PDA

عرض كامل الموضوع : ** قــصــيــدة غيـبـوبـة الــهــم ** بعيد عنكم



Mr.Man
20-11-2007, 01:06 PM
سريا قلم مالي على الصبر طاقه


صبرٍ تعدى الحد ما عاد ينطاق


اكتب لمثلي قصته واشتياقه


في خطك الواضح على بيض الأرواق


قصة حزين صافي المر ذاقه


ليا ذكر ما صار له خاطره ضاق


باقوا به الأصحاب والوقت باقه


وصار الضحية بين بايق وبواق


يمشي وهو ما حس في كسر ساقه


أمسى على ساقين وأصبح على ساق


وهذي سوات الوقت شين اصطفاقه


والوقت لو يصفي لك أيام دراق


إن شان قطع عنك كل العلاقه


وان زان خلى لك مع الناس عشاق


ومن شان معه الوقت قلوا رفاقه


راحت حياته كلها هم واقلاق


والله خلق خلق تحب اللباقه


كما خلق له خلق ما عندها اخلاق


أحد يعيش بخير واحد بفاقه


واحد يعشق أيام ويام يتعاق


واحد معه حكمة وصبر ورواقه


سبحان منهو للمخاليق خلاق


لكن يا من معك عقل ووثاقه


ابنصحك كانك للأمثال تشتاق


لا تنخدع بأهل العلوم الرقاقه


اللي سوالفهم توهق توهاق


صادق رجال يعرفون الصداقه


يقفون صفك يوم يبسات الارياق


ومن رغب في فرقاك فأرغب فراقه


جاز الذي يجزاك بفراق بفراق


وتعلم التعشيق قبل السواقه


ولا تحسبنك بالدركسون سواق


ورزقك يجيك بدون تحضر بطاقه


وعند الله المعبود تقسيم الأرزاق


يقولها اللي جاير الوقت عاقه


ولا زال في غيبوبه الهم ما فاق


من انعزاقه بنادي بنعزاقه


واللي يوده صار شوفه بالأشفاق


ولا قال هذا القول قصده طفاقه


ما قال هذا غير من نار الأشواق



للشاعر / عبدالله بن باتل الرشيدي

*عطر السحاب*
20-11-2007, 01:22 PM
اختيار موفق
بارك الله فيك

والدنيا مثل مانأخذ منها تبي منا
اللهم اني اعوذ بك من الهم والحزن والعجز والبخل والجبن وضلع الدين وغلبة الرجال
ودمت معطر بذكر الله

لـمــســـــــــــات
24-11-2007, 07:55 AM
يعطيك العافية على النقل

قصيدة جميلة ووصف حزين :(

Mr.Man
24-11-2007, 11:25 AM
عطر السحاب

لمسات

الله يعطيكم العافيه عالمرور العطر والتواجد الكريم