PDA

عرض كامل الموضوع : انصحكم بتوخي الحذر R3 لمحبين المغامرات والاكشن (امممممحق)



المصلوخي
17-01-2004, 08:23 AM
انصحكم بتوخي الحذر R3
محاتسيكم مدمن افلام اكشن لاعبتن في اصل مندوبه جت هاك الليله اللي كنت اتقلب فيها على سريري طنت في بالي فكرتن طحنت رحاها في دمجتي المصون قلت لنفسي مدامك يبو هروني مطفر وملحط ليش ما تسرق لك بنك ( مسكين هالبنك هو اللي فالبال على طول ) قلت يولد مهيب شينه واطلع ورقه وقلم واولّع السهاريه واحط على طاولتي شمعه واقعد اخطط صحيح اني نسيت نفسي ورسمت نهر وجبل وشجرتن طالعن منها غصن والشمس تويز برمشها الحنون لكن ما اسرع ماقلبت الورقه وضبطت المرقه اللي ماتخرش على الطاوله من اولها باعلمكم لحد يتذيهن ويقول اني باطلع آخر هالمغامرات واقول لكم صحيت من نومي ومدري ويش لا حبايبي راحت موضتها خلاص اول شي قلت باجرب اللطش على عامل البقاله حقنا تكون بروفه لين تجي العمليه الكبيرة ام الخياش ( قد جهزهن ) اخذت معي سكين وصكيت اللطمه وكان مافيه الا هو هاك الصبح العالم لاهين في مدارسهم والكل منشغل ويوم وصلته والاه راقد على الطاوله .. يا والله البلشه لازم يصحى عشان تكتمل الخطه وخاصه انه سادن ببطنه الدرج حق الفلوس قمت ورجفت الطاوله ( طع طع ) صديق هادا جوازات قوم ويفز المسكين مترين ورا ويوم ناظر والا الدعوى مافيه لا جوازات ولا شي واحدن قدامه متطلم وصاكن نظارات شمسيه تقولون سيد مكاوي واطلع السكين واعطيه البوك حقي قلت ملّي سورعا ( حشا بيعبي بنزيم ) وهو يتنافض مسكين ويحط فيه كمن عشره هي تحويشة الصباح يوم جيت اطلع قلت له : صديق انتا في قول كفيل والا شورطه يذبح انتا واحط السكين على رقبتي واسحبها في الهواء وانا اقول يعني فيه شخخخخخخ سوا سوا عيد حج بعدين ودي انتا كيس بنجلاديش وانا اللي اهج تغمرني الفرحه بنجاح البروفه مع ان هالسكين ياحسرة لو اذبح بها دجاجه قعدت تضحك مير جابت مفعول ولا تقولون حبة بندول <== يمشي بدمه السجع حلو ابوهروني اكتملت الخطوه الاولى وصرت مرعب من اولها ايه قالها ارنولد شوارزينجر يوم رشحوه لرئاسة كالفورنيا ذس مان هاروني از بيست خلف فور بيست سلف اتزززززز سنايدي
يالله عآآآآآد ارنووووووولد مو وقته
بقي البنك ياعزتي له يبي له مخمخه ركّبت لي شنب ولبست لي بشت قال لكم من الاكباريه اللي حسابهم تغتث الاله الحاسبه ما جابته يحلفون ان رئيس العملاء يصب على الاله الحاسبة بيرة بيربيكان عشان تهضم . ماعلينا دخلت عليهم في وقت مافيه زحمه المدير كان طالع والمساعد حقه مشغول مره دخلت غرفه المراقبه وخليت الكاميرات تتوجه على هندي جالس بالسرا قاعدن يمسس شعيراته ويكددها ودخلت على العملاء وانا اسحب رجولي واهوش بصوت فخم : ماصارت ياخخخخخخخخي محتاج مليون ريال وللحين ماخلصتوني شكلي باسحب فلوسي كلها واغير البنك والا الله يخلي التجوري <== حدك حصاله المصري : الله .. مين آل كدا اتفزل طال عومرك وكل حاقه هتقيك ومعها بوسه راس تشرب ايه سعادتك حاقا سئعه والا شاي والا أهوه قلت لا ابي عصير ليمون لو سمحت لأن فيني حموضه خلها تتفاعل وتلتقي ( مدري وش سنعها لكن ابيه يتاخر وبس ) قال دئايق بس قلت : تيك يور تايممممممم قال : الله دنتا لوغاات قلت : افكورس : بونسانيراتا قال : ايه دي كمان ؟ قلت لا لا تشغل بالك هذي بالسنغالي يعني يعطيك العافيه قال : ولا يهمك ثواني بس ابوهروني: هماك تو تقول دقايق وراهن طلعن ثواني ؟ المصري : الله . مش انتا عاوز نستعقلك ابوهروني : لالا في هذي على اقل من مهلك لو تبي ساعه خل نروق على الخزنه المصري : ايه بتئول ايه مش سامعك لالا رح الله معك ويجلسني عند مكانه ويروح يجيب لي ليموناده الخزنه عندي ولا حولي احد الكل مشغول واللي مسؤول عنها رايح يصلح ليمون والله فرصه ماحلمت فيها اشوى اني جايب الخياش ولافزها تحت البشت والتفت التفاته صقر لمح فريسته ويوم جيت افتح الخزنه والا هاك المصري الثاني مدري وين طلع منه جلس علىمكتبة وقاعد يلعب بالكرسي من زود الفضاوه ماعنده شغل وخفت يقزني وانا الطش وينشب لي يا والله البلشه وش السواة يولد حمقت عليه من جد وبسرعه فكرت في خطه اخرى وطنت في راسي خطتن تهبل ما تحتمل التأخير قمت وحطيت البشت تحت الكرسي ورحت للمصري حق الليمون ودخلت عليه وهو لاهي يعصر ليمون واسمعه يغني : بص شوف الليمون بيعمل ايه يا مذوبني بغرامك يا مئطعني حتت وما امداه يكملها مره ثانيه الا واخمعه بخشبه مع رقبته كانت بالمطبخ ويطيح مغمى عليه والقط ملابسه بسرعه والبسهن واسحبه ورا الباب واجي بكل ثقه واروح مكانه ابد من شافني قال هذا العقل المدبر بالبنك صحيح ان الكرفته ماعرفت اربطها يحلفون انها خانقتني لكن ضبطتها على انها ورده قال لكم حركه جديدة المهم من جلست جاني عميل لاحوووول الظاهر الدعوى مهيب خالصه سلام عليكم
ابوهروني : عليكم السلام
العميل : ما شاء الله ما شاء الله ونعم والله سعودي ؟ بس وراك تسذا قطك ماتعرف تداوم بثوبك ؟ او انك سعودي متمصر هاهاها
ابوهروني : بص بئئا انتا ماخمنتششش هات اللي عندك مش فاضي لك انتا وخشتك الي كنها طباقة برينجلز
العميل : افااا هذا وانتم تصبّحون وتمسّون على الفلوس نفوسكم شينه هذي 60 الف حطها بحسابي الله لا يهينك
ابوهروني : هلا هلا اشوى اني لحقت عليك ووافقتك
العميل : وش هلا هلا اخلص بس انا جاي اودعهن بحسابي ماجيت اتبرع بهن
ابو هروني : من عيوني والله انك صاز انك تودعهن من جد
العميل : وش تحنتم تقول انت وكرفتتك اللي كنها ذنب بنك بانثر
قمت وسويت روحي اطقطق بالجهاز وشخطت له ايصال وعطيته ايه وراح قمت عاد وسحبت الخياش وقمت اعبي واعبي واقحش امهات خمس وامهات ميتين يحلفون ان السعابيل هاك الوقت مسحت بصماتي وبصمات المصري بعد والقط الخياش واروح للمطبخ حقهم وابدل الملابس والمصري كنه بدا يستعيد عافيته ويحرك شفتاه بالانين كني سمعته يقول ايه دا ايه اللي حصل بالزبط عاوز افهم واقوم ارجفه مع ظهره قلت مهول لازم تفهم الحين واطلع منتفخ ومورمه جنوبي من هالخياش واناظر قبل اطلع للكاميره والاها على هندي حاط يده على خشمه ياربيييه حامت تسبدي منيب اواطن هالمنظر وارجع اعدلها ( رايق من جد ) وما امداني اعدل الكاميره والا هاك العصابه اللي تدخل وتحاصر البنك ياربيه وش رجعني ليتني طالعن قبل يجون وكل واحد من العصابه يهدد عامل مصرف قدامه حتى اللي يصلح لهم شاهي حاجرينه ومطلعين قريشاته وخذوا منه مفتاح يحسبونه للخزنه وهو يحلف لهم انه مفتاح قفل سيكله وانا اللي ارفع يديني ووجهي للجدار ويجي يمي واحدن منهم قال هلا بريحة الفلوس ماطقيت هاالبشت عبث قلت كنك داري توني الحين مسوي ايداع لكل حلالي تلقاهن بالخزنه ويطير يمها ماصدق خبر ويرجع لي صايق : مافيها شي انت وخشتك من شفت هالكرفته مع هالبشت وانا غاسل يدي اثري ناسي الكرفته من زين الخشه <== الا قل ماقويت تفكها قلت تخبر توني جاي من مصر وماعندي وقت من البزنس ويوم مالقوا شي بالبنك غير دريهمات شويه ويلقطوني معهم يا والله البلشه يابن الحلال وش تبي فيني ويرد صايق : انطم والا سديت اثمك بكرفتتك الي كنها ام جنيب حنا دخلنا ببنك والظاهر طلعنا ببنك العوض ولا القطيعة ابوهروني : جعلها تقرصك وشوووووووو
ابوهروني :اقول الله يحرسك ايه
اشوا المهم نطل ربعه في اماكنهم وهو يتأسف لهم ويوعدهم بالتعويض في مداهمه ثانيه ويوم مرينا حول الحاره حقت البيت قلت بس هنا الله يعافيك انا اكمل مشي ويلفعني ذاك الكف الي اهتزت منه الخياش وطاحت وحده وش ذا الخيشه ؟ احم هذي تمر سكري توني شاريه رد علي وقال : اول مره اشوف تمر خفيف قلت لا لأنه مابعد كنزناه عشان كذا يكون متقوقع في ذاته ومنساب نحو انطوائيه مندثره ومادريت الا طعععععععع بقس طاير عليه ختم الجوده حق نسيم حميد
ياجعلها تقوقع عليك تريله بلا هات اشوف وش فيها ويوم القى نظره وتطير بوهته صارخا : ياساتررررررر والا امهات خمس واخواتهن وخالاتهن ومالذ وطاب يتلاصفن بعيونه هلا هلا ... هلا هلا .. وكولوليششششششش اجل مودعهن بالخزنه هاه والله اني داري من شفت سكبتك وكلك تفوخ غادي كنك كيسه في وسطها ترنج وانا داري ويلقطني في حضنه صديقي انت امووووووووآآآآآآآآآآآآآآآح
ابوهروني : وهنا وحده بعد لا يزعل الخد الثاني امووووووووووآآآآآآح
اويلاآآآآآآآآآآآآه انت صديقي وين تبي اوديك اي مكان بسرعه تسلم والله خذ بي لفتين وودني ماما نورة مشتهي كوكتيل وشف لي اقرب شاليه <== انلحس مخه يوم راحت فلوسه
استجمعت قواي والتفت له وقلت : اقول اسمع حبيبي مش كل طير يقلقلونه النص بالنص ففتي ففتي والا باشغل السفتي خخخخخ واطلع له السكين حقت راعي البقاله واصرخ بوجهه واقول والحين( طلع نجمه تتلاصف من عيني زي سلفر ) ( طكششش ) قال ايه ذكرتني معي ساطور بالدرج والظاهر هذا وقته قلت لا يابعدهم وراك تسذا جست كيدن اصبر لين عيد الضحيه منتب محتاجه الحين انا ودني للبيت اهلي يبي من يوديهم الظاهر نزلت بالحاره والخياش معه الله يخلف ويوم وصلت البيت والا الشرطه مطوقه البيت كله ياولد وش السالفه سلام ... عليكم السلام
العسكري: انت ابوهارون ؟
ابوهروني : بشحمه ولحمه وعضلاته<== تسمع بها
العسكري : حياك لنا ساعه نحتريك
ابوهروني : ياساتر آسف اذا تاخرت عليكم تعرفون مشاغل وحوسه
العسكري : وين بطاقتك ولا يكثر
بو هروني : واطلع البوك وادور وادور مالقيتها
العسكري : لا تتعب روحك بطاقتك معنا
صار الهندي الكلب يوم عطيته البوك لطش البطاقه مادريت عنه وعلى طول عطاها الشرطه اللي مالقوا اي تعب في التعرف على خشتي المصون والمشكله ان القضيه ماتسوى ما حط لي الا 20 ريال وعلك غندور وانا طالع ومابين كفاله وتعهد طلعت وانا العّن هالهندي اللي يدهن شعره بزيت دوار الشمس وانا بالشارع والا الهندي اللي كان بالبنك حاط يده بخشمه يغسل موتر يلعن شيطانك وامسكه واغطس وجهه بالسطل لين قام يبقبق حشا دجاجه مهوب آدمي صديق ايش سوي انا ؟ ايش سوي ؟ انتا خساره انا كثير مليون خلي انا كتير مجنووووووون انا الحين في فقع عيوووون وافقع خشته ببقس واتركه يترنح كذبابتن شطفتها زنوبة معتقه ويوم مريت عند البقاله والقى الهندي يضحك مع ربعه شكله يقول لهم السالفه وتقفل معي بزود رحت البيت وقعدت افكر وافكر ومادريت الا تولع لمبه فوق راسي مخلفة وراءها صوت : ( طن )
لتمر مرحلة خطه جديده .. موعدكم مع احداثها بالجزء الثاني ان شاء الله
آي ويل بآآآآآآآك

fido_dido
17-01-2004, 09:20 AM
ههههههههههههههhttp://smilies.sofrayt.com/%5E/c0/rotlaugh.gifhttp://smilies.sofrayt.com/%5E/c0/rotlaugh.gif
والله من جد سالفه على إنها طويله بس إنها مجنونه،،،،،،،،
المصلوخي هلا ،،،فيك وفي اول مشاركه لك ،،،،،،،،،،،،،،

هبوب الشمال
17-01-2004, 03:06 PM
ههههههههههههههhttp://smilies.sofrayt.com/%5E/c0/rotlaugh.gifhttp://smilies.sofrayt.com/%5E/c0/rotlaugh.gif
والله من جد سالفه على إنها طويله بس إنها مجنونه،،،،،،،،
المصلوخي هلا ،،،فيك وفي اول مشاركه لك ،،،،،،،،،،،،،،


المصلوخى مانزيد على قول مشرفنا الا لاتحرمنا من التنسيم
هههههههههههههههه

المصلوخي
18-01-2004, 12:02 AM
اشكركم لاطلاعكم على اول مشاركه لي


وانشاء الله ماراح تكون الاخيره لان فيه جزء ثاني وترقبوه

SHARK2004
18-01-2004, 12:38 AM
بس ودي اعرف السبب المقنع للإنضمام للهذا النوع من المسبقات لكن لو يسجلوا في الستار اكاديمي احسن

المصلوخي
19-01-2004, 09:50 AM
الصراحه يااخ شارك انا كنت من ضمن المشاركين في الستار اكادمي بس للأسف كان دوري كمبارس اشكرك لقرائتك الموضوع