودان ، وأصبح رابح صقر هو مطربي المفضل ...
:cry:

مسطل
11-10-2003, 02:12 AM
ههههههههههههههههههه

الله يكون بعونك

الله يحشي ايامك بالسعاده

لوووووووووووول

تحياتي
مسطل
مبسوط

على فكره هذي مشاركتي رقم 1000 بالضبط :) ترى هل قدمت مايستحق
العناء ؟ ترى هل يوجد في طيات هذه الالف مشاركة مايستحق العناء :) ؟

بليز وخر شوي
11-10-2003, 06:56 AM
:lol:

عقبال المشاركه 1000000 وخمس طعشششش

مسطل
11-10-2003, 07:20 AM
يسلموووو :) ولو اني احوليت لين قريت الرقم لول

تحياتي
مسطل

خالد الحربي
11-10-2003, 12:17 PM
بليز
يارب يفرحك دوم بكل هو خير



مشاركة جملية ونتظر الاجمل

بليز وخر شوي
11-10-2003, 07:02 PM
العفو يالغالي

وهذي الكتابات من تشجيعكم ودعمكم ماننحرمششش :oops: