PDA

عرض كامل الموضوع : ماعرف قلبي الحب الا في هواك .. وصرت احبك



ملاك
19-10-2003, 10:26 PM
http://home.att.net/~scorh/Flower1k.gifhttp://home.att.net/~scorh/Flower1k.gif

ماعرف قلبي الحب الا في هواك .. وصرت احبك

لبرائة الذمة القصة مو لى وانا عجبتني وحبيت انقلها لكم

اتمنى ان تنال اعاجبكم
الجزء الاول

ليلة الجمعة كانت هادية جداً بعكس الظهر كان الكل مرتبش عشان صلاة الظهر واخواني وعيال اختي كانوا كلهم ناشين وياين من المسيد .. كان يوم الجمعة بالنسبة لي عيد لاني كنت اشوف الكل سعيد وفرحان .. ودايم نجتمع في مثل هذا اليوم احنا وعيال اختي وبنت عمي وعيالها واخواني وعيال عمتي.وعماتي لان حنا كنا نسكن بنفس الحوي احنا وعمي سيف اللي كان عنده راشد وناصر واحمد وشما ومها .. وكان اكبر من ابوي بكم سنه وهو كبير العايله بعد يدي راشد, كانت شما متزوجه راشد ولد عمتي مديه وعندها خالد ومريم اما مها كانت مخطوبه لولد خالتها علي اما راشد كان اصغر منهم وبعده ناصر واحمد وفي نفس الحوي كان بيت يدي راشد كان يسكن فيه عمي عوض وولد عمهم منصور وكانوا في عمر راشد ولد عمي سيف. رغم اني مرتاحه اللحين وسعيده بين امي وابوي الا ان ذكريات الماضي كل مامرت تذبحني الف مره ..
استرجع الماضي قبل ست سنين ... ايام ما كانت اليازيه الله يرحمها معانا .. كنت وقتها 14 سنه .. واليازية كان عمرها 16 و كنا انا وهي في مدرسه وحده كنت انا في اول اعدادي وهي في ثالث اعدادي .... كانت ملاك .. شعرها اسود فاحم وعيونها وساع ورموشها طويله وبشرتها مثل بشرة الاطفال الناعمة اللي مافيها اي شيء .. كانت اية في الجمال رغم مرضها اللي كلنا تعودنا عليه .. وكلنا تأقلمنا معاه .. لما كل اسبوع كانت تسوي تبديل دم .. كان هذا شيء مب غريب .. شيء عادي .. من حنا صغار وبالتحديد يوم كان عمرها 9 سنوات يوم اكتشفوا اهلي انه فيها مرض تكسر الدم ( السلاثيميا ) المرض الغريب اللي وقتها كان محد يعرفه كان عمري وقتها 7 سنوات وكنت اشوف ابوي وهو يدعي شوي ويصيح شوي .. وامي منهاره .. ومب رايمه تقول شيء اوتعترض على حمة رب العالمين وكان ابوي يصبرها ويوقلها هذا ابتلاء لازم نصبر يام مروان .. ..
كانت اليازيه تحب تحمل مسؤليتنا من يوم كنا صغار .. انا ومروان وعمر ومريم .. اما ميثوه فهي مالحقت عليها لانه يوم تتوفى كانت امي حامل فيها ... كانت اليازية .. طيبة وحنونه .. عمرها ماضربت اي حد فينا .. ولا هزبتنا على طولة لسانا عليها وكانت تحبنا وتعاملنا بكل طيب ومحبة انتبهت على صوت عمور اخوي اللي اصغر مني بسنتين
( ظبوي عندي بحث ممكن تسوينه لي )
( ياعمر المفروض انك تسوي بحثك .. بروحك وماتعتمد على حد فيه .. عشان المدرس ما يشك انه غيرك سواه)
( وهو شو بيدريه .. يعني بقوله اختي سوته )
( لا بس اسلوبي غير وانته اسلوبك غير )
( بتسوينه ولا لا .. )
( مابسويه .. شو يعني غصب هو )
( وين يا يازيو الله يرحمج من كنت اعطيج الكتاب كنتي تحلين لي واجباتي ) وهو فاج عيونه يبا يشوف ردة فعلي .. هني حسيت بغصه ماعرفت كيف ارد .. وشو ارد عليه بس سكت وسحبت عنه الاوراق وطلعت .. كان عمر دومه جذيه ويعرف انه اذا طرى اليازيه اني راح اسوي كل شيء له مب لاني اغار منها بس لانه اليازيه علمتني كل شيء .. احس احياناً انها امي .. او اكثر .. رغم وجود امي الا اني كنت ارتاح بالسوالف مع اليازية .. عن مدرساتي عن صديقاتي عن همومي ومشاكلي .. عن احلامي عن كل شيء في حياتي .. اليازية كانت غير في كل شيء حتى يوم تزوجت ماحسينا بفراقها لانه خذت راشد ولد عمي سيف اللي كان وقتها عمره 18 سنه وتوه مخلص ثانويه في البداية .. امي وابوي .. عمي ومرت عمي حتى عماتي .. وقفوا في ويهم .. ومع اصرار راشد اللي قالهم انه بياخذها بياخها لو شو سووا و اصرار اليازيه اللي كانت لاول مره احسها تعارض ابوي وامي في شيء .. وافقوا بالذات يوم قالت لهم اليازية انها ماتبا تموت وهي ماعندها عيال ولا عاشت مثل اي بنت فرحه الزواج ..
( بس يا بنتي .. خطر على حياتج .. شو تبين تذبحين عمرج )
( يا ابوي الله يخليك ويطولي بعمرك .. انا عارفه اني ماراح اعيش اكثر من اللي عشته وهذا كلام الاطباء .. مب كلامي )
كان ابوي وده يصارخ من غيضه بس هذي اليازيه .. بنته وعمره وفرحته اللي انطفت ويشوفها تذوي قدامه وده يسعدها ويفرحها لو مرة قبل لا تموت .. لانه عارف انها بالنهاية راح ينتهي كل شيء وغصبن عنه وافق وسوى لها عرس .. صغير على طلبها جمع فيه اهلنا وجيرانا بس .. كان كل اللي يشوفها يتحسر عليها .. كان الكل من داخله يتقطع عليها .. بس هي كانت اسعد انسانه .. واتذكر كلامها قبل يوم العرس عدل
( ظبوي تتخيلييني عروس بكرى لابسه فستان ابيض )
( ايه فديتج وليش لا وبعد راح اشوف عيالج )
( ظبوي ما اضن الدكتور قال مستحيل احمل مع هذا المرض )
( يزوي .. ماشيء كبير على الله )
( صدقج انا بدعي اني احمل كل ليلة عشان ايب لكم بنت تحل مكاني وماتنسوني )
(من قال احنا نقدر ننساج يزوي انتي اختنا .. والغاليه وبتظلين طول عمرج في قلوبنا مهما صار )
يمكن كنت انا الوحيده اللي اتكلم مع اليازيه بهذي الطريقة .. لانها ربتني جذيه .. علمتني اني اتاقلم على عدم وجودها بعد فترة .. وانا تأقلمت على كلامها ومناقشاتها اللي من هذا النوع ..
وبعد العرس انتقلت اليازيه بيت عمي اللي كان بنفس الحوي كنت احياناً لما تينا اليازيه اسمع امي تحذرها من الحمال .. وتقولها انه خطر عليها وعلى حياتها كنت ادري انه اليازية يوم كانت تقول لامي ان شاء الله كانت تقصد انه راح تسوي المستحيل عشان تحمل وراح تسوي اي شيء عشان تحس باحساس الامومه لو مره قبل لاتفارق الحياة ..

مع كل تحذيرات امها .. كانت تروح اليازيه وتتعالج بدون ما احد يدري .. وبعد فترة حملت اليازية والكل كان منصدم .. الكل كان يصيح وكأنه كان عارف انه نهايتها قربت .. كانت امي تهزبها وابوي اللي تم يضرب كف بكف ويقول لها ليتني مايوزتج .. ليتني منعتج من هذا العرس اللي بيدمر حياتي .. كان ابوي يحب اليازيه وايد .. لدرجه انه كان مايتخيل حياته بدونها .. كانت اليازيه عند ابوي شيء غير .. شيء لا انا ولا اخواني كلنا نسواه .. كانت اليازيه فرحته الحقيقة في وجود العيال .. كنا نعرف وكنا بعد كلنا نحبها .. لانه كنا ندري انه بينا يوم وماراح تكون هي موجوده معانا فيه .. مسكين راشد .. اللي الدنيا كانت مسوده في عينه من درى انه اليازيه حامل كان يطيح عند ريوها ويتم يصيح ويقولها ليش سويتي جذيه ليش .. كانت تطبطب عليه وتقوله كل شيء مقدر ومكتوب .. ومحد ياخذ في الدنيا الا نصيبه .. كنا لمن نشوفه .. نحس بعذابه اكثر من اي انسان .. اليازيه حبيبته وزوجته اللي متاكد انه بحملها راح يخسرها الى الابد .. وانه هو السبب في كل هذا لو ماتزوجها كان ماصار شيء وعشان جذيه حاول انها تتنازل عن حملها .. حلفها بربها انه تتخلص من الياهل .. وبالفعل وداها المستشفى بس الدكتور قاله حتى في الاجهاض خطر على حياتها لانه في بطنها توائم .. هذا الشيء خله راشد ينهار ..اكثر .. لانه تاكد انه خلاص مافي امل انه تعيش له بعد ولاتهم .. وكان مب متأكد من ولادتهم .. اه ياليازيه ليتج تين وتشوفين عيالج كم كبرو .. مشالله عليهم صاروا ريايل .. عبيد وسعيد اللي عشان تحسين باحساس الامومه لمره وحده ضحيتي بكل شيء ..لاجل ماتيبينهم ... كنتي عارفه انه في وجودهم راح يكون عدم وجودج معانا .. اهون بوايد لو ماتركتيهم لنا ..وبعد كل هذي السنين .. احس انه اليازيه بعدها معانا .. بروحها .. بكيانها .. باحساسها .. كان يوم وفاتها اكبر مأساة حقيقية عشنها في حياتنا .. كان بعد يوم جمعه .. بعد ماخلصت الاربعين باسبوعين وعيالها لهم شهرين .. كانت تعبانه وعلى طول كانوا ينقلون لها دم .. ذاك اليوم طلبت من السستر انه تشيل الجهاز لانها تحس انها بخير ومايحتاج ينقلون لها دم خلاص هي كانت تحس انها بخير .. نشت .. اغتسلت وتوضت .. صلاة الظهر .. ويات بيتنا بعد مايابتها السستر هي والبيبي عندنا على الكرسي المتحرك اللي كانت تقعد عليه لانه هي مافيها حيل تمشي خطوتين .. كنا كلنا مجتمعين .. وخاصه بعد ما تنساينا بشكل جزئي انه ممكن اليازية تروح عنا وكنا بالفعل يالسين نتكلم عن قوتها وعن اصرارها باحتفاظها .. بعيالها .. كان ابوي فرحان .. ويوم شافها يايه .. قام يهلي .. ويرحب

( هلا والله بشيخة البنات وعمري كله .. هلا بنور عيوني .. ليش يا بنتي قمتي من السرير كلنا كنا بني صوبج .. )
( لا يابوي مليت وتولهت على يسلتكم ولمتكم .. وولهت على امي .. )
( امج يابنتي فوق تصلي بروح ازقرها لج )
( لا مايحتاي .. انا بقعد معاكم .. ويوم تنزل بشوفها )
( براحتج يالغالية وانا كم اليازيه عندي )
( عمر مب تضرب عيالي يوم يكبرون .. ترى بخلي ابوي يضربك )
( طاع هاي عن منو تتكلم .. يازيوي هذولي بيبي ..وانا مستواي اكبر عن البيبي .. بعدين انا خالهم)
( ايه حط بالك عليهم .. اباك تاخذ بالك منهم .. )
( لا ما احب اربي يهال .. انتي يوم بتروحين يبي بشاكير )
( جب يا الهرم .. فال الله ولا فالك .. لاتخليني عمور اسويك مربيه حق عبيد وسعيد تراني اسويها )
( لا ابويه حرام عليك خل ظبوي .. انا ماعرف اربي يهال بعدين انا ماحب عيال ناس ثانين )
( صدق ماتسحي عمور اللحين عيال اختك عيال ناس غير .. صدق انك مب ريال .. نش من ويهي الساع لا امرغ العصى على ظهرك .. واداويك بملح عشان تصون لسانك عن اختك )
( اوووووه انا بسير العب بلي ستيشن احسن لي )
( روح راحت روحك ان شاءالله مدري على منو يايب هذا اللسان الطويل )
( لايابوي .. عمر توه صغير .. وانته شال عليه هالكثر )
( فديتج يابنتي اي صغير هذا ريال .. عمره 8 اللحين .. لين متى بيتم لسانه طويل .. متى بيتعلم السنع )
( يابوي بعده صغير ومشالله مروان اللحين ريال وتقدر تعتمد عليه )
( مروان سمعت اختك .. انته اللحين ريال مب كل ماقلت لك شيء قلت بعدني صغير )
( ان شاء الله يا بوي على امرك وامر اليازيه )
( ابوي احس بتعب بسير صوب غرفتكم ارتاح)
.. نش راشد عشان يوديها غرفة ابوي وامي .. اللي كانت تحت .. ابوي احيانا ماكان يروح فوق عشان ريوله فكان لهم هو امي غرفتين وحد فوق والثانية تحت .. وصلها راشد وعدلها السرير .. عشان ترقد لين ماتنزل امي عشان نتغدى كلنا .. مع بعض .. كان راشد حاس من الصبح بقلبه مقبوض بس ماحب يضايق حد ..
( غناتي اوديج المستشفى عشان نتطمن عليج )
( لا يابو عبيد ماودي اروح من هني خلني ابي اشم ريحة امي وابوي في هالغرفة .. تصدق تولهت على البيت وعلى امي وابوي كاني كنت عايشه في مكان ثاني )
( فديت روحج لاتقولين جذيه .. احنا كلنا وياج طول الوقت واذا تبين اني هني نسكن ماعندي اي مانع )
( راشد قرب صوبي .. )
( من عيوني ) وقرب راشد صوبها .. مسكت راسه بيدينها وتمت توصيه على عيالها ..
( راشد عيالي ياراشد خل بالك عليهم .. انا ضحيت بعمري عشانهم )
( حياتي شو تقولين انتي .. عيالي في عيوني وانتي اللي بتربينهم )
( ماضن ياراشد اعيش قد اللي عشته وبي يوم ماراح اكون هني )
تغير شكل راشد وعيونه حمرن .. وشو بتدمع عينه ..
( حياتي شو فيك شيء يعورج .. قولي لي .. بأذن الله بتقومين بالسلامه وبذكرج في هذي الايام .. )
( مافيني الا الخير يالغالي . راشد تدري كم كثره احبك .. كثر عمري اللي عشته واللي بعيشه .. بعد)
( راشد الله لايحرمني منج الغالية ويلومني يوم وقفت في ويهم عشان اتزوج )
( راشد لو مت بتتزوج غيري)
( لاتقولين جذيه قلبي ياعل يومي قبل يومج .. وين اقدر اعيش دونج )
( لا راشد انا اباك تتزوج )
( ياحياتي لاتقولين جذيه انا ما اريد حد غيرج انتي .. )



__________________

http://home.att.net/~scorh/Flower1k.gifhttp://home.att.net/~scorh/Flower1k.gif

ملاك
19-10-2003, 10:28 PM
http://home.att.net/~scorh/Flower1k.gifhttp://home.att.net/~scorh/Flower1k.gif

( راشد اذا صار بي شيء انا اباك تتزوج اختي ظبية .. هي انسب وحده لك .. واباك توعدني )
( انتي شو تقولين انا قلت لج مابا غيرج انتي وبس )
( راشد اوعدني وريحني قبل لا اموت)
راشد عشان بس يريحها ويسكر الموضوع .. قالها اوعدج وبعدين طلبت عيالها تبا يرقدون عندها راح ياب الصغار ورقدهم عندها وبعدها تركها عشان يروح يشوف عمته وين .. راح صوبهم في الصاله يسال عن عمته ..ولقاها توها نازله راح صوبها سلم عليها وقال لها انه اليازية تباها في غرفتهم اللي تحت .. راحت امي صوب اليازيه اللي كانت راقده وهي حاضنه سعيد وعبيد .. فماحبت تقومها عشان ترتاح ويوم بتنش بحطون لها الغداء ..
راحت صوبهم في الصاله ونشوا راحوا يتغدون

انا ماكان لي خاطر في الاكل وقلت بروح اشوف اليازيه واليهال ..وخاصه اني ماشفت امي عشان اسئلها اذا قالت حق اليازيه بتتغدى ويانا او لا ..
دخلت شوي شوي .. ورحت قعدت عدال اليازيه .. كنت ابا اسئلها اذا تبى غداء .. ناديت عليها بصوت واطي بس هي ما ردت .. قعدت امسح على شعرها يمكن تحس .. وماردت علي ابد ولا حتى فتحت عينها .. نش سعيد يصيح من الرقاد شليته بسرعه عشان ماينشش عبيد .. وعطيته حليبته ورقدته على الكرسي .. رحت صوب اليازيه مكان ما كان راقد سعيد ورقدت جنبها .. وحاولت اني اقوها بس كانت يدها بارده ثلج وويها مستوي ابيض .. كانه مافيه اي حياه .. حسيت انه فيها شيء .. نشيت شلت عبيد عنها .. وحطيته على الكرسي ورحت صوب القرآن وقعدت جنبها اقراء سورة البقرة .. يوم خلصت كم صفحة حسيت باني لازم اسير اخبرهم .. كنت اعرف انه الانسان يوم يموت تصير له نزعه في الروح وممكن اللي معاه يشوفونها بس ماحسيت انه اليازيه نازعت الموت يمكن لانها قالت لي قبل انه اذا ياها الموت بتروح وياه بدون ماتقاوم لانها تدري انها بتموت في النهاية.. وكنت دايماً اسمع رمستها وتعلمت اني اكون قويه لانها هي اللحين محتاجه اني اكون قويه في هذا الموقف .. شليت سعيد ووديته فوق حجرتي .. ورجعت شليت عبيد .. كنت من داخلي احس اني اتحرك مثل آله .. ماياني اي احساس لا بالحزن ولا باي نوع كل اللي كنت اسويه وكأن اليازيه هي اللي كانت توجهني مثل كل مره .. وبعدين رحت صوب البشكارة وقلت لها تروح تقعد ويا الصغار .. واذا نش تعطيهم حليب لاني سويت لهم حليب وجهزته .. وهم من النوع الهادي ماينشون الا كل وين وين .. نزلت تحت لقيتهم بعدهم يتغدون .. سالت امي ..
( امي رحتي لليازيه تقولين لها تتغدى ويانا )
( هي يابنتي بس هي راقده مع عيالها ماحبيت ازعجها )
(انا بسير اسئلها اذا تبى غداء)
( لا راشد انا توني كنت عندها ولقيت الصغار يصيحون شليتهم وديتهم عندي في غرفتي .. عشان ترتاح اليازيه )
كان وقتها ابوي مخلص غداء وراشد بعد .. ناديت راشد وقلت له تعال بقيت شوي طلبات للصغار
( الله يهديج يابنتي .. يعني حنا مقصرين عليهم في شيء )
( لا ابوي بس في شيء الدريول مايعرف يبيه )
المهم رحت انا وراشد شوي على صوب وخبرته انه اليازيه ماترد علي وانه لازم نتصل بالدكتور .. كنت اقوله وكان مافي اي شيء مب طبيعي .. وقلت له ارجوك لا تسوي شيء ممكن يحسس ابوي وامي انه اليازيه بها شيء وبالفعل طلع راشد بسرعه صوب الدكتور وراح ايبه .. اما امي وابوي متعودين يرقدون عقب الغداء فراحوا فوق .. اما انا فكنت قاعده جنب اليازيه .. ومروان اللي اكبر من بسنه .. ويالسين ندعي انه لها .. بعد اقل من نص ساعه كان راشد ياي ومعاه الدكتور .. ويوم كشف عليها لقى انها متوفيه ... هني راشد مارام يقول شيء وراح يركض صوب بيت عمي .. مروان كان يصيح ويوم شافوه مريم وعمر تمو يصيحون وياه اما انا فتملكت نفسي ورحت وصب امي وابوي كنت ادري انه امي حامل ما خليت حد يروح غيري فوق .. دقيت الباب على ابوي وامي اللي كانوا للحين يالسين .. سمعت ابوي .. يقولي تعالي ظبيه .. دخلت عنده الحجرة .. وكنت متماسكه اكثر من اي وقت .. رحت صوبه كان يقراء الجريده .. حبيته على راسه ولويت عليه .. وقتها بس تركت دموعي تنزل كانت علاقتي بابوي قويه .. هني ابوي .. سالني شي في اليازيه .. قلت له عطتك عمرها .. ابوي بسرعه ركض تحت اما امي ماتحملت الخبر ومارامت تمشي .. قعدتها على الفراش .. كانت تصيح من خاطرها وكنت اصيح معاها واحاول اني اسكتها وكل ماشفت دموعها حسيت بمليون طعنه في قلبي .. وكل ما اتذكر اليازيه وانها خلاص من بعد اليوم .. ماراح تكون ويانا .. كنت اموت الف مره ..
ابوي بعد ماشاف الدكتور ومروان تاكد انه الكلام صح راح غرفتها وتم يبوسها عبى راسها يترحم عليها ويقولها انا راضي عليجي يابنتي .. دنيا واخره .. انا راضي عليج وتم يدعي الها .. كان الدكتور اتصل بالاسعاف عشان موضوع الدفن والاجراءات وكل شيء .
بعد ماهدت امي شوي قلت لها بننزل تحت .. وبالفعل خذنا شيلنا ورحنا تحت شفنا عمامي وعيال عمي ومرت عمي اللي تلقفت امي من على الدري وتمت تصيح وياها .. كنت اشوفهم الكل يصيح على اليازيه .. كنت اصيح وياهم بس كنت احس انه اليازيه للحين هني .. بعد يومين من العزاء .. ماشفنا ريلها ابد .. وخاصه مع اليوم الثالث من العزاء ومن كثر ماتعبت امي .. ياها الطلق وراحت المستشفى وربت ويابت اختي ميثوه اللي كانت تشبه اليازيه وايد .. فوجودها ووجود عيال اليازيه خله البيت يهداء بسرعه ويتأقلمون على عدم وجود اليازيه ..
اما راشد ريل اليازيه بعد وفتها بكم يوم ويوم سمع انه امي ربت تطمن على عياله وشل ثيابه وقرر انه يروح يدرس برع .. .. لانه كان ماخذ الثانويه يوم يتزوج اليازيه وموتها خلاه يعوف كل شيء في حياته وفي البلاد ويسافر .... وفي البداية كانت امه دوم تصيح وكان ابوه وابوي دوم يتصلون له عشان يرد بس هو مصر انه مايرجع .. بس بعد كم سنه لمن كبروا عيال اليازيه لهت فيهم .. وحتى احنا لهينا فيهم .. ونسينا راشد وانه متغرب .. صار له كم سنه .. وضع بيتنا الان مستقر ... وحياتنا احلوت بوجود عيال اليازيه .. رغم الجرح اللي في قلوبنا على وفاة اليازيه الا انه عيالها ملو علينا جزء من الفراغ اللي سببه غيابها ..
بعد صلاة المغرب سمعت ابوي يناديني .. رحت صوبه .. كان قاعد مع امي وعيال اليازيه وميثوه .. يته وسلمت عليه هو وامي .. التفت صوبي
( ظبية انتي اللحين مب صغيره .. وعمتج ام راشد كلمتني تباج حق ولدها ابراهيم .. )
( ابوي انا مالي شور بعد شورك سوا اللي انته تامر به )
( بارك الله فيج .. لو ماشفت اليازيه قدام عيني الله يرحمها وهي متوفيه قلت للحين هي عايشه قدامي خلاص بشاور عمج اذا حد من عيال عمج يباج وبعدين برد خبر .. على ام راشد .. )
يمكن الشبه اللي بينا انا وهي يخلي ابوي احياناً يغلط ويناديني اليازيه .. كنت احيانا اتضايق لانه انا لي وجود وكيان بس ابوي يشوفني اليازيه .. بس كنت مابين له وخاصه انه كان يفتقدها ..
كان ابراهيم ولد عمتي مديه .. اكبر مني بسنتين .. واخر سنه له في اداراة الاعمال .. قبل سنتين شافني في عرس اخته مها وكلم امه تخطبني له ..
ماكانت احس باي شيء ولا كنت مهتمه في الموضوع لاني كل اللي اعرفه عن ابراهيم انه انسان زين .. وبس ..
راح ابوي صوب اعمامي سيف وعوض .. ومنصور .. وخبرهم .. عن ابراهيم .. عمي يوم سال عياله كلهم ارخصوه ولا حد قال شيء بالعكس امدحوا في ابراهيم وفي اخلاقه وعلى هذا الاساس وافق ابوي .. وتمت الخطبه على اساس من اخلص الكليه نتزوج ويكون ابراهيم اشتغل واسس له بيت ..

نهاية الجزء الأول



__________________

http://home.att.net/~scorh/Flower1k.gif
http://home.att.net/~scorh/Flower1k.gif

ملاك
20-10-2003, 02:35 PM
http://home.att.net/~scorh/Flower1k.gifhttp://home.att.net/~scorh/Flower1k.gif

الجزء الثاني




وفي يوم كنا كلنا مجتمعين نشوف التلفزيون ... وعيال اليازيه قاعدين عندنا ويصارخون ويلعبون مع ميثوه .. سمعنا حد يدق باب الصاله .. بقو .. نش مروان بيفج الباب وانا وامي ومريم عدلنا شيالنا .. كان اللي داخل راشد .. بسرعه قام له ابوي ولوى عليه.. وقربه ..وسلم على امي وبعدين سلم على مروان وعمر .. وبسرعه راح صوب سعيد وعبيد اللي تموا يصيحون من شافوا ابوهم اللي من يوا لهذي الدنيا .. ماقد شافوه.. كان الكل متأثر راشد وعياله وابوي وامي .. وبعد ماهدى الوضع .. التفت علي راشد وهو متشكك يقول اليازيه .. هني امي قالت لاه ياولدي هذي ظبية شو نسيتها .. لا عموه بس مشالله كبرت والله تحسبتها اليازيه الله يرحمها .. هني الكل سكت .. بعد شوي قام يتخبره ابوي عن درساته وعن حياته في الغربه .. قال لابوي انه توه خلص بكاريوس وخاصه انه تم سنه ماقدر يدرس وبعدين درس لغة وخلص اربع سنين في هندسة الطيارات ورجع .. ..
ابوي .. تم شوي يعاتبه انه طول الفترة اللي مضت ما رجع يشوف عياله بس كان راشد مايرد ويحاول انه يتهرب ..
( شو راشد راجع نهائي ولا بعد في شيء مادرسته ) وابوي كان يبتسم
( لا عمي قررت استقر وابني بيتي واخذ عيالي يعيشون عندي )
ابوي تغير شكله .. حس انه صدق اللحين بيفقد اليازيه .. ورد
( ليش ياراشد حنا في شو قصرنا )
( لا ياعمي .. مب موضوع قصور بس انته عارف انا ودي بعيالي يعيشون تحت نظري .. ولا انته ماتباهم يتربون عندي)
( والله يا بوسعيد .. انا ماعرف شو اقولك هم عيالي وانا ماحس بفرق بينهم وبين عيالي اللي يبتهم من دمي هم عيال الغالية الله يرحمها )
( ياعمي انا مابشلهم اللحين اول خل يجهز البيت وتالي .. نشوف كيف بنسوي )
( وين ناوي تبني )
( هني في الحوي ... ابوي قال انه بيت يدي كبير وصار قديم وراح نهشه ونسوي فلتين وحده لي والثانية حق عمي عوض)
هني ارتاح ابوي لانه عيال اليازيه مابيفارقونه وخاصه انه عمره ماحس في لحظة انه مب ابوهم .. وغير جذيه هم عيال الغالية ..
استاذن راشد من عند ابوي وطلع صوب بيتهم بس قبل لا يطلع التفت علي وقال مع السلامه ظبية .. ما كنت اعتقد انه راشد اصلاً يهتم لوجودي .. شو ياه مره وحده لايكون يعتقدني هو الثاني اني اليازية ...
بعد كم يوم زارنا راشد .. وكان يايب العاب حق عياله سعيد وعبيد .. ودخل الصاله ومحد كان غيري .. يالس .. بسرعه حطيت الشيله .. وسلمت عليه وقربته ورحت بنادي ابوي .. بس راشد ماخلاني ولا عطاني فرصه .. وقالي تعالي ظبية بغيتج في كلمة ..
رحت صوبه وناديت البشكارة تيب دلل الشاي والقهوة .. صبيت له فنيان قهوة وقعدت ..
( مب عارف شو اقولج يا ظبية .. ادري اني تركت عيالي هني وماسالت عنهم بس موت اليازيه اثر فيني وايد )
(راشد اليازية اثرت فينا كلنا )
( عارف يا ظبية انج انتي اللي ربيتي سعيد وعبيد .. وانهم متعلقين فيج .. ومرات يزقرونج امايا)
( تدري يا راشد سعيد وعبيد انا اللي ربيتهم امي كانت عندها ميثوه .. وماكنا نبا نزيد عليها .. واليازية كم وصتني على عيالها)
( عشان جذيه بغيتج في موضوع .. ودي بعد ما نبني البيت اتقدم لج .. لاني مابلغى ام لعيالي مثلج انتي خالتهم وفي حسبت امهم .. )
الصراحه انصدمت من كلام راشد .. شو الدنيا لعبة عشان ربيت عياله .. يبا ياخذني .. شو بشكارة انا عنده .. انا مب انسانه مثلي مثل اليازيه الله يرحمها ومثل كل بنت ودها تتزوج وتفرح وتحس انها ملكت قلب زوجها .. نشيت بسرعه وهو كان ينادي ورحت غرفتي ..
عمري ما كنت اتخيل راشد بهذي القسوة .. معقوله موت اليازيه خلاه يصير جاسي وبلا قلب .. معقوله صاروا الناس عنده ولا شيء بعدها .. على الاقل يراعي شعوري .. يراعيني .. يراعي كرامتي اللي مسح فيها الارض .. اليازيه كانت بالنسبة لي عمري لكن مب معناه اني الغي وجودي عشان اي انسان حتى لو كانت اليازيه .. وفجاءة تذكرت ابراهيم .. هيه انا مخطوبه لابراهيم وبسرعه رحت يبت الدبله و لبستها كنت ابا احس اني ملك لاي شخص الا راشد .. كنت خايفة منه وايد انه يدمر خطوبتي من ابراهيم عشان انانيته .. مع اني عمري ماشفت ابراهيم ولا عمري كلمته وكل شيء كان يوصلني اما من اخته ساره اللي كانت تدرس معاي في نفس الكليه .. او من اخوي مروان الا اني عمري ماكنت اتخيل انه في انسان بهذي القسوة مثل راشد .. كنت وايد خايفه من هذا الموضوع وكنت متردده اني اقول لاي شخص عنه .. بس شو اسوي اللحين

بعد تفكير ... تذكرت حمده ربيعتي هي الوحيده اللي ممكن اشتكي لها عمي وافضفض من اللي فيه ...
... رحت اتصلت فيها ..
( الو )
( هلا ظبوي اشحالج .. واشحال سعيد وعبيد )
( كلهم بخير وسهاله دوم يسالوني عنج يقولون وين خالوه حمده من زمان ماشفناها )
( تعرفين انه امي مريضه ما اقدر اسير مكان فديتها ماحد يجابلها غيري .. )
( الصراحه يا حمده حاسه بضيقة العالم كله .. جدام عيني )
( بسم الله عليج شو ياج مره وحده ماحيدج يا ظبية جذا .. اللي اعرفه انج قويه )
( ياحمده شو اقولج .. تعرفين راشد ريل اختي اليازيه اللي يرحمها )
( ايه سمعت منه عنج .. انه متغرب )
( ايه من يومين رجع .. ويانا البيت )
( ايه شو فيها عادي ولد عمج ويزوركم شو استوى ..)
( ماصار شيء بس تعرفين شو يبا )
( لاتقولين انه يبا يشيل عياله .. والله حرام عيله طول هذي الفترة ماكان يدري عنهم
وهو مسافر ويوم شبع رجع قال بيشلهم .. صدق انه ماعنده مذهب )
(ياريت على جذيه ياحمده اليوم لقيته في الصاله يايب اغراض حق عياله .. وقالي اباج في موضوع قالي انه هو يدري اني ربيت الصغار وانهم في حسبة عيالي وانه وده ياخذني عشان اربي عياله)
( ششششششششششو اسمع هذا جيه الدنيا لعبه .. ولا مافي ريال غيره شو يتسحب انج بايره ولا عشان ربيتي عياله صرتي ام خلاص .. وبعدين اللي اعرفه انج مخطوبة لابراهيم ولد عمتج وش اللي صاير)
( يا حمده هذا ولد عمي يعني لو يقولهم اباها محد يروم يقول له لا .. ولو وده يقدر
يخليني جذيه لين اعنس لا عرس ولا عيال ولا شيء )
( هي انتي اصلاً ماتيوز خطبته على خطبة ولد عمتج في الاسلام حرام )
( ليش هو يعرف الحرام يوم قالي انه بياخذني عشان اصير مربيه لعياله .. والله انه كرهني في اليهال ..والسبه كلامه السم)
( فديتج ولا تهتمين وبعدين انتي ليش سكتي قولي له انج تحبين ابراهيم .. ومابتزوجين غيره.. والريايل يا بنتي بعد عندهم كرامه ومستحيل ياخذج بعد مايعرف انج تحبين ابراهيم )
( تصدقين فكرة .. انا بروح تحت بشوفه اذا هني بقوله عن الموضوع )
( ياله وردي لي خبر)
( ان شاء الله مع السلامه )
رحت بسرعه لبست شيلتي ونزلت تحت .. لاني كنت ابا اشوف راشد واخبره بالموضوع قبل لايوصله لابوي وعمي ومانخلص من سالفتهم .. يوم نزلت لقيت امي وابوي وراشد يالسين يسولفون .. وراشد يلعب مع سعيد وعبيد راكب فوق ظهر ومسوينها يوله وحشرة وميثوه لانها تخاف من راشد .. ماكانت تقرب صوبه .. خاصه انه بعد مارجع من السفر كان شكله غير .. طول وجتوفه اعرضوا وايد وجسمه تغير .. اللي يشوفه يتحسب انه من كمال الاجسام .. يت وسلمت عليهم .. ويلست ..

( الا ماقلتي لي ظبية انتي في اي سنه في الكليه)
( بروح سنه ثالثة .. وبقى لي سنتين واتخرج .. )
( شو تخصصج)
( ادارة اعمال )
( حلو يعني ناويه تصير بسنسن ويمن )
( اي بسنسن ويمن اصلاً من تخلص الكليه بسلمها لابراهيم عاد هي تتفاهم وياه )
التفت راشد صوب ابوي وهو مستنكر الموضوع
( اي ابراهيم عمي ليش ظبية عرست )
( لا يا ولدي ظبية مخطوبه حق ابراهيم ولد عمتك مديه وعرسهم ان شاء الله بعد سنتين يعني بعد ماتتخرج )
( محد خبرني عمي )
انا هني كنت بموت من الزياق ... اكيد اللحين بيقول له لا انا ولد عمها واحق .. يالله شو هالسالفة ... شو اسوي بس .. شوي والا عمر داخل .. من الباب يه يسلم .. وقعد ..
( راشد امريكا حلوه)
( الصراحه امريكا حلوه .. بس مايبالها يهال)
( طالع هذا انا مب ياهل انا السنه ثانويه عامه ومقدم على بعثه وبروح امريكا .. شو يمدحونها الشباب )
( والله هي من ناحية حلوه .. الا فوق الحلوه .. بس الدراسه يا حضرة الريال الكبير يبالها التزام ويبالها صبر )
( ومن قال اني مابصبر ... اصلاً انته ماصبرك الا تبا الفكاك من تربية عيالك)
( قم قام صلبك .. انته ماتستحي تكلم ولد عمك جذيه .. هو اصغر عيالك يالس تحاسبه )
( انتوا اللي يقول الحقيقة عندكم .. ضايع ... اوووووووووووووف متى اتخرج واسافر وافتك من همكم )
( اذلف غرفتك مابا اشوفك .. صدق انك مب ريال )
راح عمر حجرته بس انا كنت مرتاحه لانه غير جو الغرفه .. والموضوع تغير .. وانا عشان ما اعطي راشد فرصه يتخبر ابوي .. قلت له انه موعد دوه ولازم يروح يرتاح .. قامت امي وراحت وياه غرفتهم اللي تحت عشان تعطيه دواه .. لانه من سنتين وهو مايقدر يصعد فوق فتحولو تحت نهائي
راشد تم .. يطالعهم لين دخلوا الغرفة .. واول مادخلوا .. التفت علي
( ليش ماقلتي لي مساعه انج مخطوبه)
( انته ماعطتني فرصه ولا سالتني )
( وليش محد خبرني قبل )
( ليش انته كنت تسال عن حد)
( انا كنت ادرس ومب متفيج اتخبر عن كل واحد خطب )
(خلاص عيل هذا اللي صار )
( لا ماصار ولا بيصير)
( ليش )
( انتي بنت عمي ..وانا احق من اي واحد )
( بس ولا واحد من اخوانك اعترض ليش انته تعترض )
( كيفي .. وابراهيم هذا ماراح ياخذج فاهمه)
( باخذه يعني باخذه ... وبعدين حنا نحب بعض ) يوم قلت هذي الجمله ماكنت ادري اني راح اسبب لراشد موجه عصبية بهذا الحجم..
( حبتج قراده .. انتي وياه .. تخسين لابتاخذين ابراهيم ولا بتاخذين غيره واشوف منوا بيكسر كلمتي .. على اخر الزمن انتي الياهل تردين علي وعشان منو عشان برهوم )
انا ماتحملت غروره .. واسلوبه المتكبر هذا .. معقوله ياليازيه كنتي تحبين هذا المغرور .. معقوله هو نفس الشخص اللي وقف في يوم في ويه ابوي وعمي عشان يتزوج .. معقول .. لا شو اللي صار .. ليش تغير راشد جذيه ليش .. وانا شو سويت له عشان يعاملني بكل هذي القسوة ..

في بيت ابو راشد

اسغفر الله العظيم انا شو سويت .. والله انها ماتستحق كل هذا اللحين هذي الانسانه اللي ربت عيالي اسوي بها جذيه .. هذي وصية اليازيه .. الله يلعنك يا ابليس .. الله يلعنك .. خلني اروح صوب ابوي وامي واتخبرهم عن الموضوع احسن .. يوم دخلت لقيت امي واختي شما .. ومهاوي .. كل وحده عندها عيالها يوم شافوني يو يركضون عدالي .. خالي راشد خالي راشد .. شلتهم وبستهم .. وعطيتهم الحلاوه اللي كانت عندي ورحت صوب امي وسلمت عليها وعلى خواتي ..
( راشد مب ناوي تعرس .. ياني بزوجك وحده شو تقول للقمر قم واقعد محلك )
( لا مب ناوي اعرس .. وبعدين من بترضى تربي سعيد وعبيد ولا نسيت انه عندي عيال)
( والله انته اللي مب مفتكر مسافر 6 سنين ولا فكرت فيهم مره)
( بس مهاوي يوزي لا اترك لكم البيت واطلع ذليتوني من رجعت من السفر .. انته تركتنا ست سنين وتركتنا ست سنين .. شو كنت العب يعني كنت ادرس , وبعدين بعد وفاة اليازيه ماكان لي نفس في اي شيء )
( بس الحي ابقى من الميت )
( اسمعي كلمه زياده مهوي والله لا انتي اختي ولا اعرفج )

__________________


http://home.att.net/~scorh/Flower1k.gifhttp://home.att.net/~scorh/Flower1k.gif

ملاك
20-10-2003, 02:49 PM
http://home.att.net/~scorh/Flower1k.gifhttp://home.att.net/~scorh/Flower1k.gif


( خلاص حقك علي اسفة .. ) نشت حبتني على راسي تتحسب انه هذا الشيء خلاص بيرضيني ... ماتدري بالنار اللي قادتها اليازيه في قلبي يوم تركتني وراحت .. ليت حد يحس بقلبي اللي مالقى الحنان والحب الا عند اليازيه .. اه ياليازيه .. ليش تركتيني .. ليش ماخذتيني معاج .. انا من يباني غيرج .. انتي كنت كل حياتي كنت كياني .. وروحي .. كنت هوى اتنفسه .. نشيت من عندهم .. خذت سيارتي .. ورحت صوب البحر .. الله يالبحر ياما يسلت يمك وانا احلم باليازيه زوجه لي .. ياما شلت همي يوم ماتوفت محد سمع شكواي غيرك .. وتذكرت اغنيه ميحد اللي كانت بالنسبة لي سلواي ..ورحت صوب السيارة وحطيت الشريط ..
(( يوم افكر واستعيد الذكرياتي .. يالضنا ذكرى ليالينا الخوالي ..ذكريات في فوادي راسخاتي .. كل ساعه ذكركم يخطر على بالي ..
ياريم شط النيل دجله والفراتي يازهر يا عناب يا كرم العلالي اذكر زماناً مر وتقضى وفاتي.. ذكراه في قلبي ولي دايم على بالي ))
ماكنت احس بالدموع اللي غطت ويهي كنت اسمع اليازيه وهي تردد هذي الاغنية .. كنت اموت واحيا .. كنت اشوفها تموت قدامي يوم بعد يوم .. انا السبب كنت انا السبب لو ماصريت .. على اني اتذوجها جان ماحملت وكانت بتعيش .. استغفر الله .. يارب ارحمني وش اسوي في حياتي مالي اي حياة بعدها .. كيف اقدر اعيش بدونها .. سامحيني يا اليازيه يوم يت بنفذ وصيتج .. اختج حبتلها شخص ثاني .. سامحيني يا الغالية ..
قررت اني ارجع امريكا .. كنت ادري انه بيصير فيني جذيه .. بس ماكنت متوقع انه حياتي بتكون بعدج فراغ .. رجعت البيت سلمت على ابوي وامي .. وخبرتهم انه الجامعه هناك .. قررت تطرح ماستر .. وانا كنت انتظر هذي الفصره ..
( يابوك انا كبرت ومحد هني .. من بيجابل امك وخواتك )
( ابويه كلها سنه وانا راد وبعدين انته شباب ..)
( ياولدي محد ضامن عمره هلايام .. )
( يابوي .. الا سنه .. ولا تحط في بالك .. برد بسرعه )
كنت اقول لابوي هذا الكلام وانا عارف اني ماراح ارجع هني .. ولا راح ارد الامارات مره ثانيه ..
لانه الامارات معناها اليازيه .. وهي مب موجوده شو يخليني ايلس هني ..
كنت ناوي امر بيت عمي اطالع عيالي بس .. مابغيت اشوف ظبية اللي من اشوفها جسمي كله يقشعر واحس انه اليازيه ردت للحياة .. مدري ليش كل ماقعدت معاها حسيت اني يالس ويا اليازيه .. من كثر خوفي اني انسى انها ظبية خايف اي يوم وانسى نفسي وازقرها اليازيه .. خايف اني اعيش حلم وجود اليازيه مره ثاني في حياتي وبعدين افقدها .. انا لازم اطلع لازم اسافر .. مالي قعده في الامارات دقيقة .. وكان هذا قراري .. وبعدها دخلت حجرتي عشان اجهز شنطتي .. واغراضي ..



************************


احساس بالوحد وبالفراغ بدون وجود اليازيه .. خلاني احس بالضياع .. كانت دوم اليازيه توجهني .. تنصحني اليوم محد جنبي حتى امي لو درت شو راح يكون رد فعلها هي وابوي .. معقوله يغيرون رايهم عن ابراهيم ويزوجوني راشد .. لا انا ماباه .. ليش ياربي .. انا شو سويت ..
قمت ورحت صوب الانترنت .. الشيء اللي كان يسليني دخلت على موقع الاشعار .. وتميت اقراء قصايد .. منها اللي اثر بي ومنها اللي ماعجبني .. واحياناً كانت سالفة راشد ترجع وتخليني اعوف كل شيء .. ياربي ليش ماخذتني وخليت اليازيه .. استغفر الله ..
كان تلفوني يرن .. يوم رحت صوبه .. لقيت حمده متصله بس مابغيت ازيد همي بكلامها اللي يحسسني بالضعف .. مارديت .. ويوم سكرت اغلقته ..
ورحت صوب سعيد وعبيد غرفتهم عشان اطمن عليهم وبعدين رجعت غرفتي .. حاولت ارقد بس ماطاع يني نوم .. قلت برجع النت مره ثانيه .. دورت صفحه الشات اللي كانت تمدحها لي حمده .. بعد فترة لقيتها و دخلت عليها .. مالقيت حد من ربيعاتنا بالكليه اللي كانت تطريهم حمده ويوم يت بظهر .. لقيت واحد مرسلي مسج .. يقولي ممكن نتعرف ومرسلي رقمه .. قلت خلني شوي اسوي به مقلب عشان يتعلم مايرقم بنات الناس .. وحطيت رقمه في البابلك وتم يسبني .. كنت اضحك على تصرفاته الصراحه .. يعني يوم هو مب قد الشيء ليش يسويه .. بس بعد انا لقيت من يسنعني .. كانت قوانين الشات انه اي شيء خارج الادب معناها اوت .. حاولت ادخل بس ماطاع يدخلني .. قمت ارسلت حق الاستاف المشرفين على الشات .. ماكان اي حد موجود .. لقيت اسم دمعة حزن .. قمت وارسلت لها ايميل عن الموضوع ,, قلت بالمره ابا اصير عضوه .. يعني عشان محد يسوي لي كك اوت .. وخلصت الرساله وارسلتها ..
سكرت النت ورحت ارقد .. وشوي نطت كل الاحداث اللي صارت .. حاولت اني ارقد واتناسى كل شيء وبعد جهد قدرت اطرد كل شيء من بالي وارقد ..

نهاية الجزء الثاني

__________________

http://home.att.net/~scorh/Flower1k.gifhttp://home.att.net/~scorh/Flower1k.gif

ملاك
20-10-2003, 03:06 PM
http://home.att.net/~scorh/Flower1k.gifhttp://home.att.net/~scorh/Flower1k.gif

الجزء الثالث


كان السهر متعبني .. بس كان لازم انش اروح الكليه .. مابقى شيء على نهاية الكورس الاول ولازم اسير عشان مايعطوني غياب .. قمت من النوم .. ورحت عشان استعد للكلية .. وانا البس سمعت صياح سعيد بصوت عالي .. وانا ما اتخيل حد يضرب سعيد لانه كان مثل اليازيه في طيبيتها واخلاقها على انه صغير الا انه كان وايد متطبع بها والكل كان يدري بهذا الشيء بسرعه فتحت الباب لقيت سعيد مندس تحت الطاولة اللي قرب حجرتي .. ويصيح ..
( حبيبي سعيد بلاك .. من زعلاك . عمر ولا ميثوه)
( ماشي )
(ياعمري تعال عند ماما ظبية ولا بتخش علي ) ولويت عليه وهو يقول
( ماما بابا راشد تحت وقال لهم انه بيسافر امريكا )
(لا ياحبيبي هو يمزح وياك .. بس يبا يعرف غلاته عندكم )
( لا ماما انا شفت التذكرة وقال انه بيرجع عقب )
انا انصدمت الصراحه معقوله راشد يسافر وبهذي السرعه هو ماصار له الا اسبوع من يانا .. ليش سوى جذيه ليش .. قلت في خاطري بكمل لبسي وبشوف شو السالفة .. دخلت سعيد معاي الحجرة اللي ربع صوب سريري يبا يرقد عليه .. وخاصة انه سعيد كان صف الاول وكان عنده اجازة .. هو وعبيد وميثوه ..
بسته وطمنته وطلعت من الحجرة وانا رايحه تحت .. لقيت مريم متلبسه ونازله عشان تروح المدرسة .. مريم اختي كانت في ثالث اعدادي ...
( شو متى امتحاناتكم )
( بعد اسبوعين .. قالت المس احضروا .. في هذي الفترة وراح تعطينا امتحانات تجريبية )
( وشو استعداداتج .. شو متوقعه)
( والله يا ظبية خايفه من الانجليزي .. انتي تعرفين اني ما احبه .. )
( انتي في ثالث اعدادي وتقولين جذيه انا شو اسوي اللي دراستي كلها انجليزي )
( ياربي ليش مايلغون الانجليزي ونفتك )
( ها ها ها ها والله انج قصة ..) انا نسيت وجود راشد تحت .. وكنت ماخذه راحتي ... واضحك مع مريم .. وانتبهت اني وانا نازله كان يالس يطالعني طول ما انا نازله .. لانه بيتنا كان عبارة عن طابقين .. الدور الاول فيه غرفة امي وابوي .. وغرفتين الضيوف والميلس والمطبخ الداخلي .. والصاله الكبيرة اللي بالوسط .. وهي تطل على الدور الثاني من خلال الدري لانه امي كانت مركبة زجاج على طول اليدار .. وخاصة انه ينقسم صوبين وبعدين يلتقي في الوسط فاي حد وهو نازل ينشاف .. يوم شفت نظراته لي حسيت بقلبي يدق .. من قهري عليه . انا عارفه انه كان يتخيليني اليازية زوجته الله يرحمها .. وهذا الشيء كان يزعلني .. لانه اليازيه غير وانا غير ..
( هلا بالحلوات ... وين بناتي مانشيتوا من الصبح )
( لا انا نشيت بس سمعت سعيد يصيح وقعدت وياه )
( كان تحت ويوم سمع انه ابوه بيسافر ربع فوق )
( وين ناوي تسافر راشد توك الا من كم يوم راجع ..)
( لا اتصلوا لي امس من امريكا وقالوا لي ارجع عشان .. اكمل ماستر .. وانا ماوراي شيء وانسان غير مرغوب فيني )
( لا ياراشد ياولدي من قال جذيه واذا كان على سعيد وعبيد ياولدي هم بعدهم عيالك وانته ابوهم .. صدق اني ماروم اتحمل اعيش بدونهم بس بعد انته ماراحت بعيد يعني بيكونون عندي وجدام عيني )
( راشد والكلية ماعرفوا انه عندهم ماستر الا امس)
( والله الظاهر يا ظبية جذيه .. بعد يمكن هم مخرفين )
( مب قصدي بس سعيد غمضني وهو يصيح يقولي انك بتسافر )
( اللحين سعيد ريال وعمي في حسبة ابوه وهم طول عمارهم متعودين على عدم وجودي .. ماعليه بيصيح يومين .. وبيسكت .. )
( يا جسى قلبك يا اخي .. شو انته ماعندك قلب .. ماعندك احساس .. الغربة انزعت الرحمه منك )
( بس يا ظبية .. عيب تتكلمين جذيه مع ولد عمج )
( ابويه انا مايهون علي سعيد وانته تدري انه قلبه مايتحمل كفاية انه فقد امه .. بعد تبون تحرمونه من ابوه وتيتمونه منه )
راشد حرج علي وانفعل بشكل رهيب وصرخ في ويهي ..
( حاولت ابني لهم بيت بس انتي اللي ماطعتي .. قلتلج يا بنت عمي بخذج وببني لهم بيت وبنسكنه كلنا .. لكن انتي كنتي انانيه وبديتي نفسج .. وحبج حق برهوم هذا بيدمرهم مب سفري )
التفت ابوي صوبي اللي كان منصدم من كلام راشد ..
( ظبية انتي العاقل .. البنت اللي وثقت فيها اخر شيء تكون لج علاقة مع ابراهيم من وراي ..)
( يابوي انته فهمت غلط .. وكلكم فهمتوا غلط .. )
انا ركضت صوب غرفتي وعقيت كتبي واغراضي على الكرسي ... ما كنت متحمله انه ابوي يقولي جذيه بعد كل هذا العمر .. انا كنت دائماً في طوعه وتحت عينه معقوله كلام راشد هزه بهذي السهوله معقوله يشك فيني انا ظبية ..
اه ياليازية .. يوم لزمتي على زواجج من راشد محد كان يروم يتكلم .. محد كان يقدر يقولج فقدنا ثقتنا .. وين ياليازيه تين تقولين لهم انا منوه ومن اللي رباني وعلمني اني ما اغلط ابد ...
يوم سمعت الباب .. خفت انه ابوي .. للحين ماكمل كلامه .. , ياي يظربني مع انه عمره مارفع يده على اي حد منا .. بس تذكرت انه ابوي مايروم يركب الدري .. رحت بسرعه وفتحت الباب كانت امي ..
( يابنتي ليش سويت جذه فينا .. شو قصرنا احنا فيه معاج عشان تفضحينا مع ولد عمج ..)
( يامي يالغالية انتي بعد تشكين في بنتج )
( يا ظبية انا امج مب غريبه عنج .. ليش ماقلتي لي كان الوضع افضل من اللحين .. شوفي ابوج كيف محرج عليج واللحين مليون فكره وفكرة في راسه )
انا قربت صوب امي حسيت اني محتاجه حنانها .. انسى الظلم انسى هاللحظة .. طحت في حضنها وصحت فترة لين حن قلب امي علي ..
( هلكثر تحبين ابراهيم .. زين متى شفتيه متى كلمتيه .. )
( يامي انتوا فاهمين غلط انا لا شفت ابراهيم ولا عمري كلمته .. انا قلت لراشد جذيه بعد ما اهاني .. بعد ماحسسني اني مثل البشكارة)
( متى يا بنتي وليش ماخبرتيني ولا خبرتي ابوج .. وش قال )
( تذكرين اليوم الثاني اللي زارنا فيه .. يوم كان يسالني عن دراستي وتخصصي )
( ايه احنا كنا معاكم )
( قبل لاتيون كان يشكرني على تربيتي حق عياله .. ومكافاتي يامي انه بياخذني عشان اربي العيال .. بدون مايعمل حساب حق مشاعر او يقدر احساسي .. )
( وبعدين .. انتي شو رديتي )
( انا مارديت عليه وفكرت اقوله اني احب ابراهيم عشان اتخلص منه ومن موضوع الزواج فيه وانتي تدرين ابوي كيف يحب عيال عمي ولايكسر لهم كلمه .. يوم طلعتوا قالي ليش ماقلت لي انج مخطوبه .. وحرج وتم يزاعج وقال اني ماراح اتزوجه ابراهيم .. خفت وقلت له اني انا وابراهيم على علاقة حب .. )
( فديتج ياغناتي كل هذا في قلبج وساكته .. جان يتني وخبرتيني .. كنت عرفت اتصرف معاهم .. مب تسيرين وتقولين له انج تحبين ابراهيم ومابتاخذين غيره .. اللحين ابوج شو بيقول عني ... ماعرفت اربيج )
هني حسيت بالالم اللي ذبحني انا مب متربيه .. انا اللي عمري ما عصيت لهم شور ولا عمر جرحتهم في شيء ولا قد فكرت اني اسوي اي نوع من العلاقات اصير مب متربيه .. اه يا ابوي هذا ضنك فيني .كلام ابوي حسسني اني بجد خسرت ثقته .. والسبه راشد وكلامه اللي مثل السم .. راشد الاناني اللي دمر حياتي .. اه ياليازيه وينج ياختي لو مامتي ما كان شيء من هذا استوى .. اسغفر الله من انا عشان اعترض على حكمة رب العالمين .. نشيت ورحت صوب المغسل وغسلت ويهي .. تذكرت الكليه .. حسيت اني ما اروم اكمل الكور س مابقى الا اسبوعين .. قررت بالباجر اروح اعتذر من الكورس .. لين اشوف لي حل مع موضوع ابوي ..
في الصاله كان الجو هادي ومحد يالس نزلت وقعدت .. لقيت مريم يالسه تكتب واجباتها على الطاوله .. وميثوه وسعيد وعبيد يلعبون بالكمبيوتر ويرسمون .. سالت مريم قالت انه ابوي من دخل الصبح حجرته ماطلع وامي عنده ..
رجعت غرفتي .. ومالقيت شيء اسويه .. شلت التلفون بتصل في حمده .. محد رد علي .. سكرته رحت صوب النت قلت باتصفح كم منتدى او بقراء لي كم قصيدة ..
دخلت على اليميل لقيت رساله من دمعة حزن ..
( السلام عليكم
انا حالياً خارج البلاد ... ويوم برجع راح اسوي لج عضويه
وشكراً
دمعة حزن )
رديت كتبت شكراً وانا في الانتظار .. ورجعت دخلت على صفحة الاشعار اللي تعجبني .. ودوم اقراء حق مجموعه من الشعراء .. كنت احب اكتب خواطر .. احياناً واحياناً اموت بالنكت وبعد ساعه من التصفح طلعت رحت صوب سيعد وعبيد .. كان لي فترة مايسلت وياهم وخاصة انه سعيد فيديته الصبح كان يصيح ..
وانا نازله لقيت مروان يالس في الصاله ..
( هلا ظبوي شحالج)
( بخير .. شو ماعندك شغل اليوم في المكتب .. )
(لا تعرفين خلاص خلصنا العملي وباقي هذا الاسبوع واتخرج .. وعقبها بتفرغ حق شركه ابوي ..)
( زين .. عاد لاتتكبر علينا عقب مسوي نفسك صاحب شركه )
( ههههاااي والله بذل عمور الكلب اللي دوم لسانه طويل على ابوي )
( شو ناوي تسوي .. )
( بخليه يشتغل في الصيف عندي فراش شو رايج )
( لا حرام عليك مايستاهل )
(خليه الهرم .. والله انه خقاق ودوم يقولي بسافر امريكا بسافر امريكا جنا الا امريكا تترياه )
( على طاري امريكا سمعت شو صار )
( شو ؟؟)
( راشد ولدي عمي قرر انه يرد يدرس ماستر ... )
( احسن له والله من يوم قال بيشل عيال يزيوي وانا منقهر .. طول هالفترة لا شافهم ولا شيء وبكل بساطه يبا يشلهم )
( بس بعد هو ابوهم )
( يا ظبية مب اللي ياب .. اللي ربى )
كانت هذي الكلمة اللي سمعها ابوي وهو ياي .. صوبنا .. وردد ابوي وراه ايه والله من اللي ربى .. الصراحه انا ماتحملت الكلمه وسرت صوب غرفتي لانه ماودي اسمع تلوم اكثر ..

ابوي لف صوب امي ..
( ام مروان بقيتج تدقين حق مديه ابا تينا اليوم )
( خير يا بو مروان ..)
( لا بس انتي اتصلي وخلاص )
( ان شاء الله ) وقامت امي تتصل فيها ..
شو اسوي في حياتي .. انا ربيت وتعبت وتي هذي اللي جتلتني وتسود ويهي .. معقوله .. ظبوي تسوي جذيه ظبوي العاقل .. اللي ماقد شفت منها الا الطاعه والحشمة .. تفضحني مع عمها وعيال عمها لكن هين يا ابراهيم انته الكلب تسوي في بنتي جذيه وانا اللي قربتك واتحسبك ريال .. ظهرت من الفاسدين والله لو شو ماصار .. تخسي يا الهرم ايوزك اياها ..
واشوف شو بتسوي ..
العصر عمتي يت ودخلت البيت ... وسلمت على ابوي وامي .. وانا كنت يالسه معاهم سلمتي علي
( هلا بمرت ولدي )
( هلا عموه شخبارج )
( والله بخير وسهاله .. )
( ها متى ناويه تخلصين .. ودي افرح بابراهيم بسرعه )
هني ابوي .. نش وقال لعمتي .. انه بيروح المليس ويابها تلحقه ..
عمتي .. شلت فنيان القهوة وراحت له ..بعد مادخلت سمعت ابوي يطلب منها تسكر الباب ..
وداخل يسلت عمتي مجابله ابوي
( مديه .. انا غيرت رايي .. ومابا ا يوز ظبوي حق ابراهيم )
( ليش يا خوي عسى ماشر .. شو صاير شايف شيء .. سمعت شي عن ابراهيم )
( لا بس انا مابا تنشغل .. بموضوع العرس وهي للحين ماكملت .. وغير جذيه انا ابا اللي يتزوجها يقعد عندي في البيت .. ولا تبيني اخسر بناتي .. )
( ليش يا بومروان عسى ماشر انجلبت علينا .. وبعدين ولدي مب مقصر فلوس عشان يسكن حرمته بيت ابوها .. الناس بتكل ويوهنا ..)
( هذا الكلام وصلج وانا برسلج شبكة ظبوي والاغراض اللي يبتوها ..)
( لا يا اخوي .. انته بك شيء وسامع شيء .. ولا مابستوي جذيه ..فديت خشمك قولي .. ولا تحرق فؤادي اكثر )
( يا مديه مافي شيء بس انا تسرعت .. وماودي اليازيه تلتهي وبعدين .. ابراهيم الف بنت تتمناها .. ويقدر يعرس في اي وقت يباه .. )
( شو السالفة طرده يعني .. والله ماهقيتها منك يا بومروان .. )
( عاد اانتهت السالفة ويوم تتخرج يصير خير )
( ليش وانا بتريا لين بنتك تتخرج وقسماً بالله ماتخلص دورة السنه الا ابراهيم يكون عنده ولد )
( يكون احسن )
( في وداعة الله ... )
شفت عمتي وهي طالعه معصبه .. حتى ماسلمت علينا وراحت بيتها ..
ابو طلع من عندها وقالي .. الم اغراضهم واعطيها امي .. عشان يردون كل شيء لهم .. انا غصبن عني صحت ورحت غرفتي ابوي يوم شافني جذيه .. كان شوي وبيضربني .. بس مسك نفسه
( شو سويت يابومروان ليش ... شو صار )
( بس مابا هالنسبه .. كيفي بنتي وانا حر )
امي لانها كانت تعرف الموضوع وتدري انه ابوي قلبه طيب .. وبينسى وماحبت تخليه يتلوم فسككت عنه وسكرت الموضوع ..



__________________


http://home.att.net/~scorh/Flower1k.gifhttp://home.att.net/~scorh/Flower1k.gif

ملاك
20-10-2003, 03:10 PM
http://home.att.net/~scorh/Flower1k.gifhttp://home.att.net/~scorh/Flower1k.gif

انا كنت احترق من داخل .. حتى لو مكنت اعرف ابراهيم ولا قد شفته بس هذا مب معناه اني ما ملت له من كلامهم وبالذات كلام ساره عنه .. وعن اخلاقه وشهامة .. ورجولته حسيت بغلطه ارتكبتها في حقي وفي حق ابراهيم اللي ماشفت من شيء .. كنت ادعي انه الله يسامحني ويعوض ابراهيم بانسانه تستاهله وتقدر .. وانه يغفر لي على جذبتي .. وتمنيت انه ابوي يعرف منو ظبية بس للاسف كان الموضوع انتهى

اليوم الثاني في الكليه كنت انا رايحه بقدم اعتذار .. بس حمده منعتني وتمت تحن اني ما اعتذر .. وانا طاوعتها وبسبة الضغوط والتفكير ماقدرت اني ادرس وكنت امتحني اي كلام بس جذيه مب مهتمه لنتيجه او لمعدل .. اللي كان يهمني كيف ارجع ثقة ابوي فيني اللي بسبة ابراهيم تدمرت وطلعت نتيجتي اللي كنت متوقعتها كانت سلبيه .. يعني لابد ما اعيد الكورس اللي بيبدى السنه اليايه وعلى جذيه .. راح اقعد في البيت مجابلة ابوي واخواني .. في داخلي كنت اقول هذي فرصه عشان ارتاح وافكر كيف اقدر ارجع ثقت ابوي فيني بدون ما اقوله اي شيء ..

و سمعت من مروان انه راشد سافر .. وراح يكمل ماستر .. وسمعت عمي مره يقول انه خلاص مب ناوي يرجع .. يعني محد كان يعرف .. احنا كنا متعودين على عدم وجوده .. وانا في نفسي قلت احسن ارتحت منه ومن مشاكله على الاقل سعيد وعبيد بيتمون عندنا .. ..

نهاية الجزء الثالث

__________________

http://home.att.net/~scorh/Flower1k.gifhttp://home.att.net/~scorh/Flower1k.gif

ملاك
09-11-2003, 04:57 AM
محد معبرني وقايل كملي القصة يامـــلاك

الظاهر مو عاجبتكم :cry: :cry: :cry:

السلطان
09-11-2003, 05:04 AM
ملاك

مشكورة ملاك..

ولو اني بصراحه ماقراتها كلها الى الان بس قرأت البداية لانها بصراحه طويلة جدا..

لكن من البداية شكلها حلوة وتستاهل القراءة..:wink:

وان شاء الله راح اقراها بعد شوي بس اهم شي كمليها عشان مااتوهق بنص القصه :)

يعطيك العافيه..

تحياتي

مسطل
09-11-2003, 05:10 AM
اختي ملاك !!

انا توني خاش :)

مو تو تو يعني ممكن من ساعتين :) وانا امر المنتديات بالترتيب :)

وتوني اوصل هنا :)

بصراحه القصه طويله !! وانا ماقريت منها ولا حرف لأني ماراح اقراها الا لما افصل من النت :) تعرفين نوووفر فواتير تلفون واشتراك :)


بعدين بارجع اعلق اذا كملتي باقي الاجزاء :)

شاكر لك :) بانتظار التكمله

تحياتي
مسطل

ملاك
09-11-2003, 07:32 PM
تسلمووووووووون والله

بس ماني مكملة القصة الا لين تقولون خلصتووو الا فووووووووق

والاخ مسطل


كل هذاااا توفير

مسطل
11-11-2003, 09:50 AM
هههههههههههههههه ملاك !!

لو تجلسي نفس الوقت اللي اجلسه كان مالمتيني :)

تيخيلي من عقب العشاء الى 10 الليل تقريبا ارد على المواضيع الخاصه فيني بعض الاحيان !!

ومن عقب الفجر الى الساعه 10 الصبح !! اطرح مواضيع جديده واعلق على
المواضيع اللي في كل المواضيع اللي هنا :)

لاحظي هذي كونيكت :) يعني شابك :) يعني اقراء واعلق!!

كيف لو بتلت شابك وانا اقرى المشاركات الطويله ؟ كم بجلس لووووول

تحياتي
مسطل

والقصه اكثر من رائعه
بس انتظر التكمله ؟

ملاك
11-11-2003, 10:38 AM
هـــــــــلا مسطل

تشكـــــــــرات يا مسطــل افنـدم

كـــل هذا مجهود :wink:

والله انا اتم شابكة 24 ساعة ولا افصل عن النت

لا واحيانااا انـــــــــــــام وهو شغال

عــادي :twisted:

ماتدفـــع شي من جيبهاااا :shock:

والحين انزل لك جزء من القصة :idea:

ملاك
11-11-2003, 11:11 AM
الجــزء الرابع

في الفترة اللي قعدتها في البيت .. كنت نادر ما ايلس مع امي وابوي وان يلست سمعت من ابوي كلام يعور قلبي .. ولهيت نفسي مابين تدريس الصغاريه او تدريس عمور اللي كان السنه ثانويه عامه .. وكنت كل يوم اسهر على النت .. اما اسولف مع حمدوه او مع ربيعاتنا .. ويوم وراء يوم صارت اعرف كل اللي في الشات ... رغم انه مالي اسم ثابت كنت كل يوم باسم عشان محد يعرفني ولا اسوي مشاكل لاي شخص .. لدرجه اني مليت ولا صرت ادخل ابد
في ليلة كنت متضايقة .. وماعندي اي شغل .. قررت ادخل الشات .. يمكن القى حد اسولف معاه .. بس بالفعل كان الشباب والبنات الكل لاهي بنفسه .. وانا ماكنت اترك البرايفت .. اذا كنت ادخل اخلي بس بابلك .. عشان محد يزعجني ..
شفت رساله وصلتي مني دمعه حزن .. ففتحت الايميل وقريته ..
( السلام عليكم ..
لقد وصلت الى البيت منذ شهر ولكن لظروف لم استطع ان اكمل اجراءات دخولك فهل لازلتي .. ترغبين بالتسجيل .. اتمنى ان اجد الرد ..في اقرب فرصه
وشكراً
دمعة حزن )
مدري ليش حسيت انه هذي البنت .. فيها شيء مب طبيعي .. ظروف وسفر .. قلت في خاطري خلاص انا مابا اسجل وراح اتعرف عليها افضل ... يمكن القى عندها شيء يلهيني شوي في وقت فراغي وبالفعل ارسلت لها رساله وقلت لها اني مابا الشات واصلاً انا عمري مافكرت ادخله .. بس ذاك اليوم كنت مسويه مقلب في واحد حمار حط لي رقمه بس وهم اللي سوو لي كك اوت عشان جذيه انقهرت بس انا مابا .. واصلاً الشات مايعجبني وبالنهاية قلت لها اذا ممكن اقدر اتعرف عليج فارجوج ضيفني معاج على المسنجر .. وحطيت لها مسنجري .. اللي كان كله ربيعاتي .. ومحد يعرف غيري .. كان باسم ورده شقا .. وقلت لها انه هذا الايميل لاتضيفينه لانه اصلاً مب ايميلي الاصلي وراح اسكره ..
بعد يومين من ارسلي للرساله لقيت اضافة منها .. على المسنجر .. وفرحت وايد ..
كانت تكتبت بمقطع شعر عجبني ( الا يا نجمة الاحزان .. اذا صار الموات بلاد .. ابسكنها مدينة موت وحبك هو مواساتي ) وكنت كل ليلة ايلس انتظرها .. وبالفعل مافكرت اني ادخل الشات .. ابد .. وظليت على انتظاري اسبوع وفي اخر الاسبوع قررت اني ما ادخل .. بس كان قلبي ياكلني قلت بس بشوف .. يمكن القى منها رساله .. يوم دخلت لقيتها اون لاين .. استغربت قلت في خاطري اكيد هذي البنت وراها قصة .. شو سالفتها ..
وعلى طول
( السلام عليكم دمعه )
( وعليج السلام .. شحالج ؟)
( انا بخير .. وانتي .. وان شاء الله كانت سفرتج مريحه .. )
(لاباس .. )
( اسفة اذا ازعجتج دمعه )
( لا عادي .. انا كنت اسوي بحث .. مطلوب مني اسلمه بكرى )
( اذا تبين اقدر اساعدج .. انا احب اسوي البحوث .. )
( لا ماحب اخلي حد يسوي لي بحوثي وعلى العموم شكراً )
مدري حسيت انها شوي متكبرة .. بس انا في اخر مسج مارديت .. بغيت احسسها اني موجوده مب عاقه نفسي عليها .. والصراحه تميت ساعه وهي ولا قالت شيء بالنهاية
( وردة انتي هني )
( هي كنت اقراء شعر .. لهيت عنج اسفة ) انا قلت جذيه عشان ماتحس اني من الصبح بموت واعرف شو سالفتها
( لا عادي انا بطلع من النت تامرين بشيء)
( لا سلامتج .. ؟؟ ) وكنت مغتاضة منها شو هذي ...
( باي )
( باي )
طلعت وحتى نسيت اسألها متى تدخل .. المهم خليتها تولي .. ورحت تحت ابا ايلس مع سعود وعبيد .. وميثوه تعجبني وسالفهم .. نزلت لقيت الصغار يالسين يتضاربون على التلفون .. بسرعه شليته عنهم وسكتهم .. وسالتهم من .. محد رد علي ..
( الو )
( هلا ظبية انا راشد )
( هلا مرحبا .. بغيت ابوي )
( لا بغيت اكلم عيالي وبعدين بكلم عمي )
ناديت سعود وخليته يكلم ابوه .. اللي كل شوي احس يفرح ومتجاوب معاه وهو يقول
( صدق بابا .. متى )
(........................)
( باقي شهرين ونخلص .. )
(...................................)
( ان شاء الله بابا )
وعطا السماعه عبيد .. اللي تم يناقز من الفرحه .. انا مسكت سعيد وسالته .. شو قالك بابا
( قال بيخلينا نروح عنده في الصيف ... عشان نقعد عنده في الاجازة )
( قول والله سعود .. قول حق ابوك عمر بيبنا امريكا )
( لا انته دب ماحبك انا ابا ماما ظبيه )
( لا ياحبيبي ... انا عندي شغل في الصيف قول حق ابوك ايي الامارات ويشيلكم احسن ..)
كان عبيد يمط كندورتي يقولي ماما .. هذا بابا يبا يكلمج
( هلا راشد )
( انا ادري انه الصغارية متولهين علي عشان جذيه انا قلت بيبهم عندي في الصيف شو رايج ؟)
( والله ياراشد انا صدق اتوله عليهم بس بعد انته ابوهم وادرى بمصلحتهم ولازم يحسون بوجودك .. هم كبار اللحين ويفهمون )
( خلاص عيل انا بكلم عمي عشان اخلي احمد يسوي لهم فيزا .. وسئلي اخوانج اذا حد يبا اي معاهم .. ترى انا ماعندي مانع ..)
( مدري سمعت عمر يقول انه يبا يبهم لك )
( خلاص خلي عمر يجهز يوازه معاهم وانا بكلم اوب وعمي عشان .. السفر والتجهيزات )
وسكر عني لانه ابوي كان طالع وقال انه بيتصل به على المبايل ..


انا كنت متضايقه .. لاني .. كنت ادري انه راشد شيء تحت راسه .. بس خفت اتكلم .. سكت وقلت هم بالنهايه عياله بس فديتهم بيغمضوني .وبتوله عليهم . مدري كيف بصبر عنهم .. خل ينا الصيف ويصير خير ..
ناديت سعيد وعبيد ورحت وياهم حجرتي .. كانت ميثوه تلعب مع مريم بنت شما بنت عمي سيف .. قعدت وياهم اسولف .. كنت احب سوالف سعيد .. واسلوبه كان وايد حنون ووايد كان يحب اخوه ويبديه على نفسه كنت اشوف فيه اليازيه .. بعد جيه وعدتهم اطلعهم وامر بيت عمي اشيل ميثوه ومريوم وخالد وسيف ولد مها اوديهم مكدونلد عشان يلعبون .. اتصلت في مروان
( الو)
( هلا ظبية شحالج)
( بخير وين انت )
( انا في الشركه ليش في شيء .. لا بس بغيت اودي اليهال مكدونلد وكنت ابا اسير معاك )
( الله يهديج اللحين انا مال مكدونالد شلي عمور .. خله يوديكم )
( خلاص انا بعد بغيت اعلمك لانه ابوي محد وتلفونه مسكر وامي بيت عمتي عوشه )
( اوكيه انا اذا شفت ابوي بقوله )
( تم مع السلامه )
ناديت عمور اللي تذمر في البداية بس يوم قلت له انه مابخيله يسافر مع سعيد وراشد خاف ورضى يودينا ونادينا مريم اختي .. وطلعنا شلنا اليهال وودينهم ..
وصلنا مكدنالدز وطول الدرب وعمر يتحرش بسعيد وعبيد وهم ساكتين عنه وخالد ولد شما يرد .. عليه .. المهم مره كان يعصب ومره نضحك عليه .. .. ونزلنا الصغار .. كلهم ودخلنا داخل الصغار راحوا صوب الالعاب ..
و انا رحت وطلبت لهم .. وجبات .. وطلبت لي وحق مريم ويلست مع عمر ومريم على الطاوله .. ومشالله كان صراخهم مسوي يوله في المكان لدرجه انه عمر كل شوي يسكتهم .. و يتحرطم علينا
( اوف كله منج اللحين انا وين وطلعاتكم البطاليه هذي وين )
( اصلاً لك الشرف تودينا )
( جب مريوم .. لا الوتج كف )
( بس عاد عمور .. شو قالت لك )
( اوف وانتي بعد وياها .. اصلاً انا انسان عندي ثانويه عامه المفروض ادرس )
( لا واضح ماكل الكتب اكل )
( بتشوفين يوم بيب 99,9 % والله لا تموتون قهر )
( عدال يالبرفسور ماجنه عايد ثالث ثانوي .. )
( ايه المره اللي مضت ماكان في امريكا .. )
( اللحين اللي فيه )
( ايه رشود ولد عمي سيف هناك )
( هي انته اصغر عيالك هو .. )
( عاد من زينه متكبر ومسوي نفسه ابد محد قده والله مستغرب كيف تزوجته يازيو .. )
( بس عاد لاتطري اليازيه جذيه الله يرحمها .. كانت وايد طيبه اكيد تحملته )
(هذا شيء اكيد )
هني سمعنا صوت رضه .. وصراخ عبيد واليهال .. مره وحده .. قمنا رحنا صوب الالعاب .. كان خالد فوق .. ومريوم وميثوه وسيفوه يلعبون في الكور .. عبيد كان في الزحلاقه .. سعيد .. حبيبي سعيد كان طايح وبسرعه لويت عليه .. تم يصيح ..
( انا ماسويت شيء عموه والله .. هذا الحديد مكسور .. حتى شوفي .. والله عموه كنا نتسابق )
( خالد خلاص .. ظبوي بتصل في الاسعاف )
( ياعمري ياسعيد .. فديتك شيء يعورك )
( ريولي عموه وايد تعورني )
( لا لازم نوديك المستشفى بسرعه عمر اتصل .. )
الكل كان ملتم علينا والكل يسال شو صار والموظفات يعتذرون .. وصل الاسعاف .. ورحت انا مع سعيد وطلبت من عمر يوصل اليهال البيت .. ويقول حق امي وابوي عشان يطمنهم ..
رحت هناك .. ووصلنا المستشفى قالنا الدكتور انه ريوله فيها كسر .. ولازم جبس .. انا تروعت عليه ومت خفت من خاطري فيديتك ياسعيد ..
جبسنا ريوله .. واتصلت في عمر ورجعنا البيت .. كانت امي وايد زايغه وابوي اللي من دخلت تم يهزبني
( وانتي شو لج تودينهم مطاعم والعاب كنتي خليتهم في البيت احسن لهم )
( بس يابوي انا حبيت العبهم .. وهم كل يوم يطلبون مني اطلعهم)
( بس مابا اسمع شيء شو قال الدكتور ..)
( قال انه كسر بسيط وفي خلال شهر بيالتئم )
( ياخوفي شيء اكبر انا باجر بحجزله في احسن مكان وبسال الدكاترة هذا ولد الغالية ولد اليازيه .. ) كنت ادري انه ولد اليازيه وادري يابوي انه اليايزه غاليه عندك .. وكنت بعد ادري اني طحت من عينك خلاص ..
شلت سعيد ووديته فوق ورقدته عندي وطلبت من اليهال مايزعجونه وايد ..
شوي ورن التلفون كان راشد متصل ..
( الو)
( هلا راشد )
( عمر وين ابوك)
( ابوي هني بس سعيد ماصار به شيء بخير لاتحاتيه الا هو كسر بسيط وبكرى ابوي بيوديه اكبر مستشفى )
( بلاه سعيد يا عمر .. شو فيه .. علمني )
( ها .. انا مالي خص اندوك ابوي )
( هلا راشد .. تطمن سعيد مابلاه الا العافية )
( عمي طمني .. شو فيه ولدي .. من كسر ريوله وكيف تعور )
( ياولدي انته لاتحاتي هو بخير وبكرى بوديه احسن مستشفى بس انته هد اعصابك .. وعلمني من قالك )
( لا انا كنت متصل عشان استئذنك ايبهم عندي امريكا شهر هم وعمر)
( ان شاء الله .. صار ولايهمك بس انته طمن نفسك .. )
( لا ياعمي انا الليله بحجز وبرجع البلاد وباخذهم معاي اعتقد ماعندهم مدارس منها اطمن عليهم ومنها ايبهم هني مثل ماوعدتهم )
( ياراشد مايحتاي .. هونها وتهون .. وان شاء الله بكرى اسوي فحوصات وارسلها لك وتطمن عليه )
( خلاص عمي شورك وهدايت الله )
( عمي بقيت اكلم سعيد وينه)
(والله ظبية شلته حجرتها عشان يرقد عندها وتهتم فيه)
( خلاص بتصل وقت ثاني .. اتطمن عليه)
( مع السلامه)
سكر ابوي عن راشد ومسك عمر من اذنيه ..
( انا كم مره قلت لك يالملقوف صون لسانك ها)
(والله ابوي مدري شو هذا ساحر يعرف كل شيء )
( محد ساحر الا انت سير ادرس .. وياويلك ان طلعتهم مره ثانية ..)
( ان شالله )
وسار حجرته بسرعه .. انا قلت لامي ترقد ميثوه عندها لان برقد عبيد وسعيد عندي لين ماتطيب ريول سعيد ..


طول فترة مرض سعيد وانا جنبه .. كنت العب معاه اسولف معاه هو وعبيد حسيت انهم عيالي مب عيال اليازيه .. كانوا بالنسبة لي .. كل شيء .. يمكن قبل كنت متعلقه فيهم بس اللحين تعلقت فيهم اكثر .. كانوا يتشابهون وايد .. فرق بسيط كانت بينهم كانت في وحمه على عين عبيد صغيره وكنت اقدر افرق بينهم .. عبيد كان هادي ويسوي كل شيء مثل سعيد .. كنت احسهم احياناً شخص واحد .. كنا كل ليلة نسهر على قصه .. انا اقولهم وهم يتمون يسالوني واحياناً كانت ميثوه تبات عندنا وكان راشد كل يوم يتصل يكلمهم .. وخاصه بعد ماتطمن على نتايج الفحوصات ..
ويوم يرقدون كنت ادخل المسنجر احياناً القى .. دمعه واحياناً القى .. حمده ربيعتي .. اللي قالت لي انها انخطبت وبتتزوج في الصيف .. بعد كم يوم من اخر مره شفت فيها دمعه اون لاين .. وماكلمتني .. قررت اني الغيها من المسنجر .. وبالفعل لغيتها .. بس بعد يومين كنت داخله .. وشوي اشوف ( الا يا نجمة الاحزان .. اذا صار الموات بلاد .. ابسكنها مدينة موت وحبك هو مواساتي ) يرغب بالتحدث معك : هلا ورده
( هلا دمعة سامحيني ماشفتج على المسنجر)
( ههههاااااي لا ادري انج مسويه لي حذف)
انا هني اخضريت واحمريت وقلت (انا لا )
(لا ياورده انا عندي طريقه واعرف .. اللي يحذفني )
ماعرفت كيف ارد ودي اني اسحب الفيش .. واطلع بس مابغيت اكمل حركة النذاله والله ويهي عورني جد ..
( ورده مالومج .. يمكن انا ماتكلم وايد بس انا هذا طبعي ..)
( لا عادي دمعه افا حنا خوات واللي يعوريج يعورني بس انتي الله يهديج طبعج غريب .. نادراً ماتدخلين النت .. واذا دخلتي تكونين مشغوله)
( ورده شو تبين اقولج انا حياتي ضاعت من مات اغلى انسان عندي ..)
انا هني قلبي بجد عورني .. حسيت انها اكيد عانت .. انا اختي ولين اليوم موتها مأثر فيني .. كيف هي ..
( الله يرحمهم .. وانا حاسه باحساسج وموت العزيزين صعب .. )
( بس انا مت من يوم سمعت بخبر وفاته .. مت احس انه حياتي صارت عباره عن شيء تافه ماله اي طعم .. شيء صعب اني اقدر اوصفه )
( الله يعينج يا دمعه والله قطعتي قلبي ومن شاف مصيبة غيره هانت عليه مصايبة )
( الله كريم .. واباج تعذرين اذا مارديت بس بالفعل بديت ارتاح معاج واحس انه لي اخت تهتم فيني )
( افا يا دمعه اعتمدي .. ومن اليوم ورايح انا اختج )
( تسلمين الغالية انا استئذن بروح اتغدى )
( خلاص .. تسلمين ..)
وطلعت تميت اضحك عليها شو هذا بروح اتغدى واحنا نص الليل .. ياله ماعلينا يمكن غلطت .. بس اخير عرفت انها مثلي .. حزينه والله يادمعه اني بجد احس اني مرتاحه .. وان شاء الله .. الله يعوضني فيج عن احزاني رحت جنب عبيد اللي كان يرقد عندي على الارض لانه سيعد نرقد فوق السرير .. وحضظنته وانا احس بسعاده .. احس انه لقيت اليازيه .. او حتى شفتها .. قمت ابني احلام وقصص قلت بعزم دمعه على الغداء عندنا ويوم طريت الغداء تذكرت وضحكت ..وبعدها رقدت ..

في اليوم الثاني .. اول شيء رحنا المستشفى وشلنا الجبس .. ويوم مشى سعيد وفرحنا وايد وحمدنا الله .. يوم رجعت البيت انا وامي كان راشد متصل .. وخلينه يكلم سعيد اللي تم يصارخ ويناقز يبا يسمع ابوه انه بخير ..
انا رحت حجرتي كنت ناويه انقل اغراضهم حجرتهم .. بس قلبي ماطاوعني ... نزلت وقلت حق امي اني خلاص نويت اخليهم عندي وبنروح العصر نشتري لهم اسره .. عشان تتناسب مع غرفة نومي ..وغرفتهم بنخليها حق لعبهم .. امي كانت وايد سعيده .. لانها كانت تحس بسعادتي مع سعيد وعبيد .. وبالفعل سرنا العصر شرينا لهم اسره وشراشف تناسب غرفتي ورجعنا وركبتهم لهم وفرحوا وايد انهم اخيراً بيقعدون في غرفتي .. اللي من صغار وهم فيها بس يوم دخلوا الروضه .. حبيت تكون لهم غرفة مستقلة وخلينا غرفة اليازية لهم ..
http://skins.hotbar.com/skins/jpg/0502/0502klightning7.jpg

مسطل
18-11-2003, 07:42 PM
واصلي والله معاااكي

واصلي والله يحميكي يحميكي بلادي لول :)

تسلمين ملاك

بانتظار الباقي

تحياتي
مسطل

وحظ اللي مايدفعون فواتير والله اني دافع 1000 ريال من دم قلبي

ملاك
18-11-2003, 09:27 PM
حاظر يا استاذي راح انزل لك جزء منهااا

والحمد لله ما ادفع شي لنت

كل شي بلوشي :wink:

زهره السوسن
28-11-2003, 08:37 AM
ملاك :

قصه روعه انسجمت معها ونسيت نفسي

وانا اقراها...

صحيح انها طويله بس رووووعه تستاهل

واحلى شي فيها لهجت الامارات..

مع اني استصعبت القصه بالبدايه لكن

حبيت لهجتهم ...

تكفين عندي طلب صغير....

كلمليها... ولاتهوقينا

تحياتي لك

زهره السوسن