PDA

عرض كامل الموضوع : لسسسسساني وصخ؟؟؟؟؟



النادر
27-10-2003, 07:22 AM
المعذرة غلطت فالعنوان كنت ابي اكتب لسانة وصخ وانا كسول جدا مافيني حيل اغير العنوان هع

هذي قصةاحد اصدقاي اللي ارحمه لان مشكلته خطيره نقلا عن لسااانه:



حياتى مليانه .. مشاكل ...
ومايكفي انى .. شين .. فاشل .. مفلس ..
ووش ترجون اصلا من واحد وهو صغير امنيته يطلع خياط

المهم .. مشكلتى هالمره .. انى تعودت اتكلم بطريقة سريعه .. و أكل الكلام .. واغير الحروف .. وابدل الكلمات .. خصوصا لما اكون مستحى والا معصب والا محرج .. و بطريقه ما شفتها على احد .. مدرى وش الاسباب .. لكني اتوقع ان موقع خشمى فخارطة وجهى سبب مؤثر

وللاسف ان غلطاتى وتغيير الحروف والكلمات صارت ماتحطينى انا بس فمواقف باييييييييييييخه .. بالعكس لعبت فى حسبت غيري

فمره كان لي صديق ناوى يخطب وحده .. وشفنا اخوانها فمكان عام .. وقاللى نجحنى عندهم ( يعنى امدحنى ) .. عشان يعجبهم .. المهم مع السواليف الجانبيه . مسكت اخو البنت الكبير . واستلمته مدح فصديقي .. قمت قلت : فلان كل شي فيه كويس بس عيبه ان ابوه فقير ( ابي اقول ابوه فريق ) وان العسكريين متشددين ..اخو البنت انصدم ومشاها .. كملت سواليفي قلت : ترى الولد حشاش درجة اولى ( ابي اقول حساس ) .. اخو البنت وجهه قام يقلب الوان .... كملت قلت : هو عملي مره مره مره لدرجة انه مايحب يشرب بسيارته احد غيره ( ابي اقول يربش يعنى يغسل سيارته ) .. اخو البنت عقد حواجبه .. فالاخير قلت : صديقي هذا باختصار غبي ولايتفوت .. ( ابي اقول غني) .. .. قال اقول لاتكمل مدرى شلون تمشي معه انت!!

وفمره كنت فمجلس مليان رجال كبار .. ومناصب .. ورجال اعمال .. ووكلاء وزارات . وفى وسط النقاش الحاد عن الاقتصاد فالمملكه . نطيت ولان صوتى جهوري سكتوا يسمعونى .. بزعمى ابي اتفلسف قلت : بصراحه هالايام الطقاع الحكومى صار اردي من الطقاع الخاص .. هم عيونهم طارت ( كنت ابي اقول القطاع الحكومى ) .. ولا ابن امه رد علي كلمه عقبها .. افحمتهم . سريت ولا عاد قبلت على ذاك البيت ابد !!

ومره كانت فمطعم وقبالى وحده رزه وثقل .. وانا ممتحنها احركلها حواجبي .. واسوي حركات بشفايفي .. واحط ملح فعيونى .. وافتح لها خشمى واسكره .. هى غصب ضحكت .وعطتنى وجه .. اشرت لها بالرقم هزت راسها اوكى ( تبي تتسلي على ) .. وحطيته لها . المهم بعد ماخلصنا عشاء وهى ماره بتطلع من المطعم .. قلت اصير سلسال على هالبقره ( اقصد الرقبه ) .. البنت قالت اقول ضف وجهك يالشين ..خمس دقايق واخوانها محضرين .وعينك ماتشوف الا النور

ومره فجده مسكنى ضابط حجازى رتبه كبيره ..وكان مامعى رخصه .. وبعد المحاولات والتمسكن والترجى .. قال خلاص روح ياواد المره هادى سماح .. انا مع الفرحه .. قلت : ماعليك زود الله يفضحك .. ( ابي اقول تسلم الله يحفظك) .. قال تعالا ياعسكري وديه عالباص بسورعه بلا فشكلو .. قلت يعنى عشان طرشي تتامر !! ( ابي اقول شرطي ) عاد هو حجازى وفهمها غلط .. وماطلعت من القسم الا بواسطات وحب خشوم

ومره كانت زوجة صديق عزيز علي مره ( اخ من الرضاع )..مختلفه معاه .. وكلمت ابيه وهى ردت .. وقبل لاتعطينى اياه اكلمه قالت ابشتكيلك عليه وقامت تحكى وتحكى انه يسهر وانه مهملها وانه وانه ... وانا ساكت .ولانى قادر اخترع اعذار لصديقي لانها صادقه.. ومتأثر وراحمها مره .. يوم خلصت من شكواها .. قلت والله يا بعير ( اسمها عبير ) مااقدر الا انى اقول افسي عليك بس ( اسفي عليك ) .. البنت قالت : لا ابوك لا ابو من شكالك ولا ابو من تزوج صديقك .. وطلبت الطلاق

ومره كنت فماقبله شخصيه حقت وظيفه .. سالنى المدير وش هواياتك ؟ .. وانا ابي اسوى قدامه مثقف .. قلت احب الطراءه والقوابع ( ابي اقول القراءه و الطوابع ) .. قال وش اهتماماتك ؟ .. قلت احب التياسه والسجاره ( ابي اقول السياسه والتجاره ) .. قال وش خبراتك ؟ .. قلت العياه حلمتنى ( الحياه علمتنى) .. قال ابشر .. فى وظيفة مهندس مصاقيل .تبيها !!

ومره كنت مسافر .. وكنت مع عيال وقابلنا الشاعرين ( العطيب) و ( الحيران ) .. وسلمنا عليهم لان واحد منا ولد عمهم ( انا مااعرفهم ) .. وبزعمى ابتفلسف قلت لاخوياي قدامهم .ماعرفتوهم قالوا لا ..قلت هذولا الشاعرين المشهورين العبيط والحيوان ..( العطيب والحيران ) .. واشتغلت البقوس .

ومره كنا فمكان عام .. وخوية صديقي موجوده .. والشباب يغازلونها وهو لاهى .. قمت ورحت طاولته ومعه اصدقاه وحكيت معه قدامهم .. قلت ياعدس ( ابي اقول يا سعد ) ... قال افاااا .. قلت تونى اعرف ان هالنشب منظر( ابي اقول شنب) تعجب هو ... قلت خويتك تترقم وانت هنا لاهى يازباله ( ابي اقول زلابه ) .. قال لا عاد يلعن ام الميانه اللى تعرفها .. وبدت المعركه

ومره شفت اصدقاى وسلمت عليهم وابي اعرفهم على اللى معى .. قلت معصور المعصور ( منصور المنصور ) و خالد الحمقان (خالد الحمدان ) و حمار الحمار ( عمار العمار ) ... عقبها المشكله مافكوها الا فالقسم .

ومره كان صديقي نازل محل .. وموبايله يرن يرن يرن فالسياره .. قمت تلقفت ورديت ...الا هى امه قالت من انت ؟ .. قلت انا فلان صديق فلان .. قالت هو وينه ؟ .. قلت هو نازل محل .قالت طيب ليش ترد على تليفونه ؟ قلت لان غنمة جواله مثل غنمة جوالي ( ابي اقول نغمة ) قالت وجع .. مع السلامه وسكرت فوجهى.. رن ثانى ورديت طلع ابوه قال وين فلان ؟ قلتله نازل .. قال مشكور ياولدى ..قلت العفوا الله يمحيك ( ابي اقول الله يحييك ) . وسب ولعن وسكر فوجهىوانا ساكت ... ومن عقبها الولد مايرد علي

ابن سبعة وسبعين ملط لط استرو على ما واجهتوا

السلطان
27-10-2003, 05:13 PM
النادر,


صاحبكم هذا نكبه :)

مشكور اخوي النادر على المشاركة. .

وعاش من شافك :)

تحياتي

مسطل
27-10-2003, 07:12 PM
ههههههههههههههههههههههههههه !!

الله يسعدك :)

وعن اللقافه لول

تحياتي
مسطل