PDA

عرض كامل الموضوع : بعض كلمات الأغاني القديمة في الخليج



Bin Mohayya
16-04-2006, 06:54 AM
هذي بعض كلمات الأغاني القديمة في الخليج


ولد عمي ما بغاني ... تنقى علي واختار
تنقى ام السلاسل .. ام الشغاب الطوال
حلفت انا لزامط .. بالند وبالبياض

-----------------------------------------------------

يا عليا قومي ركبي ... بيقودبج علوه
المطرح والزوالي .. جدامج ربعوه
نهار ما صبحتي .. المدفع ثوروه
الحلوى في القواطي .. والنخي نثروه

--------------------------------

يا فاطمة بنت راشد .. يا شيخة البنات
انتي قصيره وبيضا ... والخشم مكعبات
يا قصة يانثرية ... تنثر على الحياة

-----------------------------------------

يا عليا بنت ابوها ... والخطاب اخطبوها
سبعة ورا البيت .. والثامن عند ابوها
واحد يدق الزعفران ... والثاني يقول يا ليتني خادم ابوها.

-----------------------------------------
يا بنية ما دريتي ... عن خطار لفوج
قالت لفوني غبشة .. على خيول وبوش
مصلين الجمعه ..صقر ولد الشيوخ
يالس على الدجيجه .. يالس ويعد فلوس
يا الطاسه يا المخبوقه .. ما ضمتها الفلوس

----------------------------------

يا بنيه موتي غصه ... اذا انا مريت
انا سلبت فوادج ... في السكه واتليت
يالغرفة يا الشرجيه ... بناها بو علي
حق عاشه البدويه .. بنت محمد علي

-------------------------------------------

من اليوع لو متّي .. ما يوزج شتّي
بيوزج تاير .. لو بالحجي جاير
يا بنيتي يالزينه ... صبي لبوج دهينه
جان ما رضى ولد عمج.. صبي واجلعي عينه

----------------------------------------

يرقد وليدي رقده هنيه
رقدة الغزلان في البريه
يرقد وليدي طيب الله نومه
وعدو وليدى ما هنا بمنام

---------------------------------------

عيال عمي سبعة .. خلوني باتنقى
نقيت بو طاقية .... بو يوخه ما رضى
زامط عليه بخشمه .. يا خشم اليوحره
خشمي طويل وغاوي ..شفته في المنظره .
حيا الله اللي يباني .... يسلم العشره

---------------------------------------

عمتي مرت ابويه ... الله يسلط عليها
يوم يتها الهديه .. دستها في الزويه
تتحسبني طلاّبه .. اطلب على البيبان
ما جن ابويه تاجر ..بيصوغ لي الذهبان

---------------------------------------

طاحت عليه نفه .. قوموا اشترولي دفه
طاح المطر برعوده .. كسر حوي سعوده
طاح المطر بيد الله ... كسر حوي عبدالله
طاح المطر من فوق .. كسر حوي بن طوق

-------------------------------------

حمامه نودي نودي .. سلمي على سعودي
سعودي ساير مكه .. بيب ثياب بو العكه
بحطه في صندوقي .. صندوقي ماله مفتاح
والمفتاح عند الحداد .. والحداد يبغي فلوس
والفلوس عند العروس .. والعروس تبغي عيال
والعيال يبغون حليب ... والحليب عند البقر
والبقر يبغون حشيش .. والحشيش فوق اليبل
واليبل يبغي مطر ... والمطر من عند الله



منقووووووووووووووووووووووووول

abersabeel
19-04-2006, 01:31 AM
شكلك مغرم مثلي بالقديم ويازين القديم وخاصة الزين منه

احسنت الاختيار يا ابن محيا جعلك دايم تجيبها

الورود
21-04-2006, 10:48 AM
حلوة الاهازيج .. واعتقد انها صارت معدومه في وقتنا الحاضر


مشاركه حلوة ..يعطيك العافيه

نقــاء
21-04-2006, 12:21 PM
الأغاني التقليدية والتي كانت تشيعُ بين الناس في الماضي

صارت اليومَ مُجردَ طلَل ضعيف البنيان

ولكنها مثل الزهور يبقىَ شذاها ولَوْ يبست

ألف شكر لك ابن محيا

Bin Mohayya
07-05-2006, 10:41 AM
شكلك مغرم مثلي بالقديم ويازين القديم وخاصة الزين منه

احسنت الاختيار يا ابن محيا جعلك دايم تجيبها


أخي العزيز عابر سبيل
مشكور ياقلبي على مرورك الكريم

ونعم أنا مغرم بالقديم لأن اللي ماله قديم لن يكون له حديث

تحيااااااااااااااا Bin Mohayya ااااااااااااااااااتي

Bin Mohayya
07-05-2006, 10:44 AM
حلوة الاهازيج .. واعتقد انها صارت معدومه في وقتنا الحاضر


مشاركه حلوة ..يعطيك العافيه


أختي الغالية الورود
مشكورة ياقلبي على مرورك الكريم

وكما قلت صارت هذه الأهازيج معدومة في واقعنا

ولكنها لا تزال متواجدة في قلوبنا وفي أذهاننا

تحيااااااااااااااا Bin Mohayya ااااااااااااااااااتي

Bin Mohayya
07-05-2006, 10:47 AM
الأغاني التقليدية والتي كانت تشيعُ بين الناس في الماضي

صارت اليومَ مُجردَ طلَل ضعيف البنيان

ولكنها مثل الزهور يبقىَ شذاها ولَوْ يبست

ألف شكر لك ابن محيا


أختي العزيزة قمر العشاق
وأنت أيضا مرورك له شذى فواح

فلك مني كل الشكر والتقدير ياقلبي على مرورك

وعلى تعليقك بهذه الكلمات الرائعة

تحيااااااااااااااا Bin Mohayya ااااااااااااااااااتي