PDA

عرض كامل الموضوع : شباب وبنات جدة تعالوا ندردش سوا مرة تانية



أبومالك الحضرمي
25-02-2007, 06:56 AM
بما أنو زي مانتو شايفين حذفوا الموضوع اللي كتبوا عاشق وكنا ندردش فيه

حنحول على هدا الموضوع (( وإن شاء الله ما ينحذف ))

وفي البداية أرحب بكل سكان جدة وأقولكم صباحكم عسل وقشطة و فول


وأكيد معصووووووووب


والله أنا مرة جيعان شكلي حروح آخدلي واحد


وبالنسبة للفطور فهو اليوم عند مضيفتنا فراشة جدة في ستاربكس اللي على البحر ولا اللي في التحلية


ولا إش رأيك؟؟؟


على العموم ياهلا بيكم<<<<أكيد دحين قاعدين تقولوا هادا كلاموا كتير

معليش<<<<معليش ما تأكل عيش يا أبو الشباب

تحياتي
maleek

ضناني الشووووق
25-02-2007, 01:42 PM
يعني بس لشباب وبنات جدة،والباقي ممنوع
ههههههههههههههههههههههههههههههههههههههه
مساااء الخير للجميع
ويسعدني أكون أول من ترد على الموضوع

ضناني الشووووق
25-02-2007, 10:00 PM
الظاهر أخوي أبو مالك مافي ألا أنا وإنت
إن شاء البقية في الطريق
وتقبل مروري
اختك
ضناني الشووووق

أبومالك الحضرمي
26-02-2007, 06:50 AM
والله هذا الظاهر...

بس هاااا أهل جدة فيهم الخير والبركة



تكفووون لا تفشلوونا قدام الله وخلقة

وإذا على الفطوور خلاص عليا


تحياتي
maleek

ضناني الشووووق
26-02-2007, 11:45 AM
والله هذا الظاهر...

بس هاااا أهل جدة فيهم الخير والبركة



تكفووون لا تفشلوونا قدام الله وخلقة

وإذا على الفطوور خلاص عليا


تحياتي
maleek
إيه قلتلي الحين
يعني الوضوع خاص فقط بأهل جدة بس
يعني أنا طلعت ملقوفه ودخلت على الموضوع
ههههههههههههههههههههههههههههههههههههههههههه
لا إن شاء الله الخير في الطريق
وتقبل مروري
أختك
ضناني الشووووق

ضناني الشووووق
26-02-2007, 01:02 PM
شباب بنات وينكم
مو بس أهل جدة،المجال للكل
حياكم الله

فراشة جدة
26-02-2007, 04:38 PM
السلام عليكم
أخبااااركم وحشتوني
من زمااان عليكم
أكييييد وحشتكم عااارفه بدووون ماتقووولو

ضناني الشووووق
26-02-2007, 05:16 PM
السلام عليكم
أخبااااركم وحشتوني
من زمااان عليكم
أكييييد وحشتكم عااارفه بدووون ماتقووولو
مراااحب أختي فراشة جدة
تعرفي ليش الأعضاء مو كثير بالموضوع لأن كاتب الموضوع حدد نوع اللي يشاركوا

على العموم أختي تشرفنا بمعرفتك
ودمت بود
أختك
ضناني الشووووق

قروي
26-02-2007, 05:47 PM
بس اهل جده الله يهنيك ببركتهم على العموم يستاهلون اهل جده ,,وبرفوا عليك ياضناني الشوق على الكلام المكتوب ,ااااههاههاههه ,اناماعدت لك لك شاري _ احساااااااااااااس يعور القلب حسبي الله على المستقوين

فراشة جدة
26-02-2007, 05:50 PM
طيب إيش فيها
عااااادي أنو حدد الأشخااااص
أيش فيها مأشووووفها غريبه
على العمووووووم مراااااحب بالكل

فراشة جدة
26-02-2007, 06:02 PM
وينك بو مااالك تحط الموضوع وتنسحب
ههههههههههههه
أخباااارك وين الحميع
وحشتوني ياااهوا
فينكم
وفين عااااشق وتائه وأميره ومرمروشكولاته

فراشة جدة
26-02-2007, 06:05 PM
ها بو مالك اشووف الفطووور عليك
والله شئ
بو مالك
وين مغاااامراتك؟
ولا أنتهت الحلقه الأخيره
ههههههههههههههههه

فراشة جدة
26-02-2007, 06:06 PM
هلا بيكي أختي ضناني أسعدني وجودك معاااانا
من فين الحلوه؟
أكييييد تقووولي ملقوووفه
ههههههههههههه
يلا مرحباااابك لحد باااابك

أميرة العرب
26-02-2007, 06:38 PM
يعني بس لأهل جدة يعني أنا ممنوعه من الدخول يا حرااااااااام

ضناني الشووووق
26-02-2007, 06:43 PM
بس اهل جده الله يهنيك ببركتهم على العموم يستاهلون اهل جده ,,وبرفوا عليك ياضناني الشوق على الكلام المكتوب ,ااااههاههاههه ,اناماعدت لك لك شاري _ احساااااااااااااس يعور القلب حسبي الله على المستقوين
لا ماعليك أخوي
الظاهر هي بس غلطة مطبعية
هههههههههههههههههههههههههههههههه
على العموم حياك الله
شوف أنا مو من جدة وجالسه أشارك
لاتنسى تجيب معاك كل اللي تعرفه

ضناني الشووووق
26-02-2007, 06:47 PM
طيب إيش فيها
عااااادي أنو حدد الأشخااااص
أيش فيها مأشووووفها غريبه
على العمووووووم مراااااحب بالكل

لا أكيد فيها وفيها
تعرفي لو الموضوع كان عنوانه مثلا
الأخوة السعوديين تعالوا خلونا نسولف كان من زمان إشتهر ودخلوا عليه اعضاء واجد
لكن إن شاء الله الخير في الطريق
ودمت بود

فراشة جدة
26-02-2007, 07:46 PM
يااااشيخه على العموم أهو أنتو مو من جده ومنورين الموضوع
حيااااكم الله
وأهلاً وسهلاً بيكم جميعاً
فراشة جدة

ضناني الشووووق
26-02-2007, 08:30 PM
هلا بيكي أختي ضناني أسعدني وجودك معاااانا
من فين الحلوه؟
أكييييد تقووولي ملقوووفه
ههههههههههههه
يلا مرحباااابك لحد باااابك
هلا بك أختي فراشة جدة
من الرياض حبيبتي
وين ماكنت أنا في ديرة أبو متعب ....الله يحفظه
كيفك
أكيد لسه طالبه
كيف الدراسة معاكي
كله تمام
لا شكلي أنا اللي ملقوفه مو إنتي
هههههههههههههههههههههههههههههههههههههههه

فراشة جدة
26-02-2007, 08:34 PM
الحمد لله
أي والله طالبه عيوني
أيش أسوي الزمن يمر
أنتي أخبااارك؟
وأنتي طالبه ولا لا؟

ضناني الشووووق
26-02-2007, 08:36 PM
يعني بس لأهل جدة يعني أنا ممنوعه من الدخول يا حرااااااااام

عادي أختي أميرة
أنا من الرياض وجالسة أشارك
ليش إنتي من وين أختي؟

أبومالك الحضرمي
26-02-2007, 09:07 PM
شبااااااااااااااااااااااااااااااابز أند بنااااااااااااااااااااااااااااااااااااااااااتز

جاكم بومالك.....


كيف المقدمة حقت المغامرااااااااات جيدة

بالنسبة للموضوع فهو لأهل جدة وكل من يحب جدة وكل من كان يدردش في الموضوع حق أول



يعني إفري بدي

كيف بس إنجليزي

على العموم أنا عندي وسط الأسبوع محاضراااات<<<< بس يا طالب جامعي

من الساعة 11 علين الساعة 6 المغرب وبعدين بروح الجيم



أقولكم أكمل بعد شوية

اليوم جايبين عندنا سباك وكهربائي وحق الدش


مشغووووووووووولين اليومم الجماعة


يقولوا بكرة في عزومة غدا أمي بتسوي مشوي

مين يجي


تحياتي
maleek

ضناني الشووووق
26-02-2007, 09:08 PM
يااااشيخه على العموم أهو أنتو مو من جده ومنورين الموضوع
حيااااكم الله
وأهلاً وسهلاً بيكم جميعاً
فراشة جدة
حياكِ الله اختي الغالية
وإن شاء الله كلنا ومن يجي معانا نكون دوم موجودين
ودمت بود

أبومالك الحضرمي
26-02-2007, 09:30 PM
اليووووووووووووووم

خلينا نكمل

فأنا مشغووووول وسط الأسبوع بالمرة يعني ما راح أدخل المنتدى إلا مرة في الليل

أو مررة في الصباح أو الويك إند


عندي لكم موقف صار ليا مررة طريف<<<< طريف بس

مررررة كنت في فرايدديز اللي في طريق الملك

وكنت قاعد مع أهلي فأول ما جلسنا طبعا على عادتي عشني ولد نضيف وما أحب الوساخة<<<<<<بس يا نزيف

رحت الحمام الله يعزكم أغسل يدي دخلت الحمام بكل ثقة و رحت على المغسلة وأحط الصابوون في يدي

وأنا قاعد أغسل يدي بالصابون أنتبه إلا وألاقي بنتين وراي أشوفهم من المراية وأظنني كنت داك اليوم سكرااان<<<<<<<<أنت دايما سكران


فقلت إمكن أخوهم الصغير في الحمام ولا حاجة<<<<<<<شوف الثقة كيف؟؟؟من جد سكررراان

وأطالع إلا يضحكوا أقولهم أش فيه... تقوللي الكبيرة مانت عارف

قلتلها إيش<<<<<<<<قمة الدلاخة

قالت هادا حمام الحريم ........#^%&*&^)*^%$@#$%&^حذف الكلام من باب &%%$# وشكرا

وجهي راح*&^% والله والصابون لسع في يدي ما غسلتوا كلو تقول البنت أحسلك روح غسل يدك في حمامكم عشان لا تطلع حرمة من الحمام وتصرخ

والله ماتشوف إلا جري

ووجهي قلب أحمر وأخضر وألواااااااان


وبعد كدا ما في حمام أدخلوا إلا وأتأكد منو حريم ولا رجال.....هوووو


بس عدت سليمة


نكملكم بعدين مغامراتي


تحياتي
maleek

الهيثــــــــــم
27-02-2007, 01:25 AM
السلام عليكم

يا هلا فيكم اهل جدة الاحباء..والله حبيت امر لاهديكم وردة رويتها بماء النيل لاهل جدة واحبابها

والله ليكم معزة خاصة في قلبي لانكم أهل المحبة والكرم..بارك الله فيكم وحفظ أهل المملكة من كل شر

n0000000r
27-02-2007, 02:23 AM
السلام عليكم جميعا يا حلوين
وسلام خاص لصاحب الموضوع ولأهل جده الكرام
وسلام مربع لجميع الأعضاء اللي يحبوا جده واهل جده
كيفكم ان شاء الله تمام ..اعتذر على تقصيري معاكم يالغاليين بس والله جده فيها لوووود في السيستم وصعب الدخول على الشبكه هههههههههههههههه
وعلى فكره لاحظتوا فعلا ان الشبكه عندنا كانت داااااااااااااون المهم عشنا يوم جميل بدون المحموووول هههههههههههه
لي عوده يا حلوين ...باي مؤقت ويسلموووو على الدردشه الكووووول يا مستر مالك

mohammed2597
27-02-2007, 02:47 AM
مـــــــــــشـــــــكــــــــــــــــــــــــوررررررررررررررررررررررين
هل من مرحب؟ منكم ومعكم

أبومالك الحضرمي
27-02-2007, 04:40 AM
أهلييييين بالغالييين على مروركم الحلو



وسلااااااااااااااااامز خاص لأهل جدة


وتحية لكل من يحب جدة وأهلها


هاااااااااا شدوا حيلكم ولا توفروا مرررة هااااااااااه

وصباحكم عسل وقشطة إن شاء الله

سي يوووو


maleek

أبومالك الحضرمي
27-02-2007, 12:39 PM
هانت كلها ربوع ونخبص أمها في الويك إند


من جد اللي يتعب كتير وسط الأسبوع يستنى الويك إند بفارغ الصبر


كيفكم وكيف جدة

بدا الجو يصير حار

يعني حق سباحة؟؟

مين فيكم يحب السباحة....


سؤال جيد


أنتظركم
maleek

أبومالك الحضرمي
27-02-2007, 12:53 PM
غاليتي المشاركة مع العضو اللي فوق واللي منتحل إسمك بينقلع


وما تخافي أنت مكانك محفوظ بننا والمشاركة اللي فوق راح تنحذف

أهم شي ما تزعلي

تحياتي
maleek

فراشة جدة
27-02-2007, 04:40 PM
hi every bady>>>>بس خلاص عنكليزي
كل محل عنكليزي في الجامعه والبيت والمعهدو وهنا كمااان
أخباااااااااااااااااااركم ؟
وحشتوني معاااااكم مس فراشة جدة
من بيتها تحييكم وتلوحوا بيديها الكريمتين
يلا مين فيها الخير أكيد الكل
يلا يااااحلووووين نبغى الموضوع ينور علشااان بومالك بيض الله وجهه
ومسكيننن على الفشله اللهم لاشماته
وعشااان أخونا عااااشق وموضوعوا إلا رااااح
يلا أشوووفكم على خيرررر

أميرة العرب
27-02-2007, 07:25 PM
أهلين كيفكم ؟
كيفك فراشة و كيفك يا أبو مالك ؟

أبومالك الحضرمي
27-02-2007, 10:52 PM
بننننننننننننننننناااااااااااااااااااااااااااااااتتتتتتتتتتتتتتتتتتتتتتتتتتتتزززززززززززززززززززز

اليوووووووووووم عننننننننننننندي اسههههههههههههال فييييييييي الللللللللحرووووووووووف


من يقول إش مكتوب فوق

وفين الشباب من جدة جنطونا ومشيو كدا


أفا عليكم والله .....


ولا بلاش

تحياتي فراشة

والله ما أظن في أحد كره الإنجليزي أكتر مني أنا أدرس في الجامعة تلاتة ساعات كل يوم إنجلش من تلاتة إلأىين ستة العصر

شي قرف


والله بخير أميرة أنت كيفك

على فكرة عندي فضول أيش أتغديت اليوم؟؟؟؟


مدري ليش السؤال بس هوا جا كدا


تحياتي للجميع
maleek

أميرة العرب
28-02-2007, 01:32 PM
أنا أقول شو إلي مكتووووب فوق مكتوب :
بنات تز اليوم عندي إسهال في الحروف
و أنا الحمد لله مرررررره تمام
و بصرااااحة اليوم تغديت سمك لأني مررررررره بموت بالسمك

أبومالك الحضرمي
28-02-2007, 08:13 PM
أمممم سمك


أنا اليوم ما اتغديت بس معزوووم على العشا في تشيلز



طبعا الويك إند دايما أكون مشغوووووووووووول فراح أحط كم رد وأمشي



وينكم يا هووو


maleek
ترى بعدين أزعل...

أميرة العرب
28-02-2007, 08:40 PM
أنا موجودة

#بنت طفشانه#
01-03-2007, 11:43 PM
وخر

وخر

وخريااااااااااااااااااااااااااااولد ..........
انا جيت ........
انا عارفه انو مره متأخر ...بس والله مره كانت الدنيا عندي مره زحمه ......
مع اني دريت عن الموضوع في اول يوم انطرح فيه بس كنت زعلانه لانو الموضوع الاولاني انحذف عشان كده ماشاركت في داه ....وبعدين لمن حبيت اشاارك انشغلت.......
عالعموم اصلا زعلت لانو مااشفت احد دور عليا ول قال فين الطفشانه.......
مره خاطري مشطووووووووووب..............

نجـــ سهيل ـــمـ
02-03-2007, 01:40 AM
سلاااااااااااااام يا أهل جدة
كيفكم إنشاء الله إنتو بخير حبيت أصبح عليكم وأخذ أخباركم .....
إنبسطت على هرجكم حسيت إنتو عائلة واحدة طبعآالشكرلله ثم لصاحب الموضوع الأصلى أبو مالك
ومع تفاعل باقي الأعضاء بس العتب عليكم خليتو الموضوع بس للأهل جدة بس ( أمزح )..:p
الله يديم المحبة بين الجميع ...;)
لكم مني أصدق التمنيات والدعوات بالتوفيق:)

أبومالك الحضرمي
02-03-2007, 02:42 AM
نجم سهييل حبيبي


أجمل تحية لك يا عسل

أتمنى تكون بصحة وسلامة


أش بتعمل اليوم؟؟؟؟

صباحيتك حلوة

نشوفك دردش معانا ولا تقطعنا

maleek

أبومالك الحضرمي
02-03-2007, 02:49 AM
حبيبتي طفشاااانة

كلوا إلا زعلك ليش ما أحد سأل عنها والله أنكم ما تستحوا









أيوة طفشانة عاملة أيه مع الدراسة؟؟؟هوا أنتي تدرسي؟؟

والله اليوم أنا مرررة طفشتاااااااااااااااااااااااااااان


مافيا حتى أقوم من الكرسي



الجامعة طوال الأسبوع تخلي الواحد في حالة من الضيااااااااااااااااااع


لا تحرمينا من طلتك الحلوة

maleek

أبومالك الحضرمي
02-03-2007, 10:10 AM
هيللللللللللللللللللللللوووووووووووووووووووووووااا شباب بنات

الخميس أمس كان يوم حافل عندي وزي كل خميس لازم أسوي شي مميز


طبعا السبت دخلت بوابة الحب من أوسع أبوابها




وبكل بساطة خرجت يوم التلوت

ما أظن في أسرع مني خفافي

لا الله لا دخلت ولا خخرجت


وما كنت حدخل إلا وأنا متأكد؟؟؟؟؟؟ولا إيش رأيكم يا بنات....

فكانت الجامعة والسهر مشاكل عندي


وأمس الخميس في الساعة 11 الصبح دخلت غرفتي بعد ما خرجت من الكباين وسبت أهلي هناك


ونمت وما صحيت إلا تقريبا الساعة 4 الصبح اليوم الجمعة


لقيت في جوالي 30 مسد كووول

و10 مسجات

من شباب كنت مواعدهم ...بس شباب

وصحيت اليوم نيو لووك وشي جديد


ومصمم أتغير كتييير وأسيب الصياعة والكلام الفاضي حق الشباب


خلاااصص دحين سرنا كبار<<<<<<بس يا كبير

على العموم سؤال موجه لكل من يحب يدردش معانا


كم تتوقعوا عمري؟؟


أتحدى أحد يجيبوا....


سييي يوووووو في الليل اليوم

تحياتي
maleek

#بنت طفشانه#
02-03-2007, 11:06 PM
اهلين ملوكي ...........
كيفك؟؟؟
وكيف الزحمه معاك؟؟
وبالنسبه لعمرك وبما انك لسه بالجامعه اكيد 21؟؟او22؟؟او23انت اختاار

أبومالك الحضرمي
03-03-2007, 12:10 AM
ihhhhhhh

عرفتي عمري

بس مو بالتحديد؟؟؟


على العموم محاولة جيدة

والله لي كم أمر بحالة طفش عجيب بس أنام

أنام ....

بما أنك طفشانة دايما ....هههههه

أدينا نصايح عن الطفش

أكلة تسويها ولا لعبه ولا برنامج في التلفزيون

ولا مانتي طفشانة

maleek

#بنت طفشانه#
03-03-2007, 02:17 PM
هاااا جبتها صح احساسي يقلي انك 22
ع العموم العمر كلو انشاء الله..........

بالنسبه لوصفات الطفش اقلك ايش ول ايش ..........
بس والله انا اذا ضربت معايا الحمه بس الحمد لله مو دايما بس الحل الوحيد والمجرب لتطير الطفش والله امسك واقرالك صفحتين من القران والله الطفش كلوووووو يطير ......

أبومالك الحضرمي
03-03-2007, 06:03 PM
كلامك صح 100% المية

متأكدة إحساسك ما تقص واحد؟؟؟

بس قربتي مررررة

بس بالنسبة للصفحتين اللي أقراها من القرآن موقليلة شوية؟؟؟؟


أنا في شيء أفتخر بي وسط الناس ويميزني عنهم كتييييير بالذات الشباب؟؟


عندي مشرووووووع شغال عليه ليا كم يوم وقاعد أرتبله؟؟

أي طالب أو طالبه في الجامعة راح يشوفوا ويحس بأثروا إن شاء الله؟؟

ما ودكم تعرفوا أش هوا المشروع ؟؟؟

أنتوا فكروا فيه؟؟

أنا سميتوا المجلة التقنية؟؟؟؟

هاااا وصلت الفكرة ولا لأ؟


أستناكم شباب وينكم شباب الجامعة والثانوية؟؟؟



تسسلميلي بنت طفشانة على التواصل اللي يخليني أشعر بأنوا في فائدة من دخولي المنتدى كل يوم ولا على الأقل إنوا في واحد يعبرني في هادي الحياة اللي الواحد ما يعيش فيها إلا بالمصالح وجمال الظاهر؟؟؟


ترقبوا موضوع ليا عن جمال الروح في المنتدى الأدبي ............قريبااا


تحياتي لكل المدردشين؟؟
maleek

#بنت طفشانه#
03-03-2007, 07:47 PM
والله حتى انا مع اني صرت مااحب المنتدى كل معرف احد وتصير علاقتي بيه حلوه تاني يوم اسمع انو خرج او انطرد او نسحب ........
صار المنتدى مره يطفش وماصرت اعرف احد كلهم جدد ........
والله صرت مدخل تقريبا الا عشان ادردش واخرج.......

أبومالك الحضرمي
03-03-2007, 09:54 PM
أميرة العرب لها خمس أيام وفراشة لها ستة أيام

أما مرمر وابن جدة هدولا أنسى خلاص...


على العموم إحنا نقعد نستنى متى يطردونا كمان((لا قدر الله))؟

وإذا كنت ما حدخل إلا عشان الدردشة فهدا شي كويس......


إنتي طب أعطينا أخبارك اش عاملة في الدنيا اش مسويه؟؟؟طالبه ولا خلاص

متزوجة وعندك أولاد ولا لسع بس متزوجة...........

ولا لا تكوني جدة من ورانا...

وعندك أحفاد هنا ولا هنا ....ههههههههههههههههه

أمزح...الواحد مع الطفش يسوي أي شي

صراحة إزاكانت الدردشة هي الشي الوحيد اللي حيسليني في المنتدى فهدا سبب كافي عشان أجلس في المنتدى؟؟



تحياتي
maleek

#بنت طفشانه#
04-03-2007, 02:02 PM
حراااااااااااااااااام عليك زوجتني وجبتلي احفااااااااااااد وكمان خليتني جده.........
يابابا انا لسه طالبه وتوجيهي كماااااااااان الكل صار يعرف ماااعاد انت........
....................
والله الدردشه هيه احلى شي في الدنيا دي اللي كلها طفش.......
وانا محد قدي في الهرج.......
....................
المهم انا نفسي اسئلك كم سؤال ...ولا تقول ملقوفه لانو خشمي مره طووووووووووويل ......
انت قسم ايش ف الجامعه ...)))والله خايفه يكون اللي في بالي((
وعلى فكره ماقلتلي كم عمرك ..........
ول عشان تريحني ...اكتب بطاقتك الشخصيه .......لانو دوبي جيه من المدرسه وابغى اروح اكبر المخده......

أبومالك الحضرمي
04-03-2007, 10:38 PM
أحد بالله يجي الساعة تلاتة من المدرسة؟؟

طب إش رأيك إزا قتللك إني أخلص الجامعة كل يوم الساعة ستة المغرب يعني من الصباح الساعة تسعة إلين المغرب......وبعدين أروح الجيم إلين العشاء وبعدين أزور جدي إلين الساعة 11

يعني أرجع البيت زي دا الوقت كل يوم خلاااص أدور على السرير فين السرير....


أأأأه لازم البطاقة الشخصية تفضيحنا قدام الله وخلقة...

يالله بحط ألغاز وأشوف إنتي زكية تحليها ولا لأ.......قلك الزكي دحين..

الاسم: مالك بن أبو مالك الحضرمي .... والنعم

العمر : أصغر من 21 وأكبر من 19 هيا خلاص ما في أقرب من كدا

الحالة الدراسية: طالب بكلية الحاسب الآلي بجامعة الملك ((أبغى أعرف إش كان في راسك؟؟؟))

الحالة الإجتماعية: أعزب أند لووكنج

ساكن في بيت أبويا عندي سيارة و أعشق الرياضة بكل أنواعها تقريبا بذات الكورة والسباحة

وأمووووووت في الكمبيوتر وكل شي يتعلق في اكمبيوتر حتى أنو في العيلة أنا المرجع الرسمي أي أحد قبل ما يشتري جوال ولا كمبيوتر ولا أي شيء إلكتروني يجي يسألني أول الله يخليني لأبويا هو الوحيد اللي ما يسألني.....لول

أممم بس

طب أنتي قوليلي طبعا خشمي مو طويل زيك ... خخخخخ

بس أبغى أعرف هواياتك غير النت .... اممم بس

maleek

#بنت طفشانه#
06-03-2007, 01:22 AM
احلى بطاقه شخصيه .....والله انت ماتعب الاحوال معااك ماشاء الله كفيت ووفيت ......
مابقي الا تقلي اسماء العيله بس ماقلتلي عندك اخوات ....وانت رقم كم في العيله؟؟؟
..........................................
تصدق عرفت انو عمرك 20...مره جبت هرجه صح...
والله طلت يجي منك ياولد مع اني كنت احسبك فاشل...))بس ماني قايلتلك اش كان في بالي))
بس بالله كيف الحاسب يقولوا صعب.........
.........................................................
بما انك سألتني عن هوايتي هادا مصطلح دايم اسمعو ومعرف معناه ...بس اللي اعرفوا انو انا احب اسبح
واحب ارقص واحب اقرى روايات..........
....................................
بالنسبه لبطاقتي بما اني لسه ماطلعت محا اقلك ...\((على قول اختي لسه مااخدتي الجنسيه))
والله دحين بروح انام بكره اقلك هيه........

أبومالك الحضرمي
06-03-2007, 06:00 AM
هااااااااااايوووووو طفشانة

كيفك مع الصباح اليوم

أنتي أكيد زي دا الوقت تكوني في المدرسة <<<<خخخخخخ مسوي فيها طالب جامعي

هادا كلواا ما كفاكي أمكن الأحوال ما يسألوني زي كدا <<< لأنو عندهم بطاقة العائلة خخخخخ

على العموم أنا عندي أخوات وعندي أخوا وأنا في النص أكبر مني بنتين وأصغر مني ولدين

طبعا طبعا خواتي الكبار سابوني ومشيوا (أتزوجوا) وسرت أناالكبير <<<< أحم أحم

سألتك بالله أش كنتي تحسبي تخصصي؟؟ <<< أبغى أعرف الإنطباع الأول للناس لما يتعرفوا عليا

وبالنسبة للحاسب هوا من ناحية صعب مرررة صعب لكن اللي يمشي معاي بإذن الله راح يشوف كل شي سهل<<<<بس يا دافورر

هو عشاني أحب الحاسب وأموت في بشكل عام فما شي يصعب عليا فيه <<< زي لما تحبي أكله وعملها مررة صعب أكيد حتسويها ولو مهما كانت صعبة

طفشاااااانة ماتعرفي أش معنى هوايات أفاااااااا<<<< بس اللي بعرف معناها

كان قصدي أش الأشياء اللي تحبي تسويها أممم
خلينا نحش شويتين....

تحبي السباحة طب متى تعلمتيها يعني كم كان عمرك ؟؟؟
أنا كان عمري 9 سنوات بس أخويا الصغير أحسنمني أتعلمها على يدي ((بس يا خبير )) وعمره 5..

وتحبي الرقص:
الله يخليني ليكم يا أخواتي والله كانوا أول ما يفضى البيت ما في غير شغل الميوزك وهاتك رقص...

وبالنسبة للروايات:
أنا أقرأ روايات بالذات في السفر بره بس أقرأ كتير مررة يعني مثلاً أجاتا كريستي هيا غالبا اللي أقرأها دايما...مرة قريت الرجل المستحيل بس ما عجبني بالمرررة

أنتي أش نوع الروايات اللي تقريها....

-------------------------------------------
نصيحة :
بما إنك تالتة ثانوي شدي حيلك وأهتمي كتييير بالمزاكرة بس ما قلتيلي أدبي ولا علمي ((أنا أظن...))
ولا تسوي زيي والله أنا فللت أمها في التوجيهي بس الحمد لله أنقبلت في الجامعة حتى بعض الناس يقولوا أني من آخر 20 إنقبلوا في الجامعة أحمدك ربي على هادي النعمة...

اهاااااااااااا
طولت مرررة ووراي كم مشوار قبل ما أروح الجامعة


نشوفك بعديين.............سي يو

maleek

#بنت طفشانه#
07-03-2007, 04:03 PM
اهليييييييييييييييييييييييييييييييييين بأبو الحضارم كلهم .........
سوررري اني امس مارديت ع الموضوع ...تعرف ظروف الدنيا والبزوره وابوهم...

#بنت طفشانه#
07-03-2007, 04:22 PM
بس انا كأني شامه ريحة تهزيئه........
كلها كم شهر انشاء الله واجي عندكم الجامعه ........
.............................................................
على فكره انا كده يعتبر اني انتهيت من الاسئله بس والله دوبو طلعلي سؤال.......
كم كانت نسبتك لمن اتخرجت من الثانويه؟؟
.............................................................
بالنسبه للهوايات ..
انا نسيت اني بكلم نااس مايفهمو لغتنا((قصدي اني اعرف معناها بس مانسوي شي من اللي بنقول عليه لانو الناس كلهم فاهمين المعنى حق الهوايه غلط))قاعده اتفلسف
...نبدأبالسباحه والله ليه قصص مره حلوه ...
اعتلمتو وانا في الابتدائيه بس مدري كنت سنه كم بس وانا صغيره كنا لمن نروح الكباين كان بابا يعلمنا في مسبح الرجاااااااااااال....هادا اهم شي
...الرقص طبعا هادا اختصاص البنات مره سهل اني اتعلمو ودحين انا فاتحه دورة رقص لااخواني الصغار........
...الروايات هادا الشي اللي من جد حببني في القراءه..طبعامقرى الا روايات رومنسيه يعني هادا اجاتا كرستي مقرالو لانو رواياتو بولسيه ....عموما دحين انا مكتفيه بروايات عبير اللي اجيبها من سوريا ..لانو هنا مايبيعوها ..واحيان اقرى احلام..وفيه وحده اسمها دانييل ستيل برضوا اقرالها
................................................
المهم ماتبغى تعرف اش كنت احسب قسمك ........

أبومالك الحضرمي
07-03-2007, 10:46 PM
بس انا كأني شامه ريحة تهزيئه........
كلها كم شهر انشاء الله واجي عندكم الجامعه ........
.............................................................
على فكره انا كده يعتبر اني انتهيت من الاسئله بس والله دوبو طلعلي سؤال.......
كم كانت نسبتك لمن اتخرجت من الثانويه؟؟
.............................................................
بالنسبه للهوايات ..
انا نسيت اني بكلم نااس مايفهمو لغتنا((قصدي اني اعرف معناها بس مانسوي شي من اللي بنقول عليه لانو الناس كلهم فاهمين المعنى حق الهوايه غلط))قاعده اتفلسف
...نبدأبالسباحه والله ليه قصص مره حلوه ...
اعتلمتو وانا في الابتدائيه بس مدري كنت سنه كم بس وانا صغيره كنا لمن نروح الكباين كان بابا يعلمنا في مسبح الرجاااااااااااال....هادا اهم شي
...الرقص طبعا هادا اختصاص البنات مره سهل اني اتعلمو ودحين انا فاتحه دورة رقص لااخواني الصغار........
...الروايات هادا الشي اللي من جد حببني في القراءه..طبعامقرى الا روايات رومنسيه يعني هادا اجاتا كرستي مقرالو لانو رواياتو بولسيه ....عموما دحين انا مكتفيه بروايات عبير اللي اجيبها من سوريا ..لانو هنا مايبيعوها ..واحيان اقرى احلام..وفيه وحده اسمها دانييل ستيل برضوا اقرالها
................................................
المهم ماتبغى تعرف اش كنت احسب قسمك ........

خيتو طفوشة....

كيفك وعامله أيه....
طبعا اليوم ربوع وفللة الأسبوع كلو تنزل اليوم عشان كدا ما تلاقي كتير جدواية يدخلوا دحين ...

طفشانه...نفسي أعرف بس اش كنت تظني القسم إلي أنا فيه في الجامعة؟؟إذا مافي إحراج طبعا

مسوي فيها الولد المؤدب.....خخخخخخ

أنا في مقوله يقولها أبويا دايما من قبل ما أتخرج من الثانوية : أنت ما تصلح إلا حاسب بس غير كدا زبالة....
يعني أنا نسبتي زفت بس القدرات هيا اللي رفعتني كتيييير مرررة والحمد لله
بس لازم الفضايح
على العموم نسبتي 82% وفواصل يعني توصل 82% بس جبت في القدرات 87 وهادا هوو اللي ساعدني كتيير......

وعلى فكرة قصص عبير موجودة في جدة وعندي في البيت منها مليان أختي كانت تقراها قبل ماتتزوج بس شكلك ما دورتي كويس ...حتى قصص أحلام...

هو أحلى شيء أنك كنتي تسبحي في مسبح الرجال.....بس اللي أبغى أعرفوا أي كباين لأنو أنا ربضوا اتعلمت في الكباين......

والله صراحة طفشانة الدردشة معاكي مررة حلوة وأحلى مافيها أسألتك الكتيرة...

بس بدي منك طلب

أبغاكي تدعيلي أنتي وكلل اللي بيقرو كلامي هادا أنا داخل على مشروع تجاري وراح أعرضوا يوم السبت على المسؤولين إذا وافقوا حبدأ في المشروع أما إذا ما وافقوا راح يفشل المشرووع وكمان المشرووع مررة مربح يعني وراه فلوس كتيرة بس إن شاء الله تتيسر الأمور

طبعا ما راح أنسى كل اللي دعا ليا بالنجاح ما راح أنساه من الحلاوة.....

سي يو
maleek

#بنت طفشانه#
08-03-2007, 02:29 AM
هههههههههههههههههههههههههههههههههههههههه
احرجتني ......بس لا اصدق نفسي واقول داه الولد حبني .........
ع العموم والله كنت احسبك اداره واقتصااد ((بالعربي دعاااا......الخ))
بس طلع مستواك اعلى من كده...........
........................................................................
مدري حتى لو فيه هنا عبيرمو زي لمن اجيبها من بره هنا كم سطر طاير ومقطع نصها ........
اتعلمت في هدى.......كنا ندرب في المسبح ونطبق في البحر ...مره ايام روعه...

بما اننا جبنا سيرة الكباين انا بكره اللي هوه الخميس رايحه النخيل يلا الله يحيك...

#بنت طفشانه#
08-03-2007, 02:32 AM
وانشاء الله ربي يوفقك في مشروعك......

واهم شي النص بالنص ....

انا مااادعي ببلاش..........

أبومالك الحضرمي
08-03-2007, 03:07 AM
يالله قدام ....

إحنا مررة ما عندنا ورا كلوا قدام


هههههههههههههههههه


تشكرات على الدعا بس نص موكتير شوية إحنا بنتعب يعني .... بس غالية والطلب رخيصص...لا تصدقي ههههههههه


والله دوبي شفت فيلم ذا بريستيج مرررة روعة هوا في البداية ما فهمنا شي بس بعد كدا حبة حبة فهمنا كل شي حتى بعد الفيلم قعدنا نتكلم عنه وأحلى شي كان مررة واضح والترجمة مررة جيدة

إشتريت مجموعة جديدة من الأفلام إزا كنت من محبي متابعة الأفلام حقولك عليها.....كسلان أكتب على الفاضي....كالعادة خخخخخخخ


يوم الربوع انتهى وورانا خميس طوييل بس إن شاء الله يكون حلو


على العموم تحياتي
maleek
وتصبحي على خير

#بنت طفشانه#
09-03-2007, 04:51 PM
والله مر عليا احلى ويك اند...........
بعدين احكيك ......
دحين عندنا ضيوف .........

أبومالك الحضرمي
09-03-2007, 07:24 PM
بالله ...

إن شاء الله يكون كل ويك إند حلو عندك وعندي كمان

أنا بالنسبة ليا كان مررة عادي... زي أي ويك إند


في انتظارك
maleek

#بنت طفشانه#
10-03-2007, 02:40 PM
اهلين ملوكي .........
انا عارفه اني وحشتك .........
لانو ليه كم يوم ماهرجت زي الاوادم ..............

#بنت طفشانه#
10-03-2007, 08:06 PM
بس يلا خليني احكيك اش صارمعايا .........
يوم الربوع كان عيد ميلاد بنت خالتي ...وسينالها سبرايس ..والله مسكينه قنالها انو حيجوكي خطاب والبنت صدقت ...وكل شويه تدق تقول والله ماني عرافه انام ول عارفه اش حلبس بكره ..اتخيلوا انا حتزوج ...مسكينه والله مره بهدلناها .....
وطبعا من يوم مادخلنا عندها انضربنا وتبهدلنا احنا كمان ......بس مره كان يوم روعه ...وطبعا كالعاده انا نمت عندهم ...لانو يوم ربوع ......
بالنسبه للخميس رحنا البحر من العصريه ...مره كان الجو يجنن .......
واحلى شي واللي من جد كان اكشن <<متأثره بmbcاكشن
شفنا مضاربه بين واحد مصري والبت التكرونيه حقت الطراطيع .......والله مره كانت فله لانو اول مره اشوف بنت قويه زي كده والله فقشت الرجال فقشتين في راسوا اتخيل الرجال ماهم قادرين يمسكوها من كترة ماهي قويه ...والمشكله انو هيه الغلطانه ......
وبعدين كملت سهرتي في الصواري ...بس مره ماعجبني لانو ماهم راضين يلعبوا البنات بولنج .......
خرجتهم كلهم ورجعنا رحنا البحر ......
اهم شي دخلنا بيتنا الساعه 4 الصبح .............
والجمعه امس عشان ستي عندنا طبعا خالاتي عشان بس يبغوا يجوا عندنا او بالمعنى انهم يبغوا يخرجوا
جوعندنا بحجة انو ستي عندنا .......بس برضو انبسطنا ......
وخلص الويك اند ......
بس بالله اش رايك .......مو فله .........

أبومالك الحضرمي
10-03-2007, 09:45 PM
يالطيف يالطيف

ماشاء الله

هادا كلو سار بس في هادا الويك إند


والله صياعة إلين الساعة 4 الصبح


بس تقولي ما لعبوك بولينج<<<<خخخخ خايفين لا تخربوها


والله أنا الويك إند راح كلوو في المرور والصناعية وملحات تصليح السيارات وودي وجيب

سواقنا سوى حادث (الله لا يوفقه) في طريق المدينة وكان معاه أخويا الصغير عمره 9 سنوات وأول ما سوى الحادث شرد ولا عاد شفنا وجهه وساب أخويا الصغير في السيارة لحالوا

ويدقوا عليا المرور وألحق على طوول أشوف السيارة مررة معدومة ومصدومة من ورا ومن قدام وأخوي الصغير قاعد يبكي والناس من قدام ومن ورا قاعدين يصرخوا والسواق مو في

وأنا قعدت أمشي معاهم من معاملة لمعاملة ويالله على المرور ومين الغلطان ويييييييه

قصة مررة طويلة إستمرت إلين صباح الخميس على الساعة 12 الظهر خلصنا الأوراق

ومن داق الوقت رحت أودي أهلي الكباين وحتى ما قعدت فيها وديت أمي الكوفيرا عشان السواق مو في

(( سؤال جاء غلط : إش رأيك في جمالك اللي في التحلية ؟؟ ))

بس صراحة يوم الخميس في الليل وصلت أمي الفرح حقها الساعة 12 الليل وهاتك لفلفة في البحر والتحلية مع الشباب حقين العلية إلين ما خرجوا الحريم على الساعة 4 الصبح....يعني نزلت حق التعب كله

هااااا بس أهم شي عدا الويك إند على خير وفلينا شوية وطبعا الجمعة كان يوم الأفلام العالمي

وحلوة القصة حقت التكرونية وكويس قلتيلي عشان ما أتمشكل معاهم مررة<<<<خواف

في النهاية الويك إند بتاعك كاان فللة أكتر من الويك إند حقي......بس أصبري الويك إند الجاي أنزل حق الأسبوعين كلها مافي مكان في جدة إلا أروحوا


وبالنسبة للرد الأول....

والله مو بس وحشتيني كنت حتقطع كل خمس دقاايق أدخل الموضوع وأخرج خلاص إلين ما كنت أبغى أنتحر وأرمي نفسي من الشباك على السيارة المصدوومة وأرتاح من الوجع اللي في قلبي

















خخخخخخخ بس لا يكون صدقتي....

هوا إمكن إفتقدت شويتين بس هي دي الدنيا كدة >>>> لازم أسوي تقيل خخخ



لا والله وحشتيني >>> يبغى يدارك الوضع قللك

طب أنا ما وحشتك......:)

تحياتييي
maleek

#بنت طفشانه#
10-03-2007, 10:55 PM
اكيد وحشتني....(((والله مو بس وحشتيني كنت حتقطع كل خمس دقاايق أدخل الموضوع وأخرج خلاص إلين ما كنت أبغى أنتحر وأرمي نفسي من الشباك على السيارة المصدوومة وأرتاح من الوجع اللي في قلبي))مو كنها كبيره شويه .....حسيت ارانب مرة من جنبي ..........

مره الويك اند حقك كان وحش ..الله يصيبو السواق ...كم عمر اخوك؟؟
بالله لو كان صغير ومايعرف رقمك ول رقم اي احد مسكين اش كان حيسوي ...
على فكره ..فين بابتك من دي الهرجه كلها ؟؟؟

وبالنسبه انو انت بتوحشني ول لا ......
انا قلتلك قبل كده انا سرت خير شر مدخل المنتدى ...ومدخل الا عشان ادردش واخرج .......
وطبعا مافي احد ادردش معاه الا انت ........فاكيد بدخل عشانك بس
.........))بالله كيف مو رد دبلوماسي ((...انفع اسير صحفيه صح......

بس انت لو تريحني وتجي في عالم نت .....ترى مره منتدى لذيذ ..

أبومالك الحضرمي
11-03-2007, 05:29 AM
يالله خليها على الله هو كدا ويك إند وحش ويجي بعدوا واحد حلو إن شاء الله

وتشكرات تشكرات على الدعوة للمنتدى ودحين بسجل فيه...مشان عيونك بس...

وإزا كنتي بتدخلي المنتدى بس عشان الدردشة فدا إيميلي anasete@hot...

وأنتي عاد كملي الباقي مو أريح ونسير نعرف بعض أكتر

وخللي هادي الدردشة عامة لبقية الأعضاء

ولا مو

تحياتي
maleek

أبومالك الحضرمي
11-03-2007, 05:35 AM
وبالنسبة ليابدوو فأنا من وجهة نظري إنو هادا المنتدى مو للفاضين لكن هو للناس المشغوولين اللي مايقدروا يدخلوا كل يوم المنتدى يعني هو منتدى قديم وفيلوا مجموعة كبيرة من الأعضاء ويدخل زوار كتير لكن الأعضاء الفعالين فيه ينعدوا على الأصابع....وتلاقيهم بعد فترة يمشوا زي الباقين



أنا بروح أودي أخواني المدرسة خلاص دحين سواق ورجااال البيت لازم أشتغل شويتين

أبويااا أمس جا من الرياض وواليوم رايح الدمام عندهم شغل كتيير مررة في الشركة الله يكون في عونه

وليش أتعبه في مواضيع أنا أقدر أمسكها وخليه هو في شغله....خليه يستفيد مني شويه


تحياتي
maleek

#بنت طفشانه#
11-03-2007, 02:16 PM
احلى يااااارجال البيت ............
الله يعينك ...انا عارفه كلها كم يوم وحتشد شعرك ..........

تسلم عيونك ياحلو......
المهم انا ترى اسمي #بنت طفشانه#في المنتدى اللي قلتلك عليه ......
روح هناك ونتفاهم بعدين ........
يلا اشوفك هناك انشاء الله...

أبومالك الحضرمي
12-03-2007, 05:45 AM
سجلت خلاص.......


والله دحين في البيت مشاغل مشاغل مايعلمبها إلا والله


وكمان في المشروع اللي شغال عليه في الجامعة محد معااي بس أنا لحالي والباقين يرمي شغلته عليا ويمشي

بس أصبري عليهم بكرة لما تيجي الفلوس أعرف كيف أتعامل معاهم هيا كدا إحنا شعب ما نفكر إلا بلغة الربح والكسب المادي

ماحد يشتغل عشان مبادئ ولا عشان وطنه أو دينة لا

إذا الشغلة فيها فلوس يجيك أول واحد

يالله هيا الدنيا كدا كل واحد يدور أرزاق

والأرزاق بيد الله

على العموم

أنتي إش عاملة كيف الدراسة ؟؟ يقولوا هادي آخر سنة تيجي فيها الأسئلة من الورزاة؟؟

أنا ماشي أمي تبغاني أودي أخواني المدارس


شايفة كيف ؟؟؟ والله مرررة مشاغل


بس أحلى شي أنك تسليني هنا شويوتين



س ييوووووووووووووووو

maleek

zaqe22
12-03-2007, 08:05 AM
طيب يا جماعه الخير

إذا كان الموضوع فيه فول ومعصوب ماشي ، بس فين ؟ يبو مالك.

قرموشي ، غامدي ، البلد .......؟


وبعدين لفه علكورنيش عشان نهضم مع كاسة الشاهي وكل واحد يروح يشوف مصالحه ! ولا ايش الهرجه ؟

#بنت طفشانه#
12-03-2007, 03:28 PM
الله يعينك .......حتشيب بدري ..........
على فكره اش هوه مشروعك ؟؟؟امكن اقدر اساعدك ....ول الهرجه مافيها بنات ........
ترى والله اذا الحكايه فيها اكشن وانو يسير عندي مكتب وروحات وجيات والله ماعندي مانع .........
.................وبالنسبه للي معاك طول بالك عليهم امكن يكون عندهم ظروووووووف .....ولاتفهم الناس غلط ...........................
بالنسبه لدراسه شفت كيف حظي الضارب ......
يلا هانت الله يعديها على خير ......والله خلاص قرفت ام المدرسه......
........................................................
على فكره نور المنتدى......

أبومالك الحضرمي
12-03-2007, 07:56 PM
أهلين أخي زكي .........


تحياتي لك وأستنى مشاركتك معانا وطلباتك أوامر(( هادا بس عشانك ضيف وتوك جاي ))



بانتظار إبداعاتك
maleek

أبومالك الحضرمي
12-03-2007, 08:07 PM
طفشااااااااانة إيزيك اليوم <<< خير اليوم قالب مصري عسى ما شر


ستو وسيدو اليوم جاوو من مصر ومعاهم خالتي وزوجها


أقولك سر بس لا تقولي لأحد ....

هوا زوج خالتي طلع في القناة المصرية عشانة دكتور في الطفيليات في برنامج ساعة زمن<<<شكلو كان يضحك...

كلنا إستلمنا محشااات


اليوم أحس براحة أكتر.....



وبالنسبة للمنتدى فهوا منور بأهله


تحياتي الحاااااااااااااارة
maleek

#بنت طفشانه#
12-03-2007, 09:49 PM
اهلين ملوكي ........
شكلها قصه حلوه حقت زوج خالتك ........حكيني.......
والحمد لله على سلامت اللي وصولو.....

أبومالك الحضرمي
13-03-2007, 12:42 AM
القصة مرررة طويلة وأنا تعبان شويتين


بس هو الموضوع إنو كان لابس بدلة وكان أول مررة يلبسها في حياتوا




على العموم لازم أنام عشان أودي أخواني المدارس بكرة الصباح بدري


أمس كنت أتريق عليكي وأحشك على المدرسة دحين سرت أصحى زيكم الصباح كل يوم



الله يعينني ويعين الجميع

وإذا تبغي تعرفي على المشرووع أكتر حكتبلك فكرة عنو...

هيا مجلة مرئية ((فيديو)) يعني برامج حوارية وإجتماعية غالبا نعرضها في الجامعة وهيا خاصة بقسم الحاسب الآلي هادي هيا بشكل عام


ها تشتغلي معانا


تحياتي الحاااارة
maleek

#بنت طفشانه#
13-03-2007, 02:08 PM
مو بقلك حتشيب بدري ..........
الله يعينك .....حس بمعاناتي شويه .......ياجامعي .......

والله قلتلك ماعندي مانع ؟....ابغى اشتغل معاكم ..........
ترى خشمي يكحني ......
يلا حكيني القصه .......حقت البدله .......
د