المشاركات الأخيرة





+ إضافة موضوع جديد
عرض النتائج 1 إلى 5 من 5

الموضوع: من قصائد الشاعره المميزه #نور_الوليدي

  1. #1

    Lightbulb من قصائد الشاعره المميزه #نور_الوليدي





    ياضيف ما اثقَلك لامن جيت في حاجة

    ماهيب عندي ولابه شخص يقضيها

    معزةٍ لك ولاهي نفس منعاجة

    ولا انت فاغلى من العينين كلتيها

    ياعلنا في ظروف العز نتواجه

    وافديك وتشوف كف النور.وش فيها

    خاطرك ماودي اسبب لك احراجه

    وانا فجربت حامضها وحاليها

    إن كان مامد لك قدري عن الصاجة

    فقدور الأيام ماني كفو اباريها

    العام أنا وأنت في روما وقرطاجة

    واليوم يازين سودتنا واهاليها

    نفرش خَضار ونقشِّر فصفص الباجة

    ونحمس دلال الوفا مابين اراضيها

    في دير ةٍيعجز المخرج ومونتاجه

    لاتوصف الكاميرا روعة روابيها

    كم دوَّن الترمذي عنها وابن ماجة

    فضيلة إكرام ضيفك وش معانيها

    يابيتي اللي تدل ابوابك افواجه

    شيمتك ياعل طول العمرتوفيها

    لوفتشوا بين عتباته مع ادراجه

    يلقون حاجاتهم من قبل ما اعطيها

    ياضيف يازينة المدهال وسراجه

    يامرحباعدالأيام وثوانيها

    ما اشيل همك لواني ما تمتلك حاجة

    مادام تدري عن النية ومافيها


    -
    #قصيدة / إكرام الضيف
    --------------
    #شعر / #نور_الوليدي


    .
    Rule NO. 1 :
    Rshed Is always right
    Rule NO. 2 :
    If Rshed Is wrong see Rule NO. 1

  2. #2


    نبض المودة

    ان كنت جاي تجس نبض المودة

    فانا على حطة يدك ما تغيرت

    وان كانها صدفة ماني مستعدة

    اكذب واقول اني بها ماتأثرت

    خط المواجع بين صدّة وردة

    ينبيك عن حبٍ منه ماتحررت

    مَيِّل على دمع المفارق وهَدَه

    دمع المفارق منه ياما تضررت

    ظهرت لي من بعد عِده ومِده

    واحييت جرحٍ عنه بالحزن كَفَّرت

    والله مالي بالوداع اي شدّة

    عزمي خذاه العمر معك وتدهورت

    همال فقد الحب وَسَّمت خده

    مجراه ينبي عنه لوإني اسررت

    وقصر الوفا لرضاك مافيه قده

    من معدن الاخلاص لبناه عَمَّرت

    ويوم إن حد الصبر بالغ بحده

    حديتني على الرجوع وتغيرت

    غيرت عقرب وجهته حول يده

    وكسرت معصم نيته فيك وادبرت

    باب الوصال اللي بهجرك تسده

    وش له فتحته في مجيك وغررت

    غررت قلبٍ كان له عنك مِدة

    ليتك عتقته عن مجيك ووفَرت

    ما بين وصل وهجر ضدٍ وضده

    بكَيتها حبر وختمته وسطّرت

    اقولها سوّ الذي بي توِده

    ياعطري اللي من جروحه تعطرت

    إن كان عندك شي بالله رُده

    رده لو إنك عن مَرَده تأخرت

    غلاك ماياصل غلا انسان قده

    علمني بحل الوجع لا تاخرت

    -

    نور الوليدي

    .
    Rule NO. 1 :
    Rshed Is always right
    Rule NO. 2 :
    If Rshed Is wrong see Rule NO. 1

  3. #3

    ماش

    حنا بواقع فيه الأنثى كفو والرّجال ماش

    إلا القليل من القليل اللي حصيلتهم قليل

    حديث من منطق تعايش لاتظنه حكي طاش

    تأمل الواقع وقارن في تفاصيله دليل

    من قبل ما تبدي معاذيرك وتسهب فالنقاش

    كم بيت قايم بالنسا مافيه لرجاله فتيل

    كم بنت شيخ تصون عفتها تلحف بالخياش

    واللي تولاها قروشه للمطَبِل والعميل

    كم دمع مقعد يعجز التدبير وبكفه رعاش

    وأنثاه تسعى في كفافه زادها الصبر الجميل

    كم ارملة فيهامن الأوجاع ياما الصدر جاش

    ولاتمد إلا الجزيل ولاتشيل إلا الثقيل

    ومطلقة تفرش لواقعها من العفة فراش

    ولاجاوزتها حدة الالسن و لامدة بخيل

    وموظفة تمشي طريق الموت رغبة بالمعاش

    ويحوشه اللي يصرفه في ربة الخصر الهزيل

    واللي لزينتها حكيم المحكمة غنى وشاش

    وراود مروتها بما يملكه من ظلٍ ظليل

    واللي تنازعها فروخ الطايشين من الطشاش

    وإلى انصفتها نفسها.ماحادها السيف الصقيل

    واللي بحكمتها ليا بلت معازيم العِطاش

    تستذئب اهواء الدناة اللي تنكر للجميل

    واللي تصبّح في عذاب وتمسي الليل بهواش

    ويردهاعن قولة آه أطفال وإحساسٍ ذليل

    واللي تعيش العمر بين إبرة ومكلومة وشاش

    لاقدرتهانظرة العاجز ولا انصفها نبيل

    واللي مع اللي فيهم الإحساس كم عاناوشاش

    ولالهم في ساعة الشِدة على الشدة سبيل

    الوضع هذا لي متى بالله يا أبن آدم يعاش

    والله ماباقي من أهل المرجلة غير القليل

    -

    #شعر #نور_الوليدي


    .
    Rule NO. 1 :
    Rshed Is always right
    Rule NO. 2 :
    If Rshed Is wrong see Rule NO. 1

  4. #4



    دعوتك (يمه) شفيعة


    تناقلَوا هرج الخفا دون توثيق

    وأنا علومي في حصونٍ منيعه

    خَذَو من السَيَات مع فكة الريق

    وخذيت منزلةٍ من الله رفيعه

    الحمدللي منه كل التوافيق

    دام التجاهل والتسامي طبيعه

    ماني بحاجة رد قيمة وتحقيق

    تردني عنهم حدود الشريعه

    مطوِقة عقلي من العلم تطويق

    تاجٍ يعبر عن مجاله صنيعه

    لي في فضا الإحسان غاية وتحليق

    أشري بعزمي خوته ما أبيعه

    كفوفهم تصفق من الغبن تصفيق

    وأنا أتجاهل وأتجه للطليعه

    اللي حصيلتهم مذمَه وتفريق

    وش لي بهم وفجاج ربي وسيعه

    الدين عندي روح ؛فكره؛ وتطبيق

    لوكنت في وقتٍ صروفه فضيعه

    بين إحتدام و حزم واقع وتشويق

    دعوتك (يمه) بالمواقف شفيعه

    لاجاتني تكفي عن أهل التلافيق

    اللي محبتهم محبة وضيعه

    لاجيت صبوا لي من الحيلة إبريق

    ولارحت جابوا للغبينة ذريعه

    خلوني أبحِر في بحور الطواريق

    وأحط قلبي في قصيدي وديعه

    -

    #شعر #نور_الوليدي
    Rule NO. 1 :
    Rshed Is always right
    Rule NO. 2 :
    If Rshed Is wrong see Rule NO. 1

  5. #5

    .
    .
    .
    .
    احتاج لك لكن الخذلان

    علمني اخبي الحاجة

    من يوم شفتك إلين الآن

    والقلب متعبني إزعاجه

    ماصرت اثق فالهوى بانسان

    حتى لوابراجي ابراجه

    الصمت في حضرتك عنوان

    شعور متعبني إحراجه

    ما اقول كاذب ولاخوان

    بس انكسر فيني زجاجة

    يمكن زمن او كثير ازمان

    لين الامل يرجع ادراجه

    انثى ويرجح بي الميزان

    والحب لاتامن مزاجه

    بالعقل والروح والوجدان

    شكّلت بالشعر ديباجه

    عاملني بصبر واستحسان

    والصبر ينبيك بافراجه

    -


    نور الوليدي


    .
    Rule NO. 1 :
    Rshed Is always right
    Rule NO. 2 :
    If Rshed Is wrong see Rule NO. 1

معلومات الموضوع

Users Browsing this Thread

يوجد الآن 1 قارئ يقرؤون الموضوع. (0 عضو and 1 ضيف)

مواضيع ذات صلة

  1. المشاركات: 0
    المشاركة الأخيرة: 16-09-2015, 05:15 AM
  2. ابي حبك يزلزل..
    By بلوشيه ريس كااامل in forum منتدى الشعر
    المشاركات: 1
    المشاركة الأخيرة: 07-11-2007, 12:32 PM
  3. حصرياً اقوى افلام الرعب 3 اجزاء والحلقه 16 من بريزن saw
    By & الهاجس & in forum ديوانية نواف للمراسلات البريدية
    المشاركات: 0
    المشاركة الأخيرة: 17-04-2007, 10:43 PM
  4. سلطه الفلافل ..... بطريقه مميزه
    By mzunh in forum منتدى الطبخ
    المشاركات: 6
    المشاركة الأخيرة: 11-04-2007, 09:47 PM

ضوابط المشاركة

  • لا يمكنك وضع موضوع جديد
  • لا يمكنك وضع مشاركات
  • لا يمكنك إرفاق مرفقات
  • لا يمكنك تحرير مشاركاتك
  •