PDA

عرض كامل الموضوع : هوشه بين السيجاروالبخوررررررر..



crazy-girl
20-01-2004, 06:24 AM
:lol:
ياشباب ويا بنات وأخص بالذكر المدخنين والمدخنات ,اللة يستر من الرقابة والمتبخرين والمتبخرات ، مساكم الله بالخير

ودي الحقيقه أوريكم هالمحاورة اللي صارت بين سيجارة وبخور .
وأظن الامور وصلت الى جر الشوش والضرب بالنعال والسباب والشتايم والله ماتقولون الا انهم بالاتجاه المعاكس ، لكن بالوقت الضايع تدخلت بينهم وفكيتهم عن بعض . وهالحين شوفو المحاورة . اللي بغى ياصل الدم الى الركب بسبابه .
سيجارة / مساك الله بالخير يابخور .

بخور / ………………<<<<<<<< مايرد على سيجارة حاقره.

سيجارة / ورى ماترد علي تراني بنت .

بخور / هههههههههههه مهب كل بنت تنعطى وجه .

سبجاره / والله واثق يالثقيل وشايف نفسك .

بخور / يحق لي أشوف نفسي لأني مشهور بالمجتمع وماتذكر الرجاجيل الا يصير لي ذكر معهم .

سيجارة / وأنا مشهورة بالمجتمع زيك .

بخور / هههههههههههه مهب كل شهرة يقال عنها شهرة .

سيجارة / انا مشهورة عند الفقراء والتجار والشباب والشابات وكلهم يعفروني ولايقدرون يستغنون عني .

بخور / طبعاً ً أكيد ماأحد يقدر يستغني عن دورة المياه .

سيجارة / عن الغلط عاد احترم نفسك تراك زدوتها شوي .

بخور / الحق دائماً يكره ولا أحد يحب طاريه .

سيجارة / هالحين يقالك مهم عند الناس .

بخور / مايبيلها تفكير طبعاً أكيد وأنا دائما أصير بمجالس الرجال والشيوخ والتجار وبقصور الافراح وأول مايقدمون للضيوف أنا .

سيجارة / وأنا مثلك بعد أصير بمجالسهم .

بخور / ههههههههههههه صح صح ماقلنا شي بس أتحدى واحد يستخدمك بوسط جلسة عرس والا جلسة اجتماعات ، واذا بغوا يستخدمونك واضطروا راحو لدوراة المياه يستخدمونك واذا خلصو منك رموكي بكرسي الحمام .

سيجارة / لالالالالالالالالالالالالالالالالالالاتراك زودتها وأشوفها طالت وشمّخت وأنا محترمتك وأنت المفروض تحترمني .

بخور / انتي وش تبين بالضبط ، تبين أحد يمدحك وانتي مرض وريحه خبيثه ونجسه ولافيكي خير للناس وفيكي مضره وخسارة دراهم .

سيجارة / ولو يبدوا انك تفتخر بنفسك زيادة عن اللزوم .

بخور / يكفيني فخراً أن الرسول صلى الله وعليه وسلم شبه الجليس الصالح فيني .وهذي شهادة لي من خير البشرية .

سيجارة / وأنا يكفين فخراً إن شارون مايقدر يستغني عني .
بخور / هههههههههههههههههههاااااااااااااي ، أقول الله يهني الجعل بدربيته .

سيجارة / وش قصدك يعني شارون جعل وأنا دربيته .
بخور / ويمكن أقول يكرم الجعل ودربيته عندك وعند شارون .

سيجارة / لالالالالالالالالالالالالالالالالا أنت بديت تغلط وشايف نفسك فوق .
بخور / ورا ماأشوف نفسي فوق وأنا الإوقيه مني بمئات الريالات وانتي البكت منك بخمسه ريال .

سيجارة / أنا متواضعه لكل الناس باختلاف حالتهم الماديه علشان يتمكن من إقتنائي الصغير والكبير .

بخور / أنا اقول عن نفسي الغالي يبتل غالي والزين يفرض نفسه ، ولو فيكي خير ما استخدموكي البزران والشيبان والبنات وغيرهم من المريضين واللي مخدوعين فيكي ولايدرون انك سبب رئيسي لمرض السرطان والشرايين والقلب .

سيجارة / أنت غلطان من يقولك اني سبب لها الأمراض ،

بخور / المستشفيات هي الشاهد الوحيد على خبثك ياخبيثه وياحقيرة .

سيجارة / لالالالالا الوضع ماينتحمل أبد ، لحظه أجيب لك اللي تربيك وهي رفيقة دربي وحبيبتي شيشه .

بخور / صدق لاقالوا كل ساقط وله لاقط .

سيجارة / احترم نفسك لاتغلط على شيشه ، وخلني أصوت لها علشان تجي تربيك . ياشيشه وينك .

شيشه / هلا وغلا سيجارة حياتي ورفيقة دربي .
سيجارة / أقولك تعالي شوفي لنا حل مع ذا العلة بخور اللي يقول حكي كبير علينا .

شيشه / عاد بعد بعد مابقى الا هي كسر خشب بدا ينفخ .

بخور / كسر الخسب أزين من الجراك الخايس والمعسل المروح .

شيشه / أقول يابخور اقصر الشر ولاتذبحك الغيره لأننا منتشرات بالمجتمع أكثر منك وخصوصاً بالقهاوي .

بخور / هههههههههههههههههههههههه بالقهاوي بس وفرحانه فيها وفاتحه خشتك شبرين علشان انتي مشهوره بالقهاوي .

شيشه / أيه مامليت عينك وراك مقهور .

بخور / لا والله ماليه سطل زبالتنا مهب عيني من ملحك انتي وريحتك يالمدوده .

شيشه / عن الغلط ياسافل تراك زودتها وهي قصيرة وماعليك منا نبي نخرب اللي نبي حنا ماغصبنا أحد انا وسيجارة انه يستخدمنا ، ياخوي لاتدخل عصك في شي مايخصك .

بخور / والله اني ادعي ربي عساه يفك الشباب منكم انتي واختك سيجاره لأن مابكن ملح والله مابكن الا المرض والريحة المدوده .

شيشه / ترانا كلنا بالهواء سوى يعني انت وانا وسيجارة مانطلع روايح الا بنار . يعني زيك زينا .

بخور / اقول انتي ماسمعتي بالشاعر اللي يقول :
يخاطبني السفيه بكل قبحٍ وأكره أن أكون له مجيباً ـ يزيد سفاهةً وأزيد حلماً كعود بخور يزيده الأحراق طيباً .
يعني النار تخليني أطلع ريحة طيبه يالمخيسه انتي واختك .

شيشه / ياخوي خلاص كلن فرحان بريحته انت وش عليك .

بخور / صحيح نسيت ان الفسايه ( الخنفساء ) تفرح بريحتها .

شيشه / تراك أتعبتني وغثيتني وأنت ذبحتني برمي الحكي ، نعنبوا ابليسك وش هالعلوم اللي عندك .اف اف اف اقول ياسيجارة .

سيجارة / هلا هلا أوخيتي شيشه .

شيشه / وش فيه شايل علينا حمله هالبخور ذا شكله يكرهنا لدم ضرسه.

سيجارة / ماش ياشيشه العذال واجد . وهو حاقد ليه نصير سلعه رخيصه بين يدين الناس وهو لا .

بخور / ترى رخصكم مهب حلى وطزا فيكم انتي واختك رخصكم لأنكم ماتستاهون الغلى انتي واياها . والدليل ان رخصكم مثل وجهكم ، ان الواحد اذا خلص من مزمزه رماكم بالارض وداس عليكم برجوله . شفتي الحقران . لا وغير كذا أحياناً يرميكم وهو ماخلص منكم . يعني أنواع الاستهتار . وانا مايرموني حتى أنا أوقف عن إخراج الريحه .

سيجارة / والله النقاش معك متعب ونعطيك كلمه وترد علينا بعشره كيف مافيه أحد يحكم بيننا .

شيشه / اصبرو اصبرو هذا المصرقع جاي مقبل علينا خلونا نخليه يحكم بينا ياوخيتي وبين هالعله اللي غثنا غثة.

سيجاره / والنعم والله المصرقع حياه الله .

بخور / لا يتراوالكم ان ها الترحيب بالمصرقع يبي يخليه يحكم عليكم حكم زين . ترى المصرقع عيار ومهستر وماعنده لعب .الكلمه اللي براسه يقوله لو على أطلق شنب وتراكم ماتعرفون طبعه لأنه من النوع اللي شي اسمه مجامله دايسه على جزمته ويقول الحق ولايخاف من احد وهو دايم بصف الضعافين وضد القويين .

سيجارة / خلاص تراك أقرقتنا أسكت بس خلنا نصوت له .ناديه ياشيشه تكفين .

شيشه / طيب طيب . يالمصرقع لبق على جنب تكفى نبيك بشغله .

المصرقع / وانا راكب تريله يوم انك تقولين لي لبق على جنب . اخلصي وش تبين منب فاضي وراي شغل أبروح للعيال أقعد معهم وأوسع صدورهم .

شيشه / على هونك علي تراي بنت ومااتحمل .

المصرقع / هههههههههههههههههاااااااااااي ذكرتين بماسنجري اذا هزأت اللي فيه قال تراني بنت انا شوي شوي علي وهو والله تمساح انه مايقدر يكتب زين بالكي بورد من كبر شنبه . المهم اخلصي وش تبين .

شيشه / نبيك تحكم بيننا انا وسيجاره من طرف وبخور من طرف ثاني .

مصرقع / هاه أثر بخور معكم وانا مادريت هلا أخوي بخور مساك الله بالخير لالالالاتقوم من مكانك عز الله مقامك .

بخور / هلا هلا هلا بريحة الرجاجيل هلا بالمصرقع المعزب وش أخبارك يالغالي .

المصرقع / بخير ياخوي والله ياانت عليك سوق بهالأيام ماشاء لله ,الله لايضرك منظر زين وريحة طيبه .

بخور / تسلم والله وياليت والله تلبي طلب سيجاره وشيشه علشان تحكم بيني انا واياهم .

المصرقع / أفا وش اللي صاير وش مقعدك مع هالمروحين .

سيجارة / أقول ياجلف ياخوي لاتغلط الله يرحم والديك احكم بيننا واذلف لعبارينك المهابيل .

المصرقع / اخلصي بسرعه وش عندك والحمدلله ان الله فاكنا منك ولاعمرنا حطيناك بخششنا لاأنتي ولا أختك هالمطولّه ذي شيشه .

شيشه وسيجاره / حنا يالمصرقع صار بيننا شيل وحط صبخ ولبخ كمخ وكميخ مع بخور هو يسب فينا وحنا نبين له الحقيقه الخافيه عنا ولكن هو مصر على اننا روايح مهب زينه وروايح تجيب الامراض ، ولاعطيناه كلمه رد علينا بعشره وحنا مااقتنعنا بكلامه فوش رايك تحكم بيننا واللي تقوله حنا راضين به .

المصرقع / طيب طيب ولايهمكم بس بدووووووون زعل .
<<<<<<<<<<<<<< والم للشر المصرقع من هالحين .

سيجاره وشيشه / لا الزعل مرفوض ومابعد كلامك كلام ياراع الكلام اللي هبل بناس وخوفهم وبدوا يراسلونه بالماسنجر يودون قربه علشان يفتكون من لسانه .

المصرقع / اقول خلاص لاتشغلوني بالكلام الفاضي . المهم زبدة الحكم اللي بقوله بينكم وبين العم بخور ، هو ان لو لي قدره عليكم انت ياالسيجاره واختك الشيشه كان انفيكم من الوجود واسكر هالقهاوي اللي دشرت عيالنا وخربتهم وهربتهم من مدارسهم ..

اي والله وانت الصاادق يا المصرقع ..عشت

خلصت الهووشه ..... اشوفكم مبسوطين ومندمجين ...

يالله وروني رائكم ....
منقوووووووووووووش


تحيااااااااااااااااتي

fido_dido
20-01-2004, 11:56 AM
هههههههههههههههههههههههههههههه

crazy ينطيج العافيه الي تعافيجhttp://smilies.sofrayt.com/%5E/r/hair.gif،،،،،،،،،،،ولاتحرمينا من خفة دم مشاركاتكhttp://smilies.sofrayt.com/%5E/r/cheese.gif

صراحه شي يموت من الضحك،،،،بس المهبل من جد والله هذا المصرقع http://smilies.sofrayt.com/%5E/r/pleased.gifhttp://smilies.sofrayt.com/%5E/r/pleased.gif،،،،،،،،،،،،،،،،
هههههههههههههههههههههههههههههه

الجروووح
20-01-2004, 12:06 PM
هلوووووووووو ماي فرندس ...



والله ان النخور ذا نشبه يبي له تأديب وش يبي بعمتنا سيجارة ..

اقول دلوني وينه ابي اروح افرغ ذا الكلاش في خشته ...


المنحط السافل بخور الشيبان ذا يغازل عمتنا ...

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ...

مشكورة يا كريزي ولكن علميه لا يتعرضها مرتن سانيه لا والله نزبحه زبح ..

بليز وخر شوي
20-01-2004, 04:20 PM
لا تلقووو بايديكم الى التهلكه




كفاناا الله شرر التتن وغيره


كح

والله يشافيني من ذا الفلونززززا اللي ناشبه لي

crazy-girl
23-01-2004, 11:43 PM
الله يعافيك
نيانيانياهاهاهاهاهاههههههههههههههههههههااااااي

crazy-girl
23-01-2004, 11:44 PM
العفوووووووووو جروح
خلاص وانا جهزه للفزعااااااااااات
نيانياهاهاهاهاهههههههههههههههههاااااي