PDA

عرض كامل الموضوع : رد على موضوع الاخت الكريمه بنت ابها 000 وخير الكلام 000



احلى بيسان
03-11-2006, 05:55 AM
خير الكلام ماقل ودل


حنّا بنات الوطـن وشمـوع ديجـوره
وحناّ بنات الوطن وأحلى سعوديـه
منابت المجد وأصل المجـد والصـوره
مرابـط العـز وسبـوق النداويـه
منابت الملح وأصل الـورد وزهـوره
مكاسر العـود والنفحـه سماويـه
عذبات الانفاس وأغلى المسك وعطوره
نفحات الاشجان والنسمه ربيعيـه
فوح الخزامى بروض ٍ قيـل ممطـوره
قدِ علّها مع بكور الوسـم وسميـه
حنّا بنـات الوطـن سكنـاه وخـدوره
حنّا بنات الوطـن والثقـل ماريّـه
ياللي تعـذرب بنـا يمنـاك مكسـوره
ماكن فينا لـك أم وبنـت وأخيـه
أفكـارك السـود مشبوهـه ومبتـوره
وعلومك العوج ملفوفـه وملويـه
تلـف وإلا تزيـد اللـف لــك دوره
العلم بالهون والحاجـات مقضيـه
خذها على نـور والرايـات منشـوره
بالعدل والميـز مكتوبـه ومقريـه
خذها وباقـي بهـا وقفـات مذخـوره
تجيك من فوق وإن حبيّـت رديـه
بنت الوطن ياضعيف الـرأي مذكـوره
بالخير والطيب مذكـوره سنافيـه
من أول الوقت يالمسكيـن مشهـوره
بالفكر وأحلى التواصيف النسائيـه
بنت الوطن ياقصير الشوف معمـوره
بالعطف والليـن وتزيـده بحنيـه
إن كان بالكون قالـوا عينـه وحـوره
بنت الوطن من عظيم الشان حوريه
بنت الوطن من جمال الخلق مستـوره
الطبع هادي ووقـت الجـد جديّـه
ممكن تقـوّم بوجـه المعتـدي ثـوره
والأصل تكوينهـا ثابـت حياويـه
شيهانة اللحظ بنـت الريـح منثـوره
ملمومة الخصر بنت الذيب ريميـه
يعنـي حجازيـة العينيـن مخـبـوره
نجدية الخصـر واللمحـه خليجيـه
ريحانة الفـل بـأرض الفـل مبـذوره
يعني عسير وعبير أحلى عسيريـه
وقـاّدة الحـس بالاشـواق دكـتـوره
يضيق صدر الزمن تبقى شماليـه
تكتب حروف الوفا وتسّـن دستـوره
بحروفها إخلاص وإن حبّت هواويه
يعني هي الجو مـع بيـداك وبحـوره
من رأسها للقدم بالزيـن مكسيـه
سمعت ياللـي حسبتـه لعبـة الكـوره
بعض السواليف لا سقته عماويـه
لا ضيّع الدرب مثلك وأخلـف شعـوره
ندلّـه الـدرب والاعمـال بالنيـه
ياخـاوي الفكـر والعـدلات مقبـوره
في صدرك اللي لبس بلواه صدريه
مغرور مغرور مثلـك نـاس مغـروره
بمركب النقـص والاوهـام مبليـه
منادميـن الخطـا ملفـاه وطـيـوره
الفكـر خيـاّل والساحـه خياليـه
من الحماقه لبسـك الكبـر وشـروره
والحمق رمح الردى وحدود هنديه
تسكن زوايـاك والطرقـات مهجـوره
ياغراب خل الحمام إنسى خطاويـه
لو تفرد الريش يالطـاووس مأثـوره
عواقب الكبـر يالمغـرور سلبيـه
ياسيّـد الغطرسـه ياقاصـر شبـوره
ياعاشق الذات عشق الذات نفسيه
سمعت رد الاصيلـه وإفهـم سطـوره
بسيط منسـاب والاوزان شعبيـه
وإسلك طريق الهدايه وإحفظ السـوره
السوره اللي على المعنـى ومكيـه
وإن كان نفسك على الشينات مجبوره
والنـار ياميّـت النيـران مطفيـه
أجيك أنـا بنـت هالديـره ومأجـوره
وتشوف بنت الوطن والجمره الحيه
أجيك وتشوف بنت السبـع مسعـوره
وأخرك معروف والدعوى طبيعيـه
الوقت معـروف فـي زنـات دبـوره
يخرّب العش وهو العـش راعيّـه
ماهي بشرَبه من الغـوري وشابـوره
بعض الحكاوي وفيه حدود محميـه
خذها ولا أقـول لا رديّـت مشكـوره
من واجبي لا دفعت الشر والسيّـه
بأول خطـوط الدفـاع وراس طابـوره
أصـد وأرد والصـدّه هجومـيـه
خذها وأنا بنت قوم المجـد وحضـوره
مني وأنا من بنات الـدار نجديـه
من نجد ماجيت أنا المغرب وناطـوره
وماجيت حد اليمن ما كنت مصريه
خذها وأنا ماعرف الحمراء ولا شتوره
ولا جيت عماّن وإلا كنـت شاميـه
ولا نيب من بابل النهريـن وآشـوره
وإلا بعد من بنات الشرق شرقيـه
خذها وأنا من عظيم الشان منصـوره
من نجد ماقول أنا شقراء وغربيـه
أعيّـد العيـد مـا عوشـر بعاشـوره
الدين الاسـلام والمنهـاج سنيـه
خذها ونفسي على المسفـار مأمـوره
والنفس معروف مأموره ومنهيـه
ماقلتها من غضب بالوقـت مقهـوره
على الملا وإن بغيت السلم سلميـه
خذها وأنا بنت روس الطيب وصقوره
الجد قحطـان والمنشـأ قصيميـه

رساله من سعوديه لكل العالم عرفتو الحين منهي البنت السعوديه


تقبلوا فائق الاحترام والتقدير

عبدالغنى منصور
11-10-2009, 11:11 AM
جميلة هلى هى بقلمك ام منقولة

ودى وتحياتى

الحياة حلوة