PDA

عرض كامل الموضوع : ( المطبخ الرمضاني ) .. موضوع خاص بالحريم والبنات بس ! ( آخر حلقه )



مدمن شاهي
12-10-2006, 03:13 PM
السلام عليكم

هذي آخر حلقة من حلقاتي ... حقت الطبخ والنفخ وريحة المطابخ والزيت المحروق ! :D

اليوم بتكون طريقتنا سياحيه .. يعني بشكل أوضح .. الكل يقدر يسويّها .. ومافيه تهرّب .. لاتطلع لي وحده وتقول لاهلها أو زوجها ( تراي أبغى أعتكف العشر الأواخر في المسجد ) عشان تنحاش من المطبخ .. مافيه يامره ... الاعتكاف سنّه وقعدتك عند رجلك أو أهلك ألزم وفي الخدمه أوجب !

المهم .. تراي اليوم صايم << يقال لي جبت جديد !

وتوي جاي من مكّه قبل يومين .. والله ياهي شي بعد .. إيمانيات وروحانيه .. ومقابل الكعبه يكفي الواحد ( سعة صدر ) و ( انشراح خاطر ) .. ولعلي بعد كم يوم أكتب لكم موضوع خاص عن سفرتي لمكه وأدائي العمره فيها ... خاصّه أن اللي معي كانوا ( شلقة ) شباب رهيبين ... راشد وسالم وأحمد << الأخير هذا جديد على الشلّه .. بس يمشيّ الحال ويوسّع الصدر .. وأهم شي أنه مهوب بخيل والا يكاسر على الريال والريالين ! ;)

خلونا في المهم ياصبايا << بعض الحريم تموت في كلمة صبايا .. وهذا من زود التأثر بقنوات حقين الشاورما والكباب عالصاج .... بعض الحريم لو تقولها ( ياصبيه ) .. تشققت فرح .. وخطر تموت ... وعلى بالها رجعت ثلاثين سنه على ورى .. يامره أركدي .. ترى المره بعقلها ودينها أبرك ! :D

اليوم صنفنا ( عصير كوكتيل ) ..

على طاري كوكتيل .. يوم كنت صغير .. وأوّل مابدى العصير ينتشر ويشتهر في المحلات .. كنت أحسب الكوكتيل هذا .. شي ( يوكل ) ..

رحت لبوفيه قريبه من البيت .. وفسخت نعولي عند الباب ( راعي المحل يقول أي بزر يدخل بنعوله في المحل باعطيه طراق على وجهه ) .. المهم فسخت نعولي عند الباب ورحت للعامل ورفعت أطراف رجلي عشان أطول الطاوله .. وصار راسي يطلع طرفه العلوي بس ... قال العامل ( أيس فيه يابزر ؟ ) .. قلت ( ياصديق .. جيب كوتكيل ! ) .. قال ( كوكتيل ) .. قلت ( ايه .. جيب واحد وواحد عصير منقا ) !:)

شوي إلا ويحط عندي على الطاوله عصيرين .. تقولون فاتح ( مركز عصيرات ) ... !

سميّت بعصير الكوكتيل البارد .. وعصير المنقا وفّرته لليوم الثاني على الصباح الباكر .. صراحتـ (ن) إلى الآن أحــــــــسّ بطعم الكوكتيل << لاتصدقونه .. تراه تسذوب !

عاد بعلّمكم اليوم وش لون تصلّحون عصير الكوكتيل !

المقادير /

4 حبّات موز

فنجال سكّر

2 كاس ماء

5 ملاعق جلي فرالوه .. وفي روايه أخرى فراوله .. وفي رواية خاصّه باخوي الصغير ( فلاوله ) !

طريقة الصنع /

تراها سهله ... وهي أسرع طريقه في العالم .. وحريص أني أختار الطريقه هذي عشان تكون سهله للجميع .. وكل واحد يقدر يصلّحها ولايتعذر باعذار واهيه !

الطريقه أن المقادير اللي فوق نحطّها في خلاط .. ثم نفرّها على أسرع شي .. لييييين تبدى تخوبص ويطلع لونها أحمر فاقع كنّه طماطه .. ثم نقدّمها على السفره .. وبالهنا والشفا

هاه وش رايكم .. مهوب سهله .. إلا والله سهله ونص يامُدمن .. وتسلم يديّاتك وربي يخليك .. تأبرني خيوّ !

بعد أقل من أسبوع - ان شاء الله - راح أكتب موضوع بعنوان ( يازحمتن شفتها بمكه ) ! .. :)

انتظروا المقال .. ويمكن بعد المقال انقطع لي فتره .. سنه شهر اسبوع ... مدري .. لأن الأرواح بيد الجبار - جلّ جلاله -

سلام :)

:: مدمن شاهي ::

marooz
12-10-2006, 10:52 PM
momden kelfa shway hal koktel

bas bajareb

مدمن شاهي
15-10-2006, 11:24 PM
anti hrgk mdre wsh ybe

tbinna ntgat lk onshtre lk kebord ؟ :)

marooz
17-10-2006, 12:21 AM
mabi key bord

ente bas jibli barnamaj 3arabi le XP we aneh akon mashkura lak
>>>>>>>> shenhi mjadi


mashkur ya modmen